以：我開返窗先。
苗：嘭！嘭！呢度唔係美國。
靳：但係美國射擊冇牌喎。
苗：因為佢唔係喺學校度舉行吖嘛！
靳：啊，又好似啱喎。
以：乜撚嘢。佢哋嘅national sport啊，就係學校射擊。
苗：好黐線。
靳：蒙古射箭好似都冇牌。
苗：因為佢哋唔係喺馬上面射吖嘛。
靳：但係好似美國射箭有牌喎。
以：蒙古要馬上射箭先得。
苗：啱啊。
靳：要馬上射箭。
苗：馬上射箭！而家即刻！
以：噉英國要咩啊？落住雨先贏到呀？「哎呀！對唔住啊！我平時射箭嘅時候，慣咗有啲……有啲雨喺度打落支箭度，所以我會寫高啲㗎！」噉樣。
苗：係啊，所以射高咗。黐線。
[jingle]
以：歡迎返到嚟《絮言．狂想》第六十九集……
苗：Nice。
以：我係以色列。
苗：我係三苗。
靳：我係靳尼啊。
以：都nice。
苗：Nice。而家我哋錄緊係八月十號啦，係喇。噉就係如火如荼啊，有啲咩如火如荼啊？八月十號嘅時候。
以：我個廚房。
苗：你個廚房，係啊。
靳：出變嘅天氣。
苗：我個廚房就冇火嘅，我係電磁爐……唔係電磁爐，即係嗰啲電……用電嘅嘢嚟嘅。
靳：電熱爐。
以：嘩，好現代喎。
苗：係啊，我要火都唔得啊。因為成間屋係冇……冇煤氣嗰啲嘢㗎，想要都唔得。
以：噉你咪易過借火？
苗：唔……唔易啊，好難啊。借火好難㗎。成棟樓都冇啊。
以：如果你想……真係㗎？
苗：吓？噉你成棟……我……我嗰間嘢……
以：如果你想咩……借個火點個生日蛋糕嘅蠟燭，噉咪冇囉？
苗：噉咪打火機囉，要用。
以：係喎。
苗：打火機係……我係唔知點解成日都會燒到隻手㗎。即係我係……啲人點解可以咁勁嘅？用得。我一㩒呢，噉……噉你譬如你點蠟燭嘅時候，你咪會打斜嘅？嗰個……嗰個打火機。噉然之後去點蠟燭㗎嘛。但係打斜嘅時候，個火咪燒到隻手指囉。即係我唔明點解可以……點樣可以打到。
以：Skill issue。
苗：即係點煙就明啦。點煙就係㩒，然之後嗰個煙喺……喺個火上面㗎嘛。噉但係你點蠟燭嘅時候，嗰支蠟燭直嘅，噉你要揩個火過去，噉你個火……你個人一定要打斜，噉咪燒到隻手……即係所以我係唔好明點蠟燭係……係點樣。
以：慘。你生日點算啊？點唔到蠟燭。
靳：係……係咪要掉轉噉樣點？定係要用……
苗：掉轉，噉個火都係向上㗎嘛。
以：支蠟燭太直，拗攣佢。
靳：又好似啱喎。
苗：哦！將個蠟燭打橫插啊！噉就可以好似食煙噉樣，喺上面。
以：其實你有冇諗過可以噉樣呢？我都想suggest呢樣嘢，真心。
靳：即係點完個蠟燭，先至插落去。
苗：嘩！你好聰明啊！
以：係啊，why not。
苗：真係啱。
以：如果唔係你燒到手呢，就好……畫面好靚，就如火如荼㗎喇。
苗：嘩，成幅圖咁靚。有一千個字。
以：今日我係做靳尼嘅角色。
[03:07]
苗：好啦。噉除咗以色列個廚房之外呢，進行得如火如荼嘅仲有奧運啦。 噉如果大家而家聽緊呢，就應該就完咗嘅，奧運。噉就可能而家係有殘奧，或者我哋叫帕奧，或者帕運會啦，如果夠快嘅話。
以：（拍）帕運會。
苗：帕運會，係啊。我哋啱啱都拍運會啊，我哋拍咗三下手。
以：係啊，睇下邊個最準。
靳：嘩。
苗：邊個拍得最齊啊。但係你……以色列開頭㗎喎，一定係最齊。
以：永遠都唔齊。
靳：大家留言講下，邊個攞金銀銅牌？跟住我哋就可以頒獎。
以：好，大家而家喺留言度，頒個獎畀我哋！啱啱一開始邊個拍得最好噉樣。雖然你唔知邊個打邊個。
苗：嘩。播咩國歌？
靳：係喎！播咩國歌？
以：絮言個intro。
苗：三個人都係。
以：（唱）
苗：正。係。噉呢，如果大家係好忠實嘅聽眾呢，可能都會聽過我哋三年前呢，都講過奧運㗎喎。嘩，原來已經三年喇，個奧運。
靳：已經做咗三年。
以：唔係四年咩？
苗：四年？四年前發生咩事啊？
以：四年前發生咩事？我唔知喎。
苗：四年前，即係二〇二〇……二〇二〇……唔知啊。應該都冇乜……應該唔係好重要嘅事嚟嘅。
以：畢業囉！我畢業囉。
靳：冇咩事啫。
苗：噉應該冇其他嘢啦，係咪啊？
以：應該……應該冇乜嘢嘅。
靳：係啊，冇乜特別嘢發生。
苗：係嘞。噉係啦，四年前嘅奧運呢，就喺三年前發生啦。噉嗰陣時，我哋都講咗一啲好多唔同關於語言嘅嘢㗎。我最深刻呢，係嗰陣時講嗰啲國家嘅……喺開幕禮嘅出場次序囉，唔知大家記唔記得呢？
以：記唔記得個次序呀？背畀你聽！嚟！
苗：United States, Canada, Mexico……唔係。
以：日文唔該！
靳：仲要係日文嚟㗎喎！佢係跟五十音排㗎喎。
苗：記唔記得……大家記唔記得日文……即係根據日文排，第一個國家係咩啊？
以：係咪奧地利呀？唔係。
苗：唔係。
靳：我……我知係邊個！我知係邊個！
苗：你知嗱？到……畀以色列繼續估。
以：Ireland！
苗：爭啲。
以：Iceland！
苗：係Iceland嘅。
以：Yes！
靳：係希臘。
苗：即係個……係啦，噉希臘啦，係啦。噉但係希臘之後，用……用字母排，係冰島嘅，係喇。因為アイスランド嗰個ア……アイス係……ス係喺ル前面嘅，所以係Iceland係……係排第一啦。噉詳細呢，大家可以返去第十九集，就聽返我哋講，嗰陣時嘅東京奧運，關於語言嘅一啲嘢嘞。
以：係，應該睇到啲人黑人問號㗎，嗰陣時係。
苗：嗯，係啊，大部分……即係白人同黑人都好多問號啦，應該會。
靳：亞洲人有啲有問號，有啲冇問號啦。
以：大部分都係㗎喇，應該都。
苗：有十三億人都問號。十四億啊。
以：係啊，十四億個問號。1.4 billion reasons why，呢個係。
苗：仲多過十萬個為甚麼。十四億個……如果大家冇聽到我哋第十九集呢，我哋再講一講啦。即係奧運出場嘅次序，究竟係點樣排嘅呢？大家知唔知道？第……一開始通常都係同一個國家㗎。
以：希臘。
苗：係嘞，一開始…… 一開始係希臘，因為佢係……或者希laap6啦。
以：希lip6。
苗：因為佢係現代，甚至乎古代呢個奧林匹克嘅……嘅始創嘅地方啦，噉所以佢哋都係會行頭嘅。
以：哦，古代！
苗：係嘞，因為……
以：裸體嗰啲！
苗：係啊，Olym……好基嗰啲啊。Olympic呢，因為本身呢個地方係……係咪Mount Olympus啊？奧……咩奧林匹斯山啊，喺……喺希臘嘅……
以：唔係Olympia……
苗：Olympia呀？唔知啊。
靳：係Olympia。
苗：Olympus係相機嚟㗎喎。
靳：O……Olympus都係跟嗰個山嘅……
苗：都係啦，都係啦。總之喺嗰個山上面喇，唔知點樣啦。即係嗰個歷史就係類似噉樣啦。噉所以就同……呢樣嘢同希臘好大關係啦。噉而即係好似國際奧委會嘅會歌都係希臘文嚟㗎喎。
以：都make sense嘅。
苗：噉跟住呢，通常呢，係希臘之後，就會係嗰啲國家，跟嗰個主辦國嘅語言嘅ABC，即係所謂ABC嚟排啦。然之後最後呢，就會係主辦國囉。或者係嚟緊嘅主辦國囉。噉所以今年呢，最尾出場嘅……尾三有澳洲啦，因為佢哋係二〇三二年啊，奧運嘅主辦國啦。跟住之後就美國啦，因為佢哋係下一屆，二八年嘅奧運主辦國啦。最後先至係今年法國，噉樣嘅。
以：即係跟倒轉嘅時序噉樣。
苗：係喇，係喇。即係總之最後最後呢，就係今屆嘞。噉所以好搞笑嘅就係，〇四年，記唔記得係邊個國家搞嘅奧運啊？
以：係……係咪雅典啊？
苗：係啊。
靳：係希臘吖嘛。
以：〇四年就係希臘雅典奧運。噉你估下佢哋嗰一年……
以：哦！咦？
苗：你估下佢哋當年係點樣嘅？點樣排嘅呢？哦。
靳：一……一半喺最前，一半喺最後。
苗：開估，噉答案呢，係擺最後嘅。因為可……我唔知點解啦，可能因為即係擺最後嗰個……嗰個儀式感重啲啦，即係：嘩，最後……
以：重要性。
苗：最後，即係個……個儀式最後，嗰啲當地嘅觀眾，都好開心好興奮啊。
以：壓軸！
苗：嘩！正啊！希臘啊！噉樣。之前睇啲comment話……啲人話佢行兩次，原來假㗎囉。
靳：跟住香港係尾二啊。
苗：都好勁喎。因為咁啱香港嗰個……嗰個字母係排喺好後㗎嘛。佢係嗰個Χ啊。
靳：係Χ。
以：哦！
苗：Χονγκ Κονγκ，Κίνας。噉所以就係……
以：邊個啊？交叉呀？定係……
苗：係啊，交叉啊，交叉啊。佢唔係/ksɔŋ/囉，好唔好？係/xɔŋ/。
以：哦。啊係，係，係，係。
苗：噉即係希……古希臘文係/kʰɔŋ kɔŋ/喎，係咪啊？
靳：係啊，係啊。/xɔŋ kɔŋ/囉，係啊。
苗：OK。/kʰɔŋ/。
以：古希臘嘅香港係點樣㗎？
苗：古希臘嘅……
靳：/kʰɔŋ/……/kʰɔŋ kɔŋ/，/kʰɔŋ kɔŋ/。
苗：冇嘢嘅，應該。係喇，噉嗰年就係噉啦。噉所以今……今年呢，就都係差唔多嘅。噉今年就係希臘開頭啦，但係佢第二呢係呢個奧林匹克嘅……叫做難民隊啊，Refugee Olympic Team。
以：哦！難民隊！
苗：係喇，第二隻就係難民隊啦。
以：即係都係特別隊嘅。
苗：都係比較特別嘅嘢啦。噉之後就由阿富汗開始啦，應該好多年都係阿富汗開始㗎。因為佢係AF字頭啦。
以：係吖，係吖。
靳：係吖。都好make sense。
苗：噉之後……
以：A同F都……喺好多語言都係有嘅聲嚟嘅。
苗：係嘞。噉之後就都係用法文噉樣去……去排啦，噉所以有啲平時唔會係喺……喺開頭嘅國家，都會喺開頭啦。例如南非啦，因為法文嘅語序係Afrique喺前面。
以：啊，非洲南。
苗：跟住或者德國啦，德國Allemagne，或者佢係A字頭啦，因為德國係。噉之後一路一路噉樣排啦。跟住去到最尾呢，就其實都係一樣嘅。都係……都係Z字頭嗰啲國家。
以：仲有啲好似U字頭嗰啲，都去咗O字嗰度囉。
苗：哦！因為嗰啲咩Ouganda……
以：咩烏干達嗰啲啊。
苗：Ouganda係……係啊，Ouganda同Ouzbékistan。
靳：烏干達就去咗O。
苗：/uzbekistɑ̃/？唔知啊。噉就因為佢係串OU啦，/u/啦，就唔係/y/啦，噉所以佢就係排喺O字嗰度喎。有咩特別啲㗎？有冇啲比較奇怪嘅……

The rest of the transcript is available to Patreon members.