靳：即係好似你個法文沉睡咗噉樣，你要喚返醒佢。
苗：係啊，係啊。係啊。
以：咁熟面口嘅？呢個比喻。
靳：睡公主。
以：要錫，係咪啊？
苗：以色列就係睡公主喇。
以：所以……所以想喚醒返法文，就要錫佢喇。
苗：就要……要French囉。
以：要French佢嘞。
靳：要Fr……嘩。
苗：係喇，噉就會醒返。
以：我哋廣東話叫打Karen，係咪？
靳：打Ka……Karen好慘。
苗：唔好……唔好打Karen啦，好慘㗎。
[jingle]
以：歡迎返到嚟《絮言．狂想》第六十八集，我係以色列。
苗：我係三苗。
靳：我係靳尼啊。
以：話說我成朝好忙啊。我喺Facebook上面呢……
苗：吓？忙Facebook？
以：三苗你係咪見到啊？
苗：我見到啊，你喺Facebook度畀人屌吖嘛。
以：畀人圍插啊，天下圍攻喎。
靳：好慘啊！
苗：圍攻喎，你。點算？你發生咩事啊？你解釋下先啦。
以：我喺一個斯拉夫語嘅Group裏面，噉有個人喺度問緊波蘭文嘅語序啊。佢問點解啲形容詞會跟住個名詞喎。噉其實問點解就冇意義嘅，我不嬲都係噉講，係。唔好問點解，問點樣。
苗：啱啊。係……係冇……冇意思㗎，冇原因啊，其實。
以：冇原因嘅。噉但係我就嘗試解釋啦。因為呢，我見到好多啲垃圾嘅答案，就係話……有啲人話：唔係！Which is錯嘅。
苗：唔係乜嘢啊？即係點啊？
以：唔係形容詞喺後面嘅。
苗：哦，即係佢話係擺……
以：噉佢就梗係錯啦。
苗：係……係可以㗎嘛。
以：係啊。Gaslight啊，直情。
苗：可以擺後面。
以：之後有人話咩因為拉丁文啊，有人話……
苗：吓？拉丁文都關事？
靳：所有歐洲語言都係由拉丁文嚟㗎嘛，你唔知咩？
以：總之好多人就話個問題問錯囉。但係……即係……或者好多人就話個語序係唔緊要嘅。噉於是我就話：嗱，我真係喺教科書讀過嘅。係有意思嘅。就係如果……阿三苗可能知道，如果個形容詞係喺個名詞前面呢，噉即係你係形容嗰嚿嘢係點樣嘅。如果個形容詞喺後面呢，就係形容緊嗰樣嘢係咩嚟嘅，本質係咩嚟嘅。
苗：有冇個例子啊？
以：我畀咗個例子。嗱，呢個例子呢，我就係畀人插嘅主要原因。但係呢個例子，係我喺教科書度抄出嚟嘅，所以唔好……嗱，我有得賴嘅。就係……
苗：唔好賴我，賴教科書啦。
以：波蘭文裏面如果講「車運動」，噉就係講緊跑車，因為佢係一架整畀你愛嚟做運動嘅車。我都唔知點解叫運動啦，噉但係OK。噉但係如果係「運動車」呢，噉就係一架車，望落去好型、好有運動feel。
苗：好sporty。
以：係嘞。噉我就畀人圍插嘞。
苗：即係如果佢擺前面，純粹係一個感覺嚟㗎啫，即係佢係有呢個feel，但係佢唔係呢架車嘅本質，佢呢架車唔係用嚟做運動，或者即係sport嘅。但係如果擺喺後面，就係呢架車係一個sport嘅車囉。即係佢係……係喇，for sport嘅。
以：其實我用呢個例子，係因為呢一個例子，嗰個形容詞呢，可以做晒兩個功能。噉但係其實有啲好啲嘅例子呢，噉就係個形容詞一定係跟後面，或者一定跟前面嘅。譬如話，「靚女」，噉個「靚」一定喺前面嘅。或者「足球」，呢個就係我個朋友嚟打救我，佢個例子就係足球。波蘭文就叫「球足」，因為腳呢，係……係影響緊呢個咩波嘅本質。噉所以就係擺後面嘅，係嘞。噉如果你唔講「足」呢，就變成第二種波㗎嘞，係喇。我覺得好有趣嘅，噉但係好多母語者就喺度話：唔係喎，我哋……
苗：兩個都得㗎嘛！
以：啲語序好自由㗎喎。都得嘅喎。即係我調轉講冇所謂㗎喎。
苗：係咪又係學校學㗎？即係學校啲人教佢：波蘭文啲語序好自由㗎，乜都得㗎！所以佢就內化咗呢樣嘢呢？
以：其實可能係純粹佢冇學過。即係好似譬如話英文有個好出名嗰個規則，你哋知唔知我講緊邊個啊？
苗：咩啊？I before E……
靳：有幾個㗎喎9
以：啲形容詞次序嗰個啊。黐線㗎嘛。
苗：有次序㗎嘛。都啱嘅，嗰個係，係。嗰個就係一啲母語者唔察覺，但係自己會識用嘅一個rule囉。
以：係啊。即係好似咩big black dog噉樣，你唔會black big dog㗎嘛。我都唔記得……我都唔識背成個，呢個我都內化咗，所以我會get到。噉但係呢個係好多啲人喺學校唔會學，但係……可能學英文作為外語，就可能會學。
苗：係啊，好緊要啊。
以：或者係一啲語言迷就會喺度研究呢啲嘢囉，係喇。
苗：我嗰陣時學校係都有學過㗎喎。係有老師提過呢樣嘢。
以：我都好似有學過。
苗：但係就唔係好focus。
以：阿靳尼有冇學過呢個啊？
靳：我好似冇學過喎，呢個真係。
以：你冇學過。
靳：我冇學過。
苗：嗯，要靠自己去……去參透。
靳：探索。
以：大家喺留言講下有冇學過？呢啲形容詞嘅次序。所以啲人就喺度同我詏囉，話：「啊，呢啲……即係你調轉又唔係錯嘅，但係個feel唔同咗囉。」噉我話：「係啊，個point就係有個……
苗：Yeah, that’s the point.
以：……預設嘅次序㗎嘛。」噉但係你調轉咗……
靳：就係調轉咗咪唔啱囉！所以你feel到係錯㗎囉！就係噉樣。
苗：我諗起呢，《Because Language》，即係我……呢個另一個語言嘅podcast啦，大過我哋好多好多嘅一個語言podcast。佢就提過一個理論嘅，就係當你講同一樣嘢嘅時候，有兩個方式，有一個簡單啲嘅方式，但係有個冇咁簡單嘅方式。
以：啊，呢個。
苗：冇咁簡單嗰個方式，你就係表達緊一啲冇咁簡單嘅嘢囉。即係譬如話「你好好啊」噉樣，同「你唔係唔好」啊。即係兩樣嘢邏輯上好似一樣㗎嘛，「好」同「唔係唔好」。但係其實諗深一層，「唔係唔好」其實仲有一個程度上嘅唔同囉，同就噉「好」。係囉，唔知你哋點理解。
以：或者唔係純粹一個數字上嘅問題囉，而係你個感覺上……即係你想表達嘅情感係會複雜啲。
苗：複雜啲。即係「唔係唔好，但係乜乜乜乜」噉樣。
靳：就要跟個「但係」，你就要解釋點……點解唔係唔好。
以：我記得呢集。我哋可以拎返。我記得呢集我喺巴黎聽㗎。噉如果講語序嘅話，我諗可能唔係複唔複雜嘅問題，而係有個預設嘅。
苗：係。
以：有個最正常嘅次序。
苗：係囉。
以：然後你用第二個次序，即係當喺語序自由嘅語言裏面啦，或者個語言佢容許你呢個程度嘅自由。噉可能你調一調，就係你想表達嘅嘢係唔同啲囉，譬如話可能強調。
苗：係啊，你想強調某啲嘢，通常係。
以：係。譬如話「好醒目啊你！」噉可能我想表達嘅嘢，同「你好醒目啊！」會有少少好微細嘅唔同囉。
苗：少少少少唔同。
以：係啦。噉所以我都好鍾意呢啲……呢啲語序自由嘅語言。有時可以用返啲廣東話嘅諗法喺裏面。當然特斯拉夫語就係全部都free啦，噉但係譬如土耳其文嗰啲呢，佢係SOV嘅，冇錯。噉但係佢有好多走盞位囉。噉變咗我留意到好常見嘅嘢呢，就係佢會後補囉。即係譬如話……而家我土耳其文未去到嗰度啦，講唔到個例子出嚟啦。噉但係我聽過啲例子，譬如話：「你食咗未啊你？」噉樣。
靳：哦！幾好喎！
以：或者話「好正喎呢個醫生」噉樣。我唔知點解諗咗醫生。
苗：唔知點解呢？
以：係啊。好……好多時候係將嗰個句子裏面，有樣嘢，搬去後面囉。我話：咦？咁熟面口嘅？
靳：好熟面口喎。
苗：咁熟面口㗎。
靳：唔知喺邊度見過呢？
以：真係好爽，好爽。我好鍾意呢樣嘢。
苗：英式英文囉！將啲this擺喺最後。
以：咩啊？曼城英文啊！I don’t know me。
苗：哦，通常我聽咩咩this噉樣囉，「係咁㗎喇！呢個。」
以：係，主要……主要曼城係會有個me喺後面囉。
苗：me。
以：多數興噉樣，好似要強調我講緊嘢。
靳：對於呢啲嘢，我都唔係好熟悉嘅，我就。
苗：好少聽㗎，我。佢啱啱就後置咗個「我就」。
以：哦，OK。唔係，但係……但係曼城嗰個唔係後置，佢係會重覆咗個me囉。Echo。
苗：都得㗎，廣東話都……都得嘅。
以：得！「我唔知㗎！我。」
苗：我唔知啊，我。
靳：我唔知㗎，我。
苗：係囉！哦，幾好啊，OK啊。
以：係啊，係啊。
苗：一樣咋嘛。
靳：乜你噉㗎！你。
苗：係囉！廣東話先至係mother of all languages。
以：又嚟。係。所以我以前咪話過呢，我好鍾意斯拉夫語可以用返我廣東話個思維，後補啲嘢嘅。之後我一學突厥語呢，就發覺：咦？仲似喎！所以好正。
苗：正。其實我覺得唔……唔特別係……點講呢？即係我覺得唔一定係話廣東話似咩語言，純粹係因為你識幾種語言，廣東話同英文好唔同，所以如果英文唔對嘅嘢，廣東話就好大機會有對嘅嘢囉。即係可能係呢樣嘢，呢個effect囉。
以：哦，唔係，噉梗係啦。
靳：係英文太奇怪囉，呢個語言。
以：係吖，不嬲㗎啦。
靳：啲騎呢語言。
以：唔係，噉嗰個point係我講緊學嘅時候，我可以apply到邊一部分……我個腦嘅邊一部分落去吖嘛。
苗：啱啊，啱啊。用咩嚟學。
以：即係好似你哋諗啲……嗰啲叫咩啊？Esel(s)brücke……mnemonic，即係……
苗：哦。我每次呢，mnemonic呢，我都唔識讀㗎。我都要……我都要mn……mneno……nom……噉樣，然之後先至係諗到係n字頭。Mnemonic，mnemonic。
以：我一……一……我一時間諗唔起個英文詞啊。就係話……因為……唔係，其實我係諗緊廣東話點講，之後我唔知廣東話點講，之後我就……我個腦就撈咗德文嗰個出嚟。就係「驢橋」啊，Eselsbrücke。
靳：驢橋？
以：你識唔識啊？靳尼？
苗：咩啊？唔係……唔係，而家講緊咩啊？其實。
靳：咩……咩驢橋啊？
苗：你想講咩？
以：咩……mnemonic囉，mnemonic，mnemoni[k’]。
苗：哦，呢個係mnemonic嘅……
靳：哦，Eselsbrücke！
以：Eselsbrücke係一隻驢過到嘅橋，就係一個mnemonic，即係……
靳：但係唔知點解個意思係……

The rest of the transcript is available to Patreon members.