我喺英國改咗名?!居英佚事#2

UK debit card 改名前 改名後

我最近喺英國改咗名。

講到好大陣象噉,我屋企人都嚇咗一跳,驚以後啲舊文件唔對乜乜乜。其實冇乜大不了,我只係加咗個hyphen。香港人英文譯名不嬲好自由,姑勿論拼音方案,有啲有英文名、有啲冇,有啲有hyphen、有啲冇,等等。嚟緊BNO嘅朋友到埗,可能喺各種手續、識人方面,遇到唔同嘅問題。

我個名就不嬲寫成Lai Yiu Kwong(化名,姓、名次序),冇英文名,因為Israel呢個字喺某啲地區比較敏感,我就無謂博。點不知一出國,一填Yiu Kwong Lai(名、姓次序),即刻全世界都自動當我有middle name。

因為省略咗個middle name之後,我就變成Yiu Lai,讀出嚟就係要瀨……雖然飲水健康(見字飲水)啫,都唔想好似成日急尿咁唔吉利。

都算。有啲地方,例如大學,會有preferred name呢個選擇,本來係畀啲鬼佬例如將Benjamin縮成Ben,我就照寫Israel落去。又有啲地方會容許兩個字嘅first name。

但係其他情況會麻煩啲。例如喺大學電郵方面,我就同IT部門糾纏咗好耐。喺銀行,因為佢first name淨係容許一個字,而且又要跟身份證明文件,唔可以亂加符號,所以兩年嚟,我次次喺網上碌卡,都要自稱做妙麗。

某國改名嘅習慣都相類似,但係佢哋多數將兩個字嘅名黐埋。因為香港同某國唔同,習慣每個字譯咗一個詞,好多香港人嚟到英國,都可能會遇上類似嘅問題。

至於呢個問題有幾煩、會唔會令你想花時間解決佢,就見仁見智。

我畢業後就的起心肝,做咗手續,改咗名。

如果想直接睇步驟,唔想睇細節,可以跳去總結

英國人名點記錄?

唔講你唔知,(據聞)英國政府係冇一個統一嘅人名記錄嘅。即係護照有一個名、車牌有一個名、選民登記有一個名,佢哋會用各種方式儘量令到唔同部門之間嘅記錄吻合,但係你想改,係冇得遞一張表搞掂嘅。

我就首先去睇我本BNO護照點樣改,以佢為最終目標,再睇下佢要求啲乜,再推返轉頭。

因為我只係想加hyphen,係好微細嘅改變,所以睇下佢要求啲乜:

哦,原來係冇得一步到位嘅,而係要先喺其他地方改咗,改用嗰啲文件作為證明,嚟改護照。

(仲有理論上如果我有兩本護照,佢會要求我改咗外國嗰本先,即係特區護照,不過香港情況特殊,我姑且唔理佢住先。)

四樣文件之中,一同四最難明,我就懶得睇。反正佢要兩份文件,即係我只要改咗車牌同埋銀行戶口嘅名,就搞掂。

至於車牌同埋很行戶口點改名呢?又要各自再睇要求喇。我費事你睇得咁辛苦,就直接跳落去講我最後每一步係點做啦。

法律文件:用改名契?

我唔識law,所以真係對各種法律文件一頭霧水,但係經過大量資料搜集後,大概理解咗改名契(deed poll)同法定聲明(statutory declaration, stat dec)嘅分別。兩者都係證明你新名同舊名嘅關係,要寫得好清楚,同埋用晒兩個身份簽名。

改名契可以好兒戲,自己寫完求其搵個人見證就得,亦都可以好認真,搵律師見證,同埋去法院登記。不過改名契對外國人(我哋)嘅效力成疑,有啲地方就話你要改咗非英國嘅護照先得,政府就話外國嘅永久居民唔可以用,所以我就冇用到。

我選擇咗用statutory declaration,睇嚟睇去都冇咩限制。

你想簡單啲可以去叫律師幫你寫,但係律師最叻逐樣收你錢。我就孤寒啲,所以喺Rocket Lawyer呢個半自助嘅法律服務網站攞咗個版嚟抄。佢會叫你填晒資料,然後最後一步收你錢輸出個檔案畀你,我就喺嗰步之前,自己喺Word打返晒出嚟。個用字要非常準確,如果唔係唔work㗎!

印咗出嚟,就搵人見證你簽名。理論上你要搵嘅係notary,但係其他事務所得閒得滯都會睬你,我就求其落樓下搵咗人做。網上有好多資料話有條成個世紀前嘅法例,講明淨係見證你簽名呢一樣嘢,£5就做到,仲要有好多人話成功添。不過我就冇咁成功,因為搵咗好耐,連有得walk-in嘅事務所都搵唔到(武肺關係),所以死死氣畀個律師收咗£36扱個印。佢連proofread都懶,好串噉問我係咪冇錯㗎喇,就扱咗。

總之,有咗張stat dec,就好多嘢都做到。好矜貴嘅一張紙。

麻煩少少嘅係要keep得好好,以後如果有需要證明新舊名係同一個人,就要出示。

車牌改名

車牌上面改名,係用DVLA(牌照辦事處)申請新車牌/換牌嘅表格D1做。(呢張form亦都可以改地址,但係淨係改地址嘅話,上網搞就得。)正如上一篇文講,想知多啲香港牌換英國牌嘅嘢嘅話,留個言,我遲啲寫。D1表格是但去一間郵局問人攞就有。

填好表格後,佢會要你連埋身份證明文件嘅正本一齊寄去。好重要!如果新車牌就寄BRP(British Residence Permit,居民證),但係今次係改名,所以將上面嗰張stat dec摺埋寄出去。你平平地寄都得,但係我驚,所以畀咗成£6要簽收。

佢搞一兩個禮拜後,會首先將份文件(stat dec)寄返畀你,然後先寄個新車牌。呢段期間係可以照揸車,但係因為會暫時冇咗份法律文件,所以建議最後先做。

如果想知道喺英國揸車同香港有咩細微唔同嘅地方,可以睇下我上一篇文

銀行戶口改名

銀行手續呢啲應該好睇邊間,但係我用Lloyds呢就好清楚寫明點做:

冇乜好解釋,只要有咗份stat dec,攞去銀行櫃位,佢就會幫你入晒資料,跟手申請埋張新銀行debit卡畀你。最緊要都係check實啲資料唔好錯。攞住本BNO,成日都要同人解釋一大輪。

嚟緊點樣?

我而家除咗啲唔緊要嘅會員卡之外,係得返護照未改名啫。呢個要£75.50,因為我唔急住出國,而且喺英國,大部份時間都係用車牌證明身份,所以我就唔理佢住。去到一月申請BNO visa,或者之前嗰個月要攞嘅LOTR,先再同政府周旋。

但係照上面嘅cap圖嚟睇,應該過程唔複雜,只需要寄車牌+銀行月結單去。唯一驚嘅就係佢話我有外國護照,要改咗嗰個名先,但係而家全世界都知香港咩事,話唔定會酌情呢。

最後提埋,如果你個名想大改,例如加英文名,就要喺寄上面車牌、銀行嗰啲evidence之餘,再寄埋你份律師文件:

如果用西式玩法,結婚離婚後改姓嘅話,程序又會有唔同,麻煩自己check返。

總結:幾多時間、幾多錢?

第一步:上網搵stat dec嘅樣本嚟抄,印出嚟,搵律師見證你簽名。視乎你搵唔搵到、搵到邊個律師,一日搞掂,£5-100不等

第二步:攞份stat dec去銀行改名,需時半粒鐘,免費,新銀行卡一個星期左右寄到

第三步:將stat dec連同D1表格寄去牌照辦事處,建議用掛號信,£6,需時一日;新車牌同stat dec兩星期左右寄返嚟,冇手續費,期間會冇咗份stat dec

第四步:用新車牌、銀行月結單申請新護照,£75.50,最快三個禮拜

總共五、六個禮拜有新護照,使費£120左右

其他英國生活事

Wise低價國際轉賬,首次免手續費
無限社交媒體、無限睇片嘅平靚正電訊商
同我學外語
送你US$10搵老師學語言