嚟英國生活好多嘢要煩，手機嘅嘢有得用就得，唔值得為咗佢嘥太多時間、心力。簽合約綁你一兩年，而我哋生活咁多變數，隨時可能要轉電話plan、轉台，太多數計喇。香港無合約嘅電話供應商最出名嘅就係自由鳥，嚟到呢邊，有冇相似嘅服務？

有，好多添！

我喺英國住咗幾年，用咗兩年3（誠哥嗰個）嘅學生合約，£16/30GB，之後就幾個月之內試勻晒三大間無合約嘅供應商：giffgaff、SMARTY、VOXI。雖然仲有其他嘅供應商，有啲仲要係大台自家出嘅，但係多數都唔多抵用。

我而家就憑我親身嘅經驗，講下喺三個情景之下，用邊個台係最適合。

附帶一提，就算你想簽約上台，呢啲無合約服務都好正，因為可以幫你試下各個網絡，喺你個地區順唔順！giffgaff用O2網絡，SMARTY用3，VOXI用Vodafone。呢樣好重要，因為英國網絡冇香港咁發達㗎！

但係但係！喺我詳細解釋之前，首先畀啲着數畀喺英國、香港、世界各地嘅你：

首先，我假設你唔想用嗰啲PAYG（pay as you go，入credit之後逐MB逐分鐘計）嘅台啦。噉就可以講定，今時今日，咩台都好，都係無限分鐘無限SMS、包5G服務㗎嘞，同埋一般都會包埋喺歐盟數據漫遊，只不過可以用嘅data可能會少啲（註：脫歐後，各台開始漸漸取消免費漫遊）。分別就在於數據流量限額，同埋其他服務、特色。

（呢篇文裡面陳列咗出版嘅時候各公司嘅價格，請以官方網站為準。）

出發前準備：giffgaff

giffgaff一句講晒：好用，可靠，十卜好。佢係借O2嘅網絡，接收好穩定。

佢最出名嘅就係可以隨時問佢攞一張SIM，不論幾多次，不論你喺邊，一填張form，佢就免費寄張SIM卡畀你。（佢真係好想多啲人試用佢。）

你可以喺外地（香港）就攞定張SIM，入£10上台。上台之後嗰£10可以好似一般預付卡（prepaid card）噉，用嚟逐MB逐分鐘扣。

換言之，你插住喺電話度唔用，就可以一直keep住個電話號碼接收來電、訊息（最多六個月）。

亦都可以用嚟買一個月嘅plan。我暑假留咗喺香港，就一直keep住幾鎊喺個戶口裡面唔郁，一到步就買pay as you go plan啟用，斷月計。

為咗鼓勵你續約，如果你揀自動續約，會多啲data用添！

以下係2024年1月價錢：

價錢	Rolling（自動續約）	手動續約
£6	2GB	1GB
£8	5GB	4GB
£10	20GB	15GB
£12	26GB	25GB
£15	35GB	30GB
£20	100GB	80GB
£25	假無限（100GB後限速）	假無限（80GB後限速）
£35	真無限	150GB

價錢方面，我會話唔貴唔平。有樣嘢叫rolling plans，抵用過正常plan，唯一條件係你要揀自動續約。

即係佢記住你張銀行卡，去到每個月尾，你唔取消嘅話，就自動扣錢，買下個月嘅plan。

但係其實你都係隨時可以取消，所以呢個條件唔構成問題，佢只係博你失憶。所以我會推薦rolling plans。

如果知道你目的地係會有Wi-Fi，我諗多數人會買£10 20GB或者£15 35GB。

如果目的地暫時係冇Wi-Fi嘅，我會推薦£20 100GB，慳住使。£25雖然無限，但係100GB後慢吞吞，唔用都罷。£35無限就太貴喇。

仲有如果你用晒data，都冇話唔可以買過個plan，重新起計一個月。噉樣唔太划算，但係叫有條後路。

另外，Giffgaff最近加咗合約plan，會再抵啲。但係本文主要係同大家介紹無合約電話台，所以大家有興趣嘅話，可以自己去睇下。

如果朋友推薦你加入，就會各有£5 credit，前提係你上台再入£10入去。有朋友用嘅就問朋友攞，冇朋友嘅可以搵陌生人攞。

giffgaff有個app非常方便，同埋如果有問題嘅都可以去論壇問，好快會有人（多數其他用家）幫到手。

個人經驗：唔知關唔關我電話事，明明4G係收爆格，但係成日會無啦啦扽咗落去3G，要去設定嗰度，手動改成3G、再改返4G，先駁得返4G。

---

平平地大食plan，當寛頻用：SMARTY

SMARTY出名咩？平，抵，真無限。

我呢幾個月住緊個冇寛頻冇Wi-Fi嘅地方，於是就買咗張SMARTY返嚟嚟，插落部舊手機度當router用。

同giffgaff唔同嘅係，佢係一個無合約供應商，但係冇PAYG嘅服務，所以只可以一個月一個月計，用晒就要貴啲買add-on data，所以要揀定想要幾多data。如果想暫停唔用，可以就噉叫佢唔好自動續約，佢會喺六個月後先自動取消你嘅戶口。

佢啲plan真心抵玩。平平地£10就有30GB咁多，而且係一個（曾幾何時）罕有提供真無限嘅台，仲要£20就有。

£6	5GB
£7	8GB （限時優惠 15GB）
£8	16GB
£10	40GB
£12	100GB （限時優惠 125GB）
£15	150GB （限時優惠 150GB）
£17	200GB
£20	真無限

呢啲咁大食、咁平嘅plan，最適合好似我噉用嚟取代家居寛頻。點解咁平？有咩弊處？

第一，佢好似廉航噉，除咗電訊服務之外，真係冇乜其他服務。技術支援就得出名慢吞吞嘅online chat（之不過，我用過都覺得OK）。

第二，佢係借用嘉誠哥嘅3網絡，同香港嘅3一樣，垃圾。我喺牛津用咗兩年3，一入室內就零接收，就算對正個窗口，甚至放喺露台出面，都係得一格4G，所以我最後的起心肝，全程用3G，1Mbps度日。

因為網絡接收好睇地區，如果你想用SMARTY，最好研究下、甚至買張太空卡試下3喺你嗰區嘅接收點樣，先抌錢落去。

SMARTY對推薦朋友最豪爽，一旦帶朋友上台，你同朋友都一個月免費。想上台可以㩒呢條拎。

佢仲有個家庭計劃，不論係一家大細移民英國，定係識到朋友喺左近，只要group埋一齊，就冚家九折。但係係要一個人管理晒咁多人嘅plan，所以如果唔係真．一家人嘅話，會好麻煩。

住落之後：VOXI

一句講晒：抵用，穩定。佢係Vodafone（係，以前香港嗰個）旗下嘅品牌，唔係借用網絡。喺我而家嘅位置嚟講，睇落接收優良，差唔過giffgaff（O2）。

佢最出名係啱後生仔用，因為無限玩社交媒體。我老喇，冇乜需要，但係00後嗰啲就可以全天候碌IG。佢2020年仲出咗無限睇片嘅賣點，£15或以上嘅計劃，YouTube、Netflix、Prime Video等等全！部！任！睇！（Disney+除外！！）……當然你用嗰啲強國網，就冇你扶。

佢聲稱射Wi-Fi畀電腦用，呢幾樣都一樣係無限。但係射去電視等嘅串流裝置（如Chromecast）就計你流量。我唔知佢點偵測到，但係我信住佢先啦。我好呻笨，早知VOXI有呢個賣點，我嗰三個月就唔使捱SMARTY底下嗰個480p嘅Netflix啦。

VOXI嘅價錢浮動得好勁，經常會調整或者減價，所以請你自己去睇下最新優惠啦！目前嘅價格係噉嘅：

£10	15GB （限時優惠 30GB）	無限社交
£12	20GB	無限社交+音樂
£15	30GB （限時優惠 90GB）	無限社交+音樂+片
£20	100GB	無限社交+音樂+片
£35 （限時優惠 £30）	真無限	（都話真無限咯）

剔除咗社交媒體同睇片，應該乜都夠啦，所以多數人應該會想要£12個plan，係最平嘅無限睇片plan。6GB嗰個有無限社交媒體，但係冇無限睇片。

佢仲有得加£5無限串流音樂，或者加£3額外1GB data。

整體嚟講，我會覺得VOXI各方面都最抵玩，個網絡又好過SMARTY多多聲。技術支援主要係Facebook chat，我試過都幾快手。

如果推薦朋友，佢唔回贈你嘅電話費，而係送你£20禮品卡，某程度上又有用啲。如果你用呢條推薦link上VOXI，你都同樣有£20禮品卡㗎！

其他英國生活事