- 絮言．狂想#049：頂，叫ChatGPT自己諗標題啦 - 21/03/2023
- 絮言．狂想#048：走進香港監獄體嘅文字世界（客串：道路研究社 社長） - 26/02/2023
- 香港人最常犯嘅十大英文錯誤 - 21/02/2023
落筆嘅今日，已經喺英國揸咗一個月車。早兩年換個英國牌返嚟（有興趣嘅留言，我遲啲再講），其實係貪得意用嚟做身份證明，但係我嗰時住嘅牛津根本係歧視車輛。而家搬咗出大城市，又頻繁搬嘢，開始有揸車嘅需要，所以一個月前就買咗。
大家都知道香港係跟英國右軚。但係揸落就發覺，喺啲細節位有少少分別。有小部份係因為呢邊大國家，由一個又一個接壤嘅中小城市組成，所以規劃都會有些少唔同。平時因為專注喺我擅長嘅範疇，冇乜講生活嘅事，但係呢啲小不同幾有趣，就約略寫下啦。
首先戴頭盔：我喺邊度揸車都仲係半個初哥。
車速
講咗最明顯嗰個先。英國仲係用英制嘅單位，所以英國揸車全部都講英里，行路講碼（yard，三尺，用開公制嘅話大概係一米），想長住嘅最好儘快適應。一般大路行30mph（~50kmph），小路行20mph（30kmph），公路由40（65）起跳，我目前揸過最快嘅係70（110），係大嶼山嘅境界！
沿路間唔中都有相機測車速，個牌同香港一樣，連個橙黃色嘅相機都一樣樣。
交通燈
我有一次等等下紅燈，突然轉咗黃燈，仲要喺度眨，即刻窒咗一窒！見其他人行我先行。
原來呢邊紅轉綠嘅時候，有時會出現黃燈眨眨下，係對應住行人嘅緣燈眨。你見到呢盞燈，係可以行，不過要特別小心行人噉解，因為你都知，好多人鍾意見綠燈眨就狗衝出嚟。
至於唔眨嘅黃燈仍然係綠轉紅嘅意思。
仲有，喺我有限嘅經驗裡面，香港着箭咀燈之後多數會着綠燈嘅。但係呢邊呢，有時會係箭咀燈，直接去黃、紅燈。
巴士專線重罰
英國某啲城市巴士專線都幾多，而且未必好容易睇得出（喺牛津中過伏）。以我所知，喺香港入巴士線，真係有人捉你先會出事。但係呢邊有啲位會有cam，影到會罰好重，所以小心。但係好在多數淨係朝早繁忙時間先有巴士專線。講開又講……
高科技，用相機咪得囉！
唔同香港，呢度好多地方都倚賴用相機嚟認你個車牌。譬如入咗巴士專線影到，政府就會寄罰單去你車牌上面嘅地址。（係啊，車牌有地址，仲係一定要keep住update㗎添！）
就算私人停車場，好多都係唔用閘機，用鏡頭。例如泊咗車睇完戲，就去一部機度，輸入你個車牌，直接畀錢或者攞免費泊車，完全冇泊車飛、單嗰啲。反而我去到機場時，竟然唔識用部閘機（笑）。
迴旋處
呢個係我覺得最有趣嘅地方，而且係我想寫呢篇文嘅原因！
首先，有啲迴旋處，係會大到裡面有紅綠燈嘅。
其次，香港嘅大迴旋處，例如大圍八爪魚，係要你自己揀啱線、再喺適當時候cut線出去嘅。
但係英國啲（我認識嘅）大迴旋處就唔同。首先，入去之前嘅每條線，都會勁清楚噉分咗左、直、右，寫清楚係會出去邊條（公）路，甚至標埋可以去咩地方，例如市中心、大商場之類。
然之後，基本上都唔使cut線。迴旋處裡面嘅行車線唔係同心圓嚟，而係會幫你一直褪位，只要你揀啱咗線，沿住佢行，褪褪下就自然會喺啱嘅時候褪咗去左線，然後出。
而且，仲經常會特別有一兩條線，係穿過下面、避咗個迴旋處佢嘅。
所以揀定線，真係好緊要。
略談買車 之 保險！！
本來唔諗住寫埋買車，但係講開又講啦。我喺香港冇買過，去到英國呢邊，我覺得多數步驟都幾直觀（政府網有教你交稅，仲會提你驗車），唯獨係保險呢方面，真係要預先提醒下大家。
一嚟，好。＿。貴。
首先，都係去啲網站度，例如compare the market或者uswitch，叫佢幫你比較唔同公司嘅保費。因為汽車保險係跟人嘅，所以佢會問你問題，問到你厭為止，包括地址、日夜泊車地點、職業等等等等。大部份都會影響保費，同埋佢有啲嘢會check（例如職業要證明），所以要如實報。如果有多過一個可能性，例如唔同地址，你可以試到個數靚為止。
因為我係攞咗香港牌一年之後換英國牌，而張form問嘅係我個英國牌幾耐，所以我死死氣報咗細數。點知佢後來同我講返，換牌嘅情況係由攞香港牌開始計，仲退返錢畀我添。
以我未夠廿五，攞咗個牌兩年、又未有正職嚟計，住喺伯明翰細區，最平係£1700-2200一年。個數真係好睇人、好睇地方，但係後生仔大概就係呢個價位。好彩呢邊唔似香港土地問題，慳返啲泊車錢嚟抵銷返。
有啲公司仲會裝個黑盒落架車度，監視你（架車）嘅一舉一動，因應你表現嚟加、減保費。唔少平啲嘅公司都會噉做，如果你覺得被監測有啲不安嘅，又要考慮埋喇。
同埋！最後亦都係最重要！保險千萬一定要提早買，起碼五日，如果唔係會收貴啲！
今日寫到呢度，下次講下我幾經辛苦改名（？！）嘅傳奇。
