以：就算我去字典查呢，英國手語都係得好似兩三個字，係用呢個手勢。包括就係「假」，同埋「放假」囉。咦？咁啱都係個「假」字嘅？咦？咦？咦咦咦？
淩：哦！係喎！係喎！
苗：假！
淩：唔通BSL係嚟自廣東話嘅？
以：BSL係嚟自中文字嘅。
[jingle]
以：歡迎返到嚟《絮言．狂想》第七十集啊！我係以色列。
苗：我係三苗。
以、苗：咦？
以：咦？
苗：靳尼呢？
以：爭緊個嘅？
淩：喂……
苗：吓？
以：咦？喂！我哋漏咗靳尼呀？
苗：你係邊個啊？
以：我哋漏低咗佢啊！點算啊？
淩：我係良淩啊！
以：咦？你又喺度嘅？
苗：吓？你……
淩：係啊！我喺度啊！
以：哈囉，哈囉！
苗：吓？你唔係靳尼喎！
淩：哈囉！係啊，我喺度啊，靳尼唔喺度啊。靳尼……唉，拋棄大家。
苗：佢已經離開咗我哋喇。
以：唉。
苗：係啊，佢呢，以後呢，就唔做喇。
淩：永遠離開咗。嘩，點算好？
以：唔係，唔係。佢唔係永遠離開咗。佢……佢畀我哋home alone咗。
苗：佢今晚離開咗。
淩：無……無限期退出樂團。
以：有限……好。好嘞，唔知大家記唔記得良淩呢？可能好忠實嘅聽眾呢，就會記得喇。
苗：非常忠實。
以：因為都……嘩，幾耐喇？三年喇喎。
苗：唔係……個位數呀？
淩：兩年、三年。
苗：個位數定係十位數呢？集數嚟㗎，良淩上嚟係。
以：十三，十三，係嘞。
苗：十三呀？嘩。
以：因為呢……係嘞，十三集。阿良淩呢，十三集嘅時候呢，就嚟過我哋《絮言．狂想》嘅。即係都已經係五十幾集之前嘅事嚟㗎，嘩，兩年囉，五十幾集咪。差唔多囉。係啊。
苗：係啊。
淩：Time flies，時間烏蠅。
苗：你取代咗……取代咗靳尼講爛gag呢個地位。
以：已經即……即時……即時做咗靳尼嗰份工嘞。唉。
淩：好……好代入到啊。
苗：You read the memo.
以：還原度100%，係，包括埋啲爛gag。係啊。
淩：笑。
以：係喇，大家記唔記得良淩上次嚟嘅時候，係同我哋傾乜嘢呢？唔記……唔記得。
苗：（台）講台語。
以：係啊，（台）講台語。
淩：（台）講台語。
以：我哋上次開頭係用台語添㗎喎。
苗：係啊，個intro。
以：係啊。
淩：（台）你好，你好。
以：（台）你好，你好。阿良淩仲有冇（台）講台語啊？你而家好似成個人都喺唔同地方喇喎。
淩：（台）有啊。著啊，著啊。我有（台）講台語啊，因為好多台灣……台灣人喺呢度啊。
以：你喺邊度啊？
淩：喺……
苗：「呢度」係邊度啊？
淩：我喺東京。
以：喺東京？
淩：我喺東京啊，喺江戶啊。
以：喺（台）東京？
苗：我哋unlock咗一個新嘅時區啊。
以：係喎。
淩：係啊，喺唔同時區啊。
苗：我哋有史以嚟最東嘅時區啊。
以：真係喎。
苗：我哋最西係美國中部時間啊，係咪啊？最西嘅時區，我哋試過。
以：係，係。未試過西部。
苗：噉所以而家呢，就係……係嘞。然之後最東呢，就去到……去到東京啊，真係好東啊。
以：嘩，犀利啊。好似解鎖咗新嘅地圖噉樣。
淩：解鎖多一個囉。
以：係，我哋《絮言．狂想》真係好國際化啊吓。我哋真係好多地方都錄過喇，周圍都有講廣東話嘅語言迷啊。
淩：真啊。
苗：係啊，暫時都仲係淨係北半球嘅，第時呢，唔知會唔會有南半球添。
以：係啦，點解你喺東京又會有揾到咁多機會講台語嘅？唔係應該好……好少人㗎咩？呢個語言咁少人講。
淩：其實都真係好多人講嘅，即係……即係雖然個印象係感覺好似：啊，好似後生仔唔識講台語喇。但係其實呢，我喺東京見到……我諗應該超過十個台灣人，應該可能有冇廿個呢？反正十零廿個啦。噉你當二十歲，去到三十歲，去到三廿幾歲都有啦。其實係應該全部都識台語囉。
以：全部都識呀？
淩：係啊，我都覺得好驚訝。
以：我好驚訝啊。
淩：全部都識喎，全部……即係最差都係識聽，跟住識講少少囉，最差。跟住有啲係識聽，跟住講得……都講得好好囉，即係台灣人，台灣同學噉樣。好勁。即係我都……我自己都改觀咗。
以：真……真係喎。噉你覺得比起我諗台灣嘅福佬人嘅average嚟講，係咪算係高啊？因為你本身都識好多台灣人啦，噉所以你覺得呢個係正常嘅現象吖，定係係特別啲嘅呢？Somehow你喺日本識到嘅台灣人係特別勁嘅，呢方面。
淩：可能有幾個因素嘅，我諗到嘅。即係譬如其中一個可能係因為會去日本嘅台灣人，都係台語家庭嘅人比較多。
以：係？
苗：嗯，竟然係。
淩：即係有少少……即係唔一定啦，噉但係呢，台語家庭嘅台灣人呢，係親……即係偏本土，同埋即係你當偏美日……美國、日本少少啦。
以：OK。
淩：噉如果係講其他話嘅台灣人，佢可能係偏另外一邊少少啦。
苗：哦。
以：嗯，咁得意呀？
苗：即係譬如客家嘅台灣人係唔同嘅？
淩：我覺得有少少影響嘅，係，係。
以：或者啲外省人。
淩：係嘞，外省人就……即係……噉鍾意日本嘅台灣人應該都係台語家庭最多囉。所以……噉會去台……會去日本留學、會去日本做嘢，都係佢哋多囉。同埋就有機會係……我哋畀台灣媒體洗腦？
以：即係點啊？
淩：因為媒體佢都淨係呈現出講普通話嘅人出嚟，噉但係其實係好多人係會日常都講台語，但係媒體可能就主力都係畀……播……即係呈現出普通話嘅人噉樣。噉所以我哋就會覺得：啊，好似大家都講普通話，冇乜人講台語。但係其實唔係囉，其實現實生活中，可能係好多人講台語囉。
以：即係我哋作為外國人……唔係……外地人，係嘞，外地人嘅印象係唔係好準確。同時間可能你喺日本嗰個……個stat會偏咗啲，係嘞，就係因為佢哋本身……
淩：係，係。同埋我聽過一個台灣friend嘅……即係佢都係語言迷嚟嘅。佢都……噉佢同我講過一樣嘢呢，就係因為佢覺得好多台灣人去到其他地方，佢好想講台語，唔想講普通話。所以會……都會有少少影響囉。
以：哦！係喎！係喎。
淩：即係佢覺得呢個嘢更加彰顯到佢嘅身……身份。
苗：即係佢自己身份。即係可能佢講普通話呢，就同其他地方嘅人呢，就有啲重疊喇，嗰個身份。所以佢就可能喺……尤其喺外國呢，就唔想同講嗰個語言嘅羣體接觸得咁深啦！
以：或者畀人當係同一個羣體噉樣。
淩：係啊。，即係可以有少少……區隔少少囉，即係「我同佢係唔同嘅！」噉樣，「我哋係講呢隻話」嘅。
苗：我都諗到另一個原因呢，就係會去……因為我知道良淩你係去日本讀日文吖嘛，係咪？
淩：係。
苗：噉會去讀日文嘅人，通常可能佢對語言本身有啲興趣啦，噉所以佢可能……佢台語嗰個程度都會高啲囉，即係可能台語唔叻嘅人，本身就對語言冇乜興趣，噉所以就唔會走去學日文嘞，噉樣。所以你就咁啱識唔到一啲會去學日文，但係又唔識講台語嘅人囉。
以：嗯，有個連繫喺度啊，對語言嘅興趣。
淩：有機會。跟住同埋就係台語入面都有啲日文字啦……
以：係吖，係吖。
淩：噉都有啲影響嘅，即係唔係話好大囉，但係我覺得都有。
以：我一開始……你講嘅時候，我諗緊嘅係會唔會係出得國嘅，本身都係有啲……即係我想講國際視野，但係即係應該話佢係有啲唔同文化、唔同語言噉樣嘅……
淩：薰陶。
以：廣啲嘅視野囉。係啊。即係譬如話我喺度識嘅美國人，都唔係我哋即係刻板印象裏面嗰啲自我中心嘅美國人嚟嘅，係嘞。即係出得國，本身已經係諗嘢嘅方式係……
淩：篩咗一批。
苗：有passport同冇passport嘅美國人，係好大分別㗎。
以：係啊。
淩：冇passport嘅日本人多過有passport嘅日本人五倍。
苗：哦，嘩。噉即係……即係點啊？得兩成人有passport呀？
以：咩啊？六份一啊。
淩：十……十七percent嘅……十七percent嘅……
以：唔識計數！
苗：喂，差唔多咋嘛！兩成、十七percent……唔好蝦我。
淩：十七percent先有囉。勁……勁恐怖喎，見到嗰陣。
淩：係囉，係囉！噉你最近有冇同人講台語啊？
以：我喺英國就少啲嘅。真……其實冇囉，係冇囉。即係我有少量台灣朋友啦，噉但係都係（官）「我不會說台語啦」嗰啲囉。即係直接……
淩：哦，你要堅持同佢哋講台語嘅。
苗：哦，可能去日本同去英國嘅台灣人係唔同㗎喎。
以：可能唔同，我唔知。但係我個sample size好細嘅，因為我真係好少台灣朋友，係喇。噉所以可能係咁啱啫。因為可能佢本身屋企都唔係講。噉所以……
淩：想講我都……我呢度都有啲台灣friend，佢哋一開始係同我講佢唔識講台語㗎。
以：係。
淩：因為我唔識講普通話啦。噉我同佢講台語啦。
以：呢個咩flex嚟㗎？我都係，其實。
淩：噉跟住呢，我keep住講……我keep住講台語啦，跟住佢哋係其實識聽啦，跟住佢哋最後呢，佢哋都開口講囉。
以：嘩！你將佢逼咗出嚟喎！犀利喎，良淩。
淩：其實佢哋係識講㗎囉！佢哋識講，跟住但係佢哋話唔識講。我就覺得：嗯，都幾神奇。

The rest of the transcript is available to Patreon members.