靳：你係咪可以攞呢個新人金㗎？跟住就。

苗：呢個係咩gag嚟㗎？有啲唔get添。

以：畀兩秒佢。唔get喎，呢個咩嚟㗎？

苗：真係唔get喎，呢個咩嚟？

以：點解靜咗嘅？

苗：窒咗？

以：佢freeze咗呀？呢個唔係dead air嚟㗎，呢個係connection問題嚟㗎。

苗：呢個真係……其實唔係啊，個plot twist就係佢真係定咗喺度。等一等佢。

以：佢唔敢解釋，所以就自己定喺度。

[斷線]

苗：等一等先。

[連線]

以：哈囉！你做乜搞完爛gag之後消失咗啊？

靳：你啱啱講緊啲……

苗：搞完爛gag就靜咗囉。

[jingle]

以：各位聽眾……

眾：聖誕快樂！

以：歡迎大家返到嚟《絮言．狂想》第廿八集啊，我係以色列。

苗：我係三苗。

靳：我係靳尼啊。

以：今日呢，就係好特別嘅日子啦，就係十二月十九號。嗯，噉希望大家都出街玩得開心啦！

苗：大家記得投票啊，投呢個全民造星……唔係。

靳：投呢個全民造星。

以：但係大家聽到呢一集嘅時候，可能都差唔多聖誕節喇喎！

苗：如果剪得慢，可能過咗聖誕節㗎喇。

以：大吉利是！唔好剪得慢！噉去到年底呢，噉我見到好多唔同嘅網站都有幫大家去到重温返今年做咗啲乜嘢啦，噉我就已經冇Spotify㗎嘞，不過呢，今年就好有趣呢，就發現Duolingo又玩呢家嘢喎！

苗：係啊，好似呢，近排嗰啲網站呢，即係有一個大趨勢啊，就唔係淨係話今年年尾嗰啲嘢，就係嗰啲story呢，好似越嚟越多唔同嘅平台都好似有囉。而呢一個……即係year in review呀？嘅噉樣嘅物體呢，都係好似好多網都跟風喎，有。即係Spotify又有啦，而家Duolingo又玩埋呢啲嘢。Duolingo呢，之前出咗一個叫做story嘅嘢，我仲爭啲以為係真係好似IG story嗰啲噉，原來係另一樣嘢嚟……原來係另一樣嘢嚟嘅。

以：哦，嗰個story！我真係以為係IG嗰隻。

靳：嘩，Duolingo出IG story，點睇？

苗：嚇親，嚇親，係。

以：我唔會好surprise囉。

靳：係淨係畀人share啲奇怪嘅句子噉樣。

苗：其實做得過喎，如果Duolingo真係玩呢個。噉佢可以搶返啲生意喎，即係喺呢……嗰啲咩Facebook啊、Twitter度搶返返嚟。啲人呢，睇親呢啲，都係去呢個Duolingo stories。

靳：佢成為咗一個社交媒體。

以：我哋幫佢構思下先，係咪啊？即係每人可以……

苗：係啊，快啲sponsor我哋啦，Duolingo。

以：用你嘅外語寫下你自己嘅生活噉樣，係咪啊？咪即係Italki上面嗰啲feature囉，即係畀一句你：你寫下你嘅最鍾意食嘅嘢啦！噉樣，之後你就寫一句嘢，之後大家去回應你啊，或者改你噉樣。咪嗰樣嘢嚟㗎囉！不過變story。可能有片。

苗：係啊。係啦，噉呢個Duolingo嘅year in review呢，佢就有好多唔同嘅數據啊，即係你自己呢一年嚟呢，玩過嘅幾多XP啊，或者用過幾多分鐘啊，或者你個streak有幾長、你個火儲到幾耐啊、學到幾多個字啊，呢啲噉樣嘅數據，全部都有。佢仲要呢，話埋畀你聽，你係成個網裏面top幾多percent嘅學習者喎。噉唔知大家又攞到幾多percent呢？大家有幾勤力呢？

以：越低percent係越好嘅，如果大家唔熟嘅……係喇。

苗：係啊，因為係top㗎嘛，講緊。係啊，係啊。噉唔知大家攞咗幾多percent呢？

以：噉大家喺留言度講下自己嘅數據有咩特別啦。

靳：噉樣嘅。因為呢，其實我都係十月到先至開始用返Duolingo，之前嗰幾個月係完全冇用嘅，但係我都好……好驚喜我攞到top三%噉樣。

苗：嘩，咁chur？

靳：因為喺啱啱開始玩返，就每日都冇斷嘅。因為佢係計到十一月尾，噉我去到十一月尾就啱啱五十九日。即係我十月頭開始玩，噉樣。

苗：啱啱兩個月。

靳：噉就……跟住就玩晒成個匈牙利嘅……匈牙利文嘅樹嘞，嘅詞。

苗：嘩，好犀利喎，玩晒成個tree。

以：玩晒嗱？

靳：但我係全部level one㗎咋喎，我依家玩緊level two。

苗：哦，即係重新再……

以：哦，你係鍾意玩晒level one先嘅。

靳：我係全部玩晒level one先嘅。

以：因為我知三苗呢，就鍾意金色嘅。

靳：全部要金晒。

苗：係啊，我……我要全部金晒，我先會去下一個lesson。所以我到而家都係……都係好慢啊。我已經好耐冇玩過新嗰啲。

以：噉靳尼，你淨係玩緊匈牙利文呀？

靳：我係呢排淨係專注玩緊匈牙利文囉，但係我係冇由其他嘅渠道去學匈牙利文，我最多可能揾Wiktionary查下字噉樣囉。因為呢排可能做嘢都比較忙啲呢，其實真係要落……畀心機去學一種新嘅語言，係有啲難嘅。噉所以就希望用Duolingo嚟keep住自己係學緊啲新嘢噉樣啦。噉所以而家係都唔識講嘅。

以：你覺得齋用Duolingo，仲要做晒成樖樹喇，你覺得學唔學到先？你係咪好勁㗎喇？而家。

靳：我識睇啲好……好簡單㗎囉。但係要講啊、要對話，就應該完全唔掂嘅，應該……因為Duolingo其實係冇乜即係output㗎嘛，佢全部都係input比較多少少。

苗：係，啲output都係你見過嘅句子。

靳：係喇，會變咗你記……睇得明某一啲簡單嘅字囉，而家就係。

以：即係佢唔係要你自己組句子啦，基本上。

靳：同埋你玩晒成個技能樹呢，佢都未教晒你……因為可能大家聽眾都知道，匈牙利文呢，係有好多個格嘅，即係好多個case噉樣啦。噉有十幾個case嘅。噉你玩晒成個技能樹，其實你都唔係識晒啲case嘅，你都係識咗啲最常用、最簡單嘅case㗎啫，係喇。

以：哦，教唔晒嘅。我又喺show notes擺返我之前寫格嗰篇文先，畀大家參考下。噉其實係咪即係佢樖樹係唔齊㗎？啲嘢。

靳：唔齊㗎，啲嘢。

以：有幾多個checkpoint㗎？

靳：佢有四個section囉。

以、苗：都唔短喎。

靳：唔短㗎，唔短㗎。

以：噉你都幾快喎，你擺咗幾多分鐘落去？

靳：我一日就……因為我返工要大概九個字到一個鐘噉樣，噉我就搭車嗰陣時玩囉。

苗：哦，幾好喎，commute嘅時候就玩。

以：好懷念commute啊。

靳：係啊，我通常都唔想嘥咗commute嘅時間，噉所以就會做呢樣嘢。

苗：好耐冇commute過……有嘅，有嘅。

以：噉我又睇下我嗰個先。我呢，今年係玩咗幾個唔同語言。我而家主要都係威爾斯文同埋希伯來文。其實我係之前希伯來文，之後中途轉咗威爾斯文啦。之後佢仲話我玩咗阿拉伯文，其實我純粹係嗰陣時喺手機度㩒下佢嗰個學script嗰個玩法啦。之後我學咗幾粒之後唔記得晒喇，好耶！好似泰文噉還返畀老師喇。

靳：好難記㗎，泰文真係。

苗：唉，泰文。我喺Memrise玩過泰文，真係一粒都唔記得。我淨係記得馬騮啊、牛啊，噉樣囉。原來我係擺咗咩二千八分鐘落去，之後係top兩%囉。

靳：嘩，犀利喎。

以：嗰陣時一睇，覺得好似好高啦。點知一上Twitter呢，全世界都係top二、三噉樣㗎，一、二、三。

苗：好似全世界都係top……五嘅之內噉。

靳：我諗係應該有好多account呢，好多人開咗之後，就擺咗喺度，跟住佢計埋落去。

以：係喇，啲人係純粹擺account喺度，都完全唔玩。

苗：所以推高咗……真係會平時用嗰啲，其實已經係可能top 5噉樣。

以：可能每日玩一個lesson，已經係top 5囉。

苗：係啊，好多人唔玩囉，開咗account，係囉。

以：幾開心吖，假如大學噉拉curve就好喇。全世界都A。

苗：噉咪要好多人……即係要好多人入咗學，但係完全冇上過堂㗎嘛。要有八成嘅人都係噉。

以：都有好多嘅。八成就冇。

苗：要八、九成嘅人係噉樣，先至可以top 5。

靳：高達八成。

以；噉你就求其上一堂，已經係A嘞。係啊，之後三苗係咪要壓軸啊？

苗：係啊。噉呢，我呢，就玩咗……佢話我玩咗四千九百五十六分鐘囉，即係都好耐啊，即係人生唔知點解噉就畀咗Duolingo喇。

靳：奉獻咗畀佢。

苗：噉佢就話我係top 1%囉，就學咗咩二千九百九廿四個字啊，爭少少就三千個字。我都唔知點解有咁多個字學㗎。

靳：嘩，犀利。

苗：其實應該好多都係啲唔知咩奇怪字，即係啲唔係特別……

以：變化噉樣，係咪啊？

苗：係囉，可能係唔同嘅form，又係當係兩個，我唔知佢點計喇。係囉。

以：我覺得你嗰啲mutation應該當囉。

靳：因為佢話我將近學咗二千隻字，我心諗我學咗咁多隻字咩？

苗：咁多？咁犀利？

以：嘩，fluent喇喎，二千隻字。

靳：因為佢係啲格嘅變體太多，係啊。

苗：係咪真係當唔同字㗎？咁多個字，咁多個case。

靳：佢係當唔同字㗎，全部都係當唔同字㗎。

苗：噉樣樣，噉如果學啲polysynthetic嗰啲，咪……

靳：全部都係唔同……

以：有冇啊？

苗：每一句都係一個字。係喇，解釋返少少呢，就係呢，polysynthetic係……即係其中一種語言嘅grammar嘅分類啦。噉有啲……如果係中文嘅話呢，就逐個字逐個字分開噉樣㗎嘛，噉就有啲……一啲虛詞，有啲實詞，噉就分得好開嘅。噉但係呢，有啲就相反嘅，就叫做polysynthetic，我唔知叫咩啊？叫綜合……咩咩綜合語啊？多式綜合語。噉佢就係一句句子，好似一個字噉樣囉。佢會將唔同嘅語素呢，佢會堆埋一齊，但係你又唔可以分開講㗎喎，你分開講呢，嗰啲音就會唔同晒㗎喎。你堆埋一齊嗰啲……嗰啲音呢，就會好似……好似啲泥膠，黐埋噉樣呢，你黐埋咗就分唔返開佢㗎喇。就一嚿嘢就係一個整體。噉所以每一句句子都好似一個字噉樣。噉如果學嗰啲語言呢，就會學咗幾萬個字。

以：Duolingo有冇呢？土耳其係咪㗎？

靳：唔係，土耳其文係黏着語，agglutinative。

以：Agglutinative喎，佢可以拆開。

靳：Polysynthetic係多式綜合語。

苗：Duolingo有Navajo吖嘛。

以：有咩？哦。

苗：但係得好短㗎咋，得一個checkpoint㗎咋。佢嗰個checkpoint仲要好少lesson㗎。噉所以都算係有，但係就比較簡陋囉。

The rest of the transcript is available to Patreon members.