上次講咗唔少歐洲語言裡面嘅名詞常見嘅特性——詞類（陰陽／男女），大概解釋咗下點樣去諗呢個概念，會比較容易接受、熟習。而家將話題轉去一種比較少見少少嘅特性，雖然佢淨係喺某啲日耳曼（如德文）、斯拉夫（如俄文）、或者古語言（如拉丁文）出現，但係非常有趣，而且一旦通咗腦裡面嗰個思路，學起嚟都事半功倍。

我有好多朋友喺大學時學德文，一去到第二個學期左右，都會畀名詞、形容詞變格法嚇一嚇。原因係喺呢啲語言裡面，每個名詞都要根據佢喺句子裡面嘅作用，有唔同嘅詞尾。四個格，加埋男男女女噉乘返開，每個字都好似要死背成個表噉，好易令人望而卻步。所以我想喺呢道嘗試解釋一下變格呢個概念，等下次有老師笪個表出嚟嘅時候，都知道發生緊咩事吖。

聽落好深？其實你已經識！

格，講到好高深噉，其實就係一種統稱，指改變一個詞嘅樣，去表達佢嘅作用。其實，你好可能已經喺日常生活用緊。

我哋嘅粵語裡面因為每個詞都獨立，詞同詞之間嘅關係都係加個字嚟表達，例如「嘅」。如果我講「佢嘅電話號碼」，「嘅」就係表達「佢」同「電話號碼」之間從屬嘅關係。

轉做英文嘅話，會講his number。留意返his同number之間係冇字嘅，his本身從he變出嚟，就係加上咗從屬嘅意思。有另一個罕見啲嘅表達方法，會用of his，例如a friend of his。呢個of，就相當於我哋嘅「嘅」，只不過前後調轉咗噉解。

因為英文嘅根源同德文一樣，所以保留咗某啲變格，最簡單嘅就係me/him/her。你會諗，乜唔係賓語代詞（object pronoun）嚟㗎咋咩？係啊，賓語代詞，其實就即係將人稱代詞I/he/she變成賓格（accusative case），表達佢作為接受嗰個動作嘅角色。睇例句：

She sees him.

She係主語代詞（subject pronoun），亦即係代詞嘅主格（nominative case），表達「佢（陰性）」做出「睇」呢個動作。

所以話，德文老師講到咁複雜，其實並冇想像中咁陌生。你本身已經識兩個格，只不過要轉個名噉解。

呢句直接譯做德文：

Sie sieht ihn.

同樣道理，sie就係「佢（陰性）」嘅主格（或者賓格），ihn就係「佢（陽性）」嘅賓格。

同英文唔同嘅係，一嚟德文多兩個格，表達其他作用；二嚟除咗代詞之外，其他詞語，例如冠詞（article i.e. a/an/the）、形容詞，甚至某啲名詞，都係跟住變。例如：

Die Mutter sieht den Studenten. （個媽媽睇到個學生。）

今次個主語變咗「媽媽」，加咗個die (the)。Die係陰性嘅冠詞，好似啱啱嘅sie噉，會講畀你知呢個名詞係主語或者賓語嘅角色。（貼士：歐洲語言裡面，通常陰性嘅變法都會簡單啲。）「學生」一般係der Student，而家因為佢係畀人睇到嗰個，所以變成賓格：der變成den，而個名詞本身（罕有地）都加埋個-en，明確噉講畀你知佢係賓語。

越講越多terms，但係你再諗返轉頭，都係同she sees him嘅思維一樣。

噉點解要變格啫？

一句講曬：同「男女」一樣，純粹因為本來已經有。

但係從學習外語嘅角度諗呢？其實係將啲意思界定得更清楚。睇睇呢兩句：

本書畀咗佢。

我畀咗佢。

第一句裡面，你點知係「某人」將本書畀咗佢，而唔係本書將「某樣嘢」畀咗佢呢？第二句，你點知道唔係「我」畀人當奴隸送咗畀佢呢？就淨係靠上文下理（同埋常識）。

德文之類嘅語言，就係減少咗對上文下理嘅依賴。有一句喺教科書成日見到嘅：

Der Hund beißt den Mann.（隻狗咬個人。）

Den Mann beißt der Hund.（個人咬隻狗……？乜狗肉節咩？）

其實兩句意思一樣，都係狗咬人，唯一分別係第二句強調係個人畀狗咬（而唔係其他嘢）。前後兩個名詞組，你無論點調，都唔會變咗食狗肉。

點解呢？就係因為der同埋den已經提供咗你需要嘅資訊，幫你理解邊個係咬者，邊個係被咬者。同上面嘅Student一樣，der代表陽性嘅主格，den代表陽性嘅賓格，所以你一旦寫咗呢兩個冠詞，就知道係狗咬人。

變格畀到德文好多自由空間，可以將唔同嘅名詞擺喺句頭，做強調嘅作用。喺某啲語言更加犀利，成句幾隻字，可以亂咁調。例如我上拉丁文堂睇過嘅一句：

Nulli secundus in oriente.（喺東方次於無人。皇家香港軍團格言）

Nulli係冇人嘅意思，如果唔睇格，就會睇成「冇人係東方嘅第二」。但係nulli係與格（dative case），意思就係佢係「次於」嘅對象，所以secundus其實係形容個軍團，講佢喺東方唔次於任何人。就係因為有呢個格，所以可以將「冇人」擺喺開頭，加以強調，串啲。

諗做介詞（preposition），冇咁驚。

其實好多時候，某啲用格嚟表達嘅意思，可以諗成to、of等介詞。

啱啱嗰句nulli secundus，譯做英文就係second to none。與格就充當咗to或者粵語「於」嘅角色。

舉個極端啲嘅例子：芬蘭文。（先利申冇學過。）啲人成日搬「十五個格」出嚟嚇人，但係一睇落去，只不過係將個介詞黐咗落個名詞嘅噼噼。

好似上面個表，好多乜乜ive嘅terms，其實幾乎每個都係一個介詞。inessive即係in（喺裡面）嘅意思，elative係from（喺裡面出嚟），illative係into（入去裡面），如此類推。你諗住個介詞，搵返啱嘅詞尾，放上去就係。

雖然其他語言冇咁直接，但係用呢個角度嚟理解，成件事會簡單咗好多。

而家大家了解咗少少變格嘅概念，認識咗喺唔同語言裡面最常見嘅三個格（主、賓、與），下次就從過來人身分講下，點樣學、點樣記，係最無痛、最有效率㗎呢？

圖片來源：https://bencrowder.net/latin-declensions/