苗：歡迎返到嚟《絮言．狂想》第七十一集啊！我係以色……唔係，我唔係以色列，我係三苗啊。
以：我係以色列啊！我先係啊。
靳：我係靳尼啊。咦？點解呢度好似仲有第四個人喺度嘅？
苗：第四個人？
以：你望緊邊度啊？
苗：你個……個mon有第四個人囉，你隔籬多個人。
詹：第四個人就係我喇！
靳：咩人嚟㗎？嗰個。
苗：未見過嘅？喂。
詹：我而家就係同以色列係一齊嘅。
苗：哦，你同以色列一齊。
以：喂，喂，唔好亂講嘢！
苗：恭喜晒！
靳：你同以色列係一齊。
苗：你同以色列一齊喇。
靳：恭喜晒，恭喜晒。
詹：一齊喺同一間房入面。
以：係喇，我哋喺同一間房入面。我哋……
苗：嘩，喺同一間房入面添呀？
以：開咗間房喇，係喇。
苗：嘩，我哋都四個試過開房啦。
靳：我哋都係……係喇，一齊。
苗：我哋喺布達佩斯。
以：都唔係第一次我哋喺一間房度錄喇。
苗：喺間……一間房度錄。呢個我哋第……
以：第卅八集。
苗：嘩之前阿詹屎呢，就喺第卅八集，係咪第一次同我哋傾偈啊？跟住之後，佢都出現過都好幾次啦，包括喺呢個布達佩斯嘅兩次……兩集直播。其實係一次嚟嘅，不過我哋分咗做兩集啫。
以：上集、下集。
苗：冇錯。
詹：啱啊。
以：就係因為我哋一齊去嗰個旅行啦，係啊。
苗：好。今日呢，點解我哋請埋呢個阿詹屎嚟玩呢？因為呢，我呢，之前呢，就其實諗住喺布達佩斯，就玩呢一個問答遊戲嘅。噉我就寫咗啲題目啦。噉但係嗰陣時呢，就最後都冇時間去錄啦。噉而家呢，就終於……終於終於呢，就可以同大家一齊玩呢個叫做……
以：過咗咩啊？十個月、十一個月嗱？好似。
苗：係啊。一年喇，一年之後。
靳：未夠一年。
詹：冇玩到係因為我哋飲得太醉嘅關係。
苗：係你啫。
以：宿醉啊，呢個係……仲要係。
苗：噉喺我哋玩緊嘅同時呢，大家都可以跟住一齊玩，睇下你哋自己答得啱幾多題喇喎。呢個呢，就係我哋最後一屆嘅超級無敵搶口王。呢個名唔係我改嘅，所以呢，有咩投訴呢，就……
詹：搶口。
苗：就同阿靳尼講嘞。噉呢一個問答遊戲……呢一個問答遊戲呢……
以：噉又卸膊嘅？
苗：唔係平時嘅問答遊戲。噉呢個就係一個競技問答嘅遊戲。噉呢一個競技問答呢，喺好多國家，其實都有好長嘅歷史啦。噉但係我接觸到呢個競技問答第一次呢，就係中大嘅競技問答研究社，我唔知叫咩競問研啊，好似叫做。噉呢，佢哋就介紹咗……
以：點解我唔識嘅？我哋兩個中大㗎喎。我哋都唔識喎。
苗：因為佢哋今屆……今年第四屆啫，噉所以應該你哋嗰陣未有。
靳：暴露年齡。
以：噉太老嘞，唉。
苗：冇錯，係啊。噉競技問答嘅特色呢，就係點呢？就係通常佢嗰個答案呢，都會非常之短嘅，一個term嚟㗎啫。可能係二至五個字之……左右嘅term啦。但係呢，條問題呢，就會好長㗎喎。噉嗰條問題呢，通常都會有三至四個提示啦，噉嗰啲提示呢，就會由難嘅開始，漸漸漸漸噉去到比較容易嘅提示。噉參賽者呢，呢個就係重點嘞，參賽者呢，就係可以喺未聽完題目之前呢，就㩒掣搶答嘅。噉所以呢，喺除咗識答案之外呢，仲要㩒得快嘅。尤其係本身一啲比較容易嘅題目，噉大家就要更加反應快，去㩒掣搶答嘞。噉呢，今次呢個超級無敵搶口王呢，嘅獎金獎品非常豐富，其中包括Triolingo超級市場送出Trio貓頭鷹魚蛋一百磅、Anki送出實體flashcard一萬張、九方中文輸入法視窗Window 10專業版，價值五百五十蚊，同埋何文匯教授編著嘅《粵音平仄入門．粵語正音示例》一本㗎。好。
詹：正啊，我要魚蛋啊！
以：真係好興奮啊！好興奮啊，嘩！
詹：我好想食Duolingo啊！
苗：係咪好多……係咪好多獎品，好興奮，係咪好想贏呢啲咁有用嘅獎品呢？
以：BB Duolingo。
靳：我仲以為會有花之戀壽司添。
以：我想食花之戀多過食Duolingo。
苗：呢個侵犯版權嘅……
以：Trio……Trio……Triolingo。
苗：因為花之戀壽司係真係好嘅獎品嚟嘅，所以係冇嘅，呢度。我哋冇咁多budget。
以：咩意思啊？你對九方有咩意思啊？
苗：噉如果大家想我哋多啲budget嘅話呢，噉你就去我哋嘅Patreon，做我哋嘅支持者，噉就可以……就可以令佢哋贏得一啲更加靚嘅獎品喇。
以：我係做炮灰㗎咋。所以呢，應該九方，或者貓頭鷹蛋，都已經……
苗：冇，係咪啊？
以：無緣喇。
詹：貓頭鷹蛋。
以：最想食貓頭鷹蛋。
靳：貓頭鷹魚蛋咋，唔係貓頭鷹蛋。
以：貓頭……貓頭魚蛋……咩話？
苗：有幅圖㗎，去show notes畀大家睇下。
靳：畀大家睇，之前喺咩凍肉舖見到有呢個Duolingo嗰隻貓頭鷹。
苗：Duolingo魚蛋。
靳：變咗魚蛋。
以：哦，好。我哋畀返圖人睇吓。
苗：你哋試下個掣先喎，你哋幾個都。
以：好，我㩒，㩒。有冇㩒到啊？
靳：我㩒。
苗：OK。跟住我㩒correct，噉就係以色列有一分喇，佢最快。
以：好，我啱咗。好嘢！唔好清咗，我啱……一分。
苗：如果答啱咗嘅話。清咗佢先，即刻。
以：使唔使試一次鬥快啊？
苗：好啊。我……我一二三，然之後三嗰下，你哋試下㩒，噉我睇下delay點囉，係囉。
以：On three, OK.
苗：好。一，二，三。
靳：差唔多。
苗：OK。嘩，好……嘩，今次好少delay喎。十millisecond咋，最多都係。
以：噉得啦！噉得啦！噉靳尼冇蝕底啦！
苗：噉好啦。噉test完之後呢，好，我哋正式開始嘞。嗱，噉呢，我喺讀問題之前呢，就會講「第幾題」噉樣呢，你哋就嚟嘞。好，正式開始嘞。
[05:18]
苗：第一題：最初由南北朝學者提出嘅漢語音韻學概念之一，本來係上古漢語嘅一種音節，唔少南方漢語都有保留，但係現代標準漢語已經消失……以色列。
以：入聲。
苗：入聲係啱嘅。
以：嘩，竟然。
詹：黐線！
苗：全條問題就係：呢個對應粵語傳統第七、八、九聲嘅一種聲調叫做乜嘢？噉答案就係入聲嘞。噉好，第一題呢，以色列就突圍而出。
以：咦，竟然。
苗：首先呢，就攞到第一分。噉大家熱身啦，即係都係一啲……一啲比較簡單嘅題目啦。
靳：呢條算簡單㗎？原來。
苗：係喎，但係其實未去到……未去到最尾，已經估到喇喎。已經估到係乜嘢喇喎。都好犀利喎。係咪啊？
詹：簡單，但係你……要估你問咩囉。
苗：大家估唔估到？即係……即係就係要訓練大家呢一啲噉樣嘅……
以：鳩估囉。
苗：嘅反應啊。係啊。
靳：你係咪會讀埋條題目㗎？之後。
苗：我會讀埋題目嘅，我會讀晒個題目嘅，最後，都係。係啊，即係畀大家觀眾聽到成條題目係乜嘢。好，噉就第二題嘞。
[06:22]
苗：독일、Vācija、a’ Ghearmailt、Saksamaa、Þýskaland……靳尼。
靳：德國。
苗：係，德國係啱嘅。噉全條問題繼續啦：Đức、Alemania、Deutschland，以上嘅外語字係指邊一個歐洲國家？噉答案就係德國嘞。
以：唉，頂，咁容易嘅？
苗：呢條問題，我點解噉樣出呢？就係因為……
詹：咦！又係估問題系列。
苗：德國係好多唔同嘅外語名，都係非常之唔同嘅。噉所以……係喇，呢度有好多唔同嘅……
以：做咩唔加埋Vokietija啊？屌你。
靳：Vokietija。
苗：加埋咩話？
靳：Vokietija。
以：你畀Vokietija我即刻答到畀你。
詹：Vokietija係乜嘢啊？
苗：吓， 我就係特登唔加囉。
以：立陶宛文。
苗：我就係特登加拉脫維亞文，但係我冇加立陶宛文。
以：哦，係喎！因為你set，你知道……哎啊！
苗：第二個就係拉脫維亞文喇，Vācija。
以：呢個就係出題嗰個太熟悉我嘅弊處嘞。
靳：我就係聽到Þýskaland之後，就㩒咗喇。
詹：拉脫維亞文嗰個好似Croatia啊。
苗：陣間一題……係啊，一題波蘭文都冇啊，你唔好諗喇，係啊。
靳：專登恰你。
以：喂！搞錯啊！
苗：威爾斯文嗰啲乜都冇啊，你唔好諗喇。
以：有冇Gaelic？我想知道啊。
苗：你陣間咪知囉。
[07:32]
苗：第三題：生於一八五九年嘅俄羅斯帝國，被聯合國教科文組織選為二零一七年嘅傑出人士之一，母語係俄文同埋意第緒語……以色列。
以：Zamenhof。
苗：係啱嘅。噉成條問題係：呢位創造咗人工語言世界語Esperanto嘅波蘭眼科醫生係？
詹：我好似慢你少少啊！
苗：噉佢嘅……佢叫做L. L. Zamenhof啦。噉其實佢個名，係有好多個寫法嘅。所以佢係冇全名，佢係L. L.，因為佢好多個語言，每一個語言個名都唔同㗎。噉所以直接用initial就算。
以：/ɬ/ Zamenhof。
靳：犀利，真係。
苗：係一個識好多語言嘅人。
以：OK。我可能要進取啲啊。我有啲……我有啲保守啊，我而家。
苗：哦，都好犀利喎。阿……暫時……噉阿James就要繼續加把勁喇。
詹：我覺得我會食蛋囉。
苗：唔會嘅。仲有好多題，仲有好多題。
詹：係，繼續。
以：食蛋係贏喎！食……食魚蛋係贏。
詹：究竟係贏定輸呢？
苗：係喎，贏食魚蛋。
靳：可以食晒啲Triolingo嘅魚蛋。
苗：乜鬼嘢。Triolingo，黐線。
[08:39]
苗：OK，好，嚟到第四題嘞。例子有廣東話嘅paa、baa，法文嘅pa、ba，印地語嘅pa、pha、ba、bha，喺國際音標用斜線表示，請問呢一個指「喺某特定語言入面最細，但係可以分辨意思嘅……靳尼。
靳：音素。
以：我唔識中文啊。
苗：係啱嘅。其實可以答英文嘅，你答phoneme都係啱嘅。
以：可以答英文嘅！OK，OK，OK，得。
詹：個問題係咩啊？
苗：係可以嘅，可以嘅。
以：呢個益你。
苗：中英文都accept嘅，係。係嘞，噉呢一個成條問題，就係……係啦，請問呢一個指「喺某特定語言入面最細，但係可以分辨意思嘅聲音單位」，呢個語言學概念係乜嘢呢？噉就係音素，或者叫音位啦，就係phoneme啦。噉啱啱……即係條題目都有幾個例子啦，譬如廣東話嘅baa paa呢，係用送氣嚟分㗎嘛。但係英文就唔係用送氣嚟分嘅。噉呢一個語言學概念……係啦，都非常之重要啦。
以：我以為你講爆破音咋。
詹：係囉，我都以為個答案係bilabial……
靳：我以……係，bilabial嘅plosive呢？噉。
苗：嗱，所以呢，條問題係……
以：我淨係諗plosive啊。
苗：條問題有時唔可以……唔可以太早㩒㗎，因為後面可能會有其他clue。
以：所以唔可以鳩估㗎，係啊。
苗：唔係真係可以鳩估。所以有時唔肯定，就要聽埋佢喇。
[09:57]
苗：好，第五題：由香港教育大學資助，喺二〇二三年推出，特色係有香港少數民族語言嘅翻譯，呢一個……靳尼。

The rest of the transcript is available to Patreon members.