mek1：出唔出得街㗎？
以：你做乜打開呢個潘朵拉盒子？
靳：嘩喺。
苗：要鬧佢嘅話呢，喺comment度打啦下。
靳：係。
苗：唔係我哋講嘅係。
以：鬧多啲鬧多啲。
靳：可以鬧多啲我哋嘅。
以：唔好鬧我哋，鬧阿mek1。不過記住要留⋯⋯留言。
mek1：呢啲算唔算係網絡欺凌嘅？
靳：我哋係鼓勵人哋網絡欺凌。
苗：我哋慫用人。
以：唔係啊，呢啲叫engagement啊。
mek1：哦，即係課金，啊，欺凌佢就可以課金喇，啊唔係，課金就可以欺凌佢。
苗：冇錯。噉啦啱啦，你就而家transition去個Patr⋯⋯
以：喂，唔爭在啦喂，厚面皮啲。
苗：嚟吖，嚟吖，嚟吖。
[jingle]
以：歡迎返到嚟《絮言・狂想》，喂，死喇，第幾集啊？喂，我哋係咪要決定啊？
靳：你可以講六十減一集嘅。
以：兩個都講晒。
苗：唔係，你咪講佢好想六十，跟住之後變咗六十減一。
靳：第六十集上集噉樣，然後上集同下集唔關事嘅。
以：我哋嘅嘉賓好想第六十集。
mek1：唔緊要啦。
以：歡迎返到《絮言・狂想》第五十九集⋯⋯六十集⋯⋯到時剪嗰時決定。
苗：笑死，okay喎喂。
靳：得，可以。
以：我哋決定唔到第幾集，我哋可能會掉轉個次序。我係以色列。
苗：我係三苗。
靳：我係靳尼啊。
以：我哋唔知點解呢排呢，有個新嘅習慣呢，就係搵啲嘉賓重複噉上嚟喎。即係好似我哋已經有Francine兩次啦⋯⋯
苗：係。
以：之後詹屎又兩次啦，其中一次就係上次個直播啦。其實呢，個直播拆咗兩集呢可以當佢三次嘅。
苗：係嘛啊？噉就三次㗎啦？三次係咪就變做客席主持啊？
以：佢有潛質喎因為佢住得咁近，係咪？不過呢，我哋今次又一樣噉樣啦，又帶咗一位舊嘅嘉賓出嚟，不過我信⋯⋯相信我呢，佢就唔會悶親大家，因為佢真係好犀利，同埋有好多好有趣嘅嘢講。
苗：即係你話之前嗰啲悶親大家。
靳：欸欸欸欸欸欸⋯⋯欸？
以：你自己解讀嘅，我冇話今次唔會悶親大家，我話唔會悶親大家啫，我冇強調係今次。自介。
mek1：大家好，我係阿mek1，唔知大家仲記唔記得我呢？
苗：記得！
以：嘩，好耐冇見喎！
mek1：好耐冇見喇。
以：幾耐啊？
苗：兩年喎。
mek1：兩年？起碼兩年啊，我覺得。
以：起碼啊。
mek1：係囉係囉。
靳：差唔多，差唔多兩年。
苗：係囉，你而家⋯⋯你而家已經去咗另一個國家𠻹咯喎。
以：差唔多兩年半喇。
mek1：係啊。
以：上次七月，二零二一年。
mek1：兩年半𠻹嗱？嘩，時間真過得快。
以：差唔多。
mek1：係囉上，次我哋見嗰陣時我仲喺英國，而家已經喺荷蘭喇。雖然隔咗個海唔係好遠，但係起碼⋯⋯但係都已經，係囉，喺唔同地方喇。
苗：有直船到㗎。
以：係囉，你幾時走咗過去㗎？
mek1：其實我係應該上一次冇幾耐之後就搬咗過嚟喇。
苗：哦～
以：哦，你就放棄咗我哋嘅宗主國喇。
苗：你呢個叛徒。
靳：仲要去埋第二個時區𠻹。
mek1：係囉，係囉，時區都唔同埋。
以：係囉，你去荷蘭做咩啊？High嘢呀，吓？
mek1：唔係，唔係。
靳：啊～
mek1：上次⋯⋯上次我哋話讀PhD，但係因為肺炎啦，所以就未搬過嚟。
苗：哦～
mek1：但係其實我本身就已經喺荷蘭嘅一間大學讀PhD㗎喇。
以：哦～唔係因為肺炎所以讀PhD。
mek1：唔係，唔係，係因為讀PhD，但係肺炎所以搬唔到過嚟。
苗：因為肺炎所以仲喺英國。
以：哦，即係你係滯留喺英國嘅，真係慘，辛苦晒。
靳：被困喺英國。
mek1：吓，冇咁慘，冇咁慘。
以：可以行山啊。
mek1：係囉，唯一冇得做嘅就係冇得行山囉，喺呢度，太平喇。
以：荷蘭係太平喇。
mek1：太平喇。
苗：天下太平。
以：太平天國。
苗：點啊？
以：你去行，我唔知喎，冇⋯⋯冇山行嘅咩，行⋯⋯行⋯⋯行河囉？
苗：可以行⋯⋯行泥吖嘛，聽過。
mek1：哦，噉我又唔會噉做嘅。
以：你係喺邊度啊？近唔近海㗎？I mean成個國家都近海嘅。
mek1：我係⋯⋯都算近海嘅，即係我唔係Amsterdam嗰邊囉，我喺海牙附近，喺Leiden，唔知呢，有冇聽過。
苗：好出名嘅學校嚟喎。
mek1：萊頓。
靳：好出名嘅大學嚟㗎喎。
苗：佢每年暑假都會有一個語言學校𠺢嘛，好似。
mek1：係啊，係啊，就係嗰度囉。
苗：定唔知語言學嘅嘢噉樣囉。
以：唔。
mek1：係啊，係啊。
以：我都聽過有朋友去過嗰度啊。
mek1：我都見過你哋朋友，我相信。
以：本身都係出名嘅大學城嚟嘅。
mek1：係囉，佢哋語言學系做好多印歐語系嗰啲研究啦，同埋非洲語言嗰啲研究嘅，但我就唔係研究呢啲囉。
苗：噉但係你兩樣都唔係喎？
mek1：我兩樣都唔係。
以：係囉，噉你喺嗰度做咩啊？
mek1：我⋯⋯我而家就都係做方言學啦，同之前⋯⋯係啊，冇變啦，但係我而家就喺度繼續研究粵語，繼續做方言學囉。
以：係喇，講開方言學呢，我哋要提下大家呢，阿mek1上次嚟傾偈呢，係幾時呢，就係已經係第十八集喇，即係真係三十幾集之前⋯⋯唔係喎，四十集之前喇。
靳：四十集之前喇。
苗：係啊。
以：嘩，我差啲計錯數𠻹，我仲以為我哋係五十頭喎，但係我哋就嚟六十喇已經。
苗：係咪啊？
以：噉佢上次呢就⋯⋯
靳：你⋯⋯你講歲數定係點樣？
mek1：係囉，我都聽到好似歲數。
苗：就嚟六十喇。
以：唔畀大家知先，呢個秘密嚟嘅。噉上次呢，我哋係有個上集下集噉款嘅。上集呢，就十七集，阿mek1未上嚟嘅，我哋就喺度傾咩叫方言啊，咩方言連續體噉樣啦。噉然之後第十八集呢，阿mek1就上嚟講啊，粵語嘅方言喎。噉如果大家想聽下佢介紹唔同嘅粵語嘅方言啦，即係同我哋母語好似嘅其他方言啦，噉都可以返去聽返喇。噉我哋會擺條link喺show notes嘅。
苗：方言究極睇，今日係方言完全睇。
以：係喇，噉阿mek1而家就繼續做佢嘅方言學嘅研究喇，係咪啊？
mek1：係啊係啊。
以：你係咪幫荷蘭Leiden嗰度開拓一個新嘅department就係做你嗰範？做印歐語，做非洲語，做埋粵語？
mek1：都想嘅，但係唔係咁容易囉。
苗：你嗰度本身多唔多人做關於粵語嗰啲研究啊？除咗你之外。
mek1：其實係冇嘅，但係就有人做啲同漢語聲調有關嘅研究囉。
苗：哦～但係唔關方言學事嘅。
mek1：唔係方言學，方言學其實真係得我同埋我嘅supervisor，我嘅導師一齊做囉。
苗：相依為命喎。
靳：Mhm，噉即係你搵啱咗個導師然後就去做方言學嘅嘢喇，所以就。
mek1：係喇，係喇係喇係喇。
以：其實讀博真係好緊要喎，要搵啱個老師。
苗：係啊。
mek1：啱啊。
以：可能緊要過你搵啱個環境。
苗：係啊，以色列好多感受。
mek1：係囉，我都聽過好多個案都係導師唔夾，或者⋯⋯即係，導師中途走咗佬嗰啲⋯⋯嗰啲個案啦⋯⋯
苗：哦～
mek1：不過呢個係另外一集嘅⋯⋯嘅內容嚟嘅⋯⋯
苗：另外一集。
mek1：有機會再講。
以：咦，幾時上嚟講讀博？
苗：讀博心得。
mek1：讀博。
以：噉你而家係讀緊啲乜嘢呢？噉即係⋯⋯
mek1：係嘅，噉上一次我就同大家講過粵語分區嗰啲嘢啦，噉其實呢，有一樣我冇講嘅就係我對嗰個分區其實就唔係太滿意嘅。
以：哦～
mek1：噉就有幾個原因啦⋯⋯
以：推翻咗佢。
mek1：噉我哋陣間可以一齊探討下點解啦。噉所以呢，我就運用咗一個⋯⋯一套比較新啲嘅方法啦，就係利用電腦去幫助我哋睇下究竟，其實方言分區⋯⋯即係究竟前人做嘅同我哋用電腦去分析嘅會唔會有相同之處，或者會唔會其實好唔同呢？噉依個就係我而家做緊嘅嘢喇。
以：咦，又關電腦事㗎？
mek1：係啊～
以：三苗，講啲嘢！
靳：電腦代表。
苗：喂，我唔係，我嗰啲假㗎！人哋真係電腦語言學，我嗰啲係⋯⋯唔係科學嚟㗎，嗰啲係engine嘢嚟嘅，即係嗰啲不無我正業嘅嘢。
以：咦？科學同engine嘅嘢。
苗：人哋真係探知宇宙真相㗎，人哋做科學，你估我哋呢啲咩？我哋呢啲⋯⋯
以：但係你係做遊戲嘅咋。
苗：賣嘢畀人嘅咋嘛，呢啲資本主義嘢。人哋係好高尚㗎。
以：哦，人哋係攞funding做嘅。
mek1：你會有錢租樓，我哋冇吖嘛，欸！
苗：嗱～
以：唉呀，哇，喂！
靳：嘩喺！嘩喺！
以：呢個feel到痛嘅？
苗：哦，拮到！
mek1：係，真話唔好講，真話唔好講。
苗：以色列有啲痛啊而家。
靳：太入肉喇，太入肉喇。
mek1：係係係，係。
苗：噉我想知道究竟點樣用⋯⋯
mek1：係。
苗：電腦去做方言學嘅嘢呢？即我自己想像就係，通常⋯⋯即係我喺大學度學呢一啲嘢嘅話呢，都係講⋯⋯可能corpus啊，即係啲語料庫啊⋯⋯
mek1：係。
苗：去幫助你去，可能搵一個語言有啲乜嘢嘅pattern，有啲乜嘢嘅特徵，噉樣。噉你嗰啲究竟有冇類似嘅嘢，定其實係好唔同嘅呢？
mek1：有相似嘅地方，亦都有啲唔同嘅地方啦。例如相似嘅就係，噉有時可能大家做出嚟嘅嘢，即係畫下地圖啊，或者⋯⋯
苗：正。
mek1：計下唔同嘅數啊，噉依樣嘢可以話係方法上嘅相似嘅地方，但係呢我哋用嘅資料，用嘅data就有啲唔同嘅，噉語料庫啦，通常就係用好多好多文本去然後分析佢哋例如唔同嘅詞頻啊，嗰類噉嘅嘢啦，但我哋用嘅呢，就係唔同字嘅讀音。
苗：啊～
mek1：即係我哋會喺啲⋯⋯
靳：Mhm。
mek1：方言調查報告裏面呢，就抽取某一啲字嘅讀音啦，然後我哋就利用呢啲噉樣嘅讀音再去分析下究竟「okay，方言同方言之間嘅差別究竟有幾多呢？」，然後再作進一步嘅分析噉樣囉。
靳：哦，噉即係你分析嘅就係嗰啲人講每一隻字嘅發音，而可能就係⋯⋯
mek1：係。
靳：即係專注係呢樣嘢多過，可能佢嗰個語法係點啊，或者佢啲用詞係點啊，噉樣。
mek1：喺我嘅研究裏面就係專注於，係囉，發音嘅⋯⋯嘅差別但其實當然啦，一個語言裏面正如你所講，亦都有語法啊，詞法啊⋯⋯嘅，嘅分別啦，好多唔同嘅嘢啦。

The rest of the transcript is available to Patreon members.