靳：我覺得以前啲人好慘啊，因為佢哋冇emoji。
以：其實係。
苗：古埃及人咪有囉！全部都emoji嚟㗎喎。
以：啊，其實係喎！
苗：而家我哋復古啊。
[jingle]
以：歡迎返到嚟《絮言．狂想》第五十四集，我係以色列。
苗：我係三苗。
靳：我係靳尼啊。
以：我哋上次講呢個「唔三唔四」啊，好似冇幾耐前嘅事咋喎。不過我哋今次未能夠令到呢兩集有關聯啊。唔知大家聽嘅時候，仲係七月，定係已經八月呢？
苗：係啊，喺comment話畀我哋聽，而家係七月定係八月。
以：又嚟……
靳：我哋已經知道有冇打到八號波嘞，多謝大家嘅comment。
苗：係……最後有八號波。
以：有冇打到啊？有八號波啊，係咪啊？
靳：係啊，有八號波。
以：有冇事啊？阿靳尼。
靳：放咗日假囉，係啊。
以：我哋而家係七月尾嘅時候錄啦，我哋盡量七月出到，但係可能大家聽到嘅時候，我已經去咗第二個國家嘞。
苗：去咗個好遠好遠嘅地方。
以：去咗好遠好遠嘅地方，隔咗兩個時區嘅地方喎，嘩。
靳：嘩，咁遠呀？
苗：即係中國去咗阿富汗啊。
以：幾遠啊？想像下幾遠？嘩，中國去阿富汗，簡直就係去到地獄門關返返嚟。
苗：邊邊係地獄啊？
以：唔知呢嗬？大家自己決定啦。我唔知到時大家聽到嘅時候，我有冇出到啲咩宣佈噉樣呢？可能都冇時間拍片，太忙。
苗：你講啦。
靳：你係咪要宣佈㗎？
以：因為我……我八……我成個八月呢，如果到時大家未睇嘅話，我哋而家就宣佈喇，噉我就係喺立陶苑啦，嘅首都，我唔知中文叫咩呢。
苗、靳：維爾紐斯。
苗：係咪啊？
以：係咩？維爾紐斯，要有個「nau2」㗎。唔可以懶音。Vilnius。
苗：Villius。
以：喂！嗱！Vilnius，有少少齶化嘅，但係又唔係好多齶化，所以係nʲʊs，nʲʊs，nʲʊs。唔係nius，係啊。我而家已經學緊少少啲發音嗰啲。
苗：嘩，好深啊。
以：係真係幾深下嘅，係啊。所以我而家煩緊執行李嗰啲嘢啊，唔知有幾多嘢執，成個月。即係去幾日呢，就可以求其抌啲衫落去，之後有咩事，到時咪買囉。噉但係去成個月呢，硬係驚……譬如話有啲……到時錄podcast，或者做其他嘢需要嘅工具，或者可能我作曲需要啲唔知咩架撐噉樣。噉我就要諗定晒，唔好帶漏囉。因為可能有啲嘢買唔到。雖然嗰度啲嘢應該幾平。所以好緊張啊，而家。
苗：通常都唔使驚嘅，我覺得。就算你去一個月呢，都係……就算你唔見咗個喼，都冇問題。因為我之前就係試過去冰島一個月啦，噉就上冰島文堂啦，二〇一七嘅時候，好耐之前。嗰陣時就係搦咗一個喼嘅，一個好新淨嘅喼，係即係真係啱啱全新、整到好靚，覺得：哎，呢個喼，應該可以用到好耐㗎喇。點知一落到機呢，就唔見咗囉。就由二〇一七去到而家，都唔見咗。
以：佢仲揾緊佢嘅主人啊，小蝌蚪找媽媽啊。
苗：佢仲喺度……去咗唔知幾多個國家嘅黑市啊，可能。
靳：跟住唔知飛咗去邊。
以：你有啲咩喺裏面啊？
苗：裏面……冇喎，有啲……有啲利賓納囉，我記得。有啲衫啊，有啲廁紙啊……
靳：利賓納……點解你要帶利賓納去冰島？
苗：吓？噉因為唔知帶咩好喎。因為其實個喼都好空嘅。
以：哦，即係你想揾啲嘢塞滿佢。
苗：係啊，其實冇乜特別嘅，都係啲食物啊、衫啊，都唔係啲貴重嘅嘢。總之最重要嘅，你自己跟身，基本上你咩，去到嗰度都買到㗎喇。
以：係貴啫。
苗：同埋記得買呢個旅遊保險啊，大家。
以：哦，係喎。我要買喎！多謝提醒。
靳：係喎，要買啊。
以：你可能嗰陣時後生啲呢，冇咁多唔同嘅職責噉樣呢，所以你求其去玩下、揈下，噉就得呢，但係……
苗：都係嘅。如果而家可能要帶個咪囉。
以：係囉，帶咪囉。噉大家祝我好運啊，係啊。
苗：好嘢，一個月就可以學識立陶宛文。
以：我都想知一個月學到幾多喎。因為呢個係……都……嗰啲咩暑假密集班啦，噉係，我以前都試過一次嘅，我係二〇一四年，即係差唔多十年前，就暑假去咗維也納。嘩，好亂啊，維也納，同埋今次咩話？呢個……
苗：維爾紐斯。
以：維爾紐斯，都係維。我諗緊有冇講錯呢？冇講錯，嗰時係維也納，就學德文。又係一日幾個鐘噉樣呢。
苗：哦，好似我之前冰島文噉，都係……又係一個月，每日可能五個鐘噉樣囉。
以：有冇其他嘢玩㗎？你嗰陣時。冰島好多嘢玩喎。
苗：佢會有其他唔同嘅班，即係佢會有啲講唔同嘅文化嘅嘢，可能請啲其他人嚟講，或者有啲坐旅遊巴，一齊出去即係首都出面，同啲靚嘅地方，睇下噉樣囉。
以：哦。冰島真係要坐旅遊巴先得啊。
苗：係啊。巴士就真係麻麻地。
以：唔知去咗邊度啊。係啊，我最近發現呢，原來維爾紐斯呢，同白羅斯條邊界，係隔咗九個字車程㗎咋。所以我而家有少少緊張。
苗：冇事嘅，有呢個美帝。
以：係喎。係咪北……北約㗎嘛，係咪啊？係啦。
苗：美帝保護，輕鬆。
以：有美帝保護，即係嚟緊就有埋瑞典保護。更加多詳情，我就拍片再講啦，呢個都幾有趣嘅淵源，點解會上咗呢個班。
[05:58]
以：係嘞，好，我哋今日呢，我哋上次冇到任何新聞喎。其實當然我哋而家差唔多一個月先一次呢，都有好多嘢發生啊，所以我哋走去睇下有啲咩有趣嘅語言新聞呢，之後我哋有一位聽眾呢，就send咗篇文畀我哋睇喎，都幾有趣喎。就係由呢個……嘩，咩人嚟㗎？Blake Nolingberg，嗯，唔知邊度人嚟㗎呢？噉就係關於……又係我哋講咗幾次嘅呢個ChatGPT喎。
苗：實不相瞞，我就冇好詳細噉睇咗呢一篇文啦。噉佢就係引述一個學術嘅論文嘅。噉佢就係話非英語母語者寫嘅英文文章呢，有一半就畀GPT嘅偵測器標記做係AI整出嚟嘅。噉即係話，如果你係一個英文可能唔係好叻嘅人，你寫出嚟嘅嘢，會畀人以為係AI囉。如果你做功課呢，真係自己好努力噉樣寫咗篇嘢，最後可能畀人話：哎！你係咪抄㗎？噉樣。
靳：好慘啊。
以：但係……但係AI gen出嚟啲grammar係完美㗎喎，差唔多。
苗：係啊，呢樣嘢就係比較唔直覺囉，比較神奇嘅嘢囉。你會覺得：咦？噉ChatGPT整出嚟嘅嘢，寫到好叻㗎喎。噉點解會噉樣呢？噉其實我有……因為唔係好睇得清楚啦，唔係好詳細噉樣睇，但係佢就係有啲似係講非母語者寫嘅語言呢，佢嗰個多樣性係比較低嘅。可能用一啲比較簡單嘅詞彙啊·簡單啲嘅句法啊，噉樣，就呢一啲嘢，就會令到嗰個GPT嗰個偵測器呢，就會有啲……有啲錯亂啦，佢就以為：咦？呢個噉咁唔似普通我哋……我睇過嘅英文嘅？噉樣。嗰佢就覺得係有啲假囉，睇落去。
以：哦，即係大家要用多啲嗰啲所謂big words。
靳：即係係咪因為佢個句法重覆啊、同埋佢嗰個用詞嗰個種類比較少啲、同埋佢寫嘢會比較正式少少？
以：可能個語氣有少少千篇一律噉樣。
苗：我再睇一睇篇文呢，佢就話嗰個原因呢，就係因為非母語者寫出嚟嘅，因為佢結構簡單啲，噉就少啲嘢可以睇到啊。少啲嘢睇到，噉佢就令到嗰個偵測器就冇咁多嘢……冇咁多路可以捉啊。所以佢個準確度就低啲囉。即係佢就唔係同你講：你似啲GPT整出嚟嘅嘢。而係因為你實在太簡單喇。譬如你寫This is a boy噉、I go to school by bus。噉太簡單吖嘛，我又點分係你寫定係GPT寫呢？可能兩個都好有可能喎。噉我咪估錯囉。
以：哦 ，即係資料唔夠。
苗：係喇，但係當你寫嘢好複雜嘅時候，我就捉到路喇：啊，我就……可能話……啊，GPT呢，就通常係噉樣寫嘅，但係人呢，就噉樣嘢。有啲好微細嘅嘢，可以捉到囉。但係如果嗰個語言好簡單，就會非常之難做呢樣嘢。
靳：即係我諗呢樣嘢，都要睇下其實啲GPT嘅偵測器，係點樣運作㗎囉。呢個係比較重要。
以：係啊，因為佢都係AI咋嘛，即係佢……另一個語言模型，兩個模型喺度鬥噉樣。道高一尺，魔高一丈。
苗：係啊，係啊。呢個……即係大家好多時，見到嗰啲整圖嘅AI啊、或者整片嗰啲AI呢，嗰啲deepfake呢，好多都係用呢一個技巧㗎。呢個……我變咗科技podcast。
靳：科技．狂想。
苗：即係嗱，噉簡單啲嚟講，就有兩個唔同嘅……有兩個唔同嘅模型啦，一個呢，就係負責偽造啲嘢出嚟嘅。一個呢，就係負責去捉人嘅。噉就係嗰兩個一個賊&一個係偽造者，一個就係偵探噉樣。兩個就不斷鬥，就一個呢，做造啲越嚟越真嘅嘢，一個呢，就越嚟越叻分咩係假嘅。噉就兩個互鬥，噉就會最後做咗啲好真好真嘅偽造品出嚟囉
靳：哦，係咪就嗰啲咩adversarial network啊？
苗：係喇，係喇。就叫做generative adversarial，就係兩樣都有嘅，噉就叫GAN囉，g a n。
靳：gan，好驚。
靳：gan。靳尼啊。

The rest of the transcript is available to Patreon members.