靳：因為我哋講話「國際音標」呢，其實佢係……我點樣介紹佢好呢？

以：國際嘅一個音標。

靳：國際音標呢，其實係一個國際嘅音標。

以：啱嘞。

靳：換言之，佢就係愛嚟標音嘅。

[jingle]

眾：新年快樂！

以：歡迎大家嚟到二〇二二年啦，同埋歡迎大家返到嚟《絮言．狂想》第廿九集，我係以色列。

苗：我係三苗。

靳：我係靳尼啊。

以：好，我哋終於嚟到新一年嘞，捱咗咁辛苦。噉我哋都做咗……係，超過一年喇。所以呢，可以同大家一齊迎接二〇二二啦。

苗：即係嗰啲英文人呢，話今年係2020-too吖嘛，即係「亦都係二〇二〇」噉樣，就「玩多次 」噉樣，「噉就死喇」噉樣。

靳：噉就大鑊啦，真係。

以：噉就大吉利是喇，翻炒。

靳：「今年一定會更差嘅啫！」

以：「希望在明天吖嘛！」

苗：冇事嘅，冇事嘅。

靳：冇事嘅，冇事嘅。

以：冇事嘅，係。大家樂觀啲啦。噉你哋新年有咩願景啊？好少用呢個字啊。

苗：願景？好過前年、好過上年囉，希望。

以：你覺得上年差啲定前年差啲啊？對你嚟講。

苗：差唔多啫。

以：差唔多。

苗：我諗對全世界都差唔多，其實。

以：應該差唔多。

靳：香港就再差啲。我哋希望來年會好少少啦。

苗：或者另一個諗法，就係一跌到谷底就會反彈囉。

以：死喇，唔通2020-too就係再搞多鑊二〇二〇噉樣？噉香港都幾弊。係，冇，大家樂觀啲！大家……係嘞，打針啦，同埋……冇事嘅，係嘞。好！噉我哋講返語言嘢啦。有冇新嘅計劃噉樣啊？啱啱上次就講咗靳尼你玩Duolingo，玩晒成個匈牙利文啦。有冇啲咩其他嘅計劃呢？

靳：我今年嘅計劃就係玩埋第二個皇冠。

苗：玩第……level 2，係咪啊？全部。

靳：玩level 2。

以：你用咗兩個月玩一個level，之後你用二〇二二嚟玩第二個level。

苗：要aim high喎，應該要……

靳：要全部金色都有可能……

苗：係囉，全部金色啦。

靳：但係應該會去到第三、第四個level，就會悶咗，跟住就會做咗其他嘢。

苗：你識晒啦，已經。

靳：我睇下我想唔想會認真地學呢樣嘢啦。同埋其實我之前有積埋好多啲德文書未睇，所以就都係要清一清佢嘅。

以：睇書……嘩，我呢兩日呢，喺Twitter見到好多人喺度po佢哋啲睇書嘅進展啦。一年咩一百二十本噉樣呢，真係嚇親。

苗：嘩，都幾犀利喎。

靳：佢睇嗰啲係咩書嚟㗎？

以：唔知喎！嗱，我有本詩集嘅，噉應該揭兩揭就睇完㗎喇。但係其他就搞唔掂。你平時有冇定啲咩目標噉樣㗎？一年咁流流長。

苗：我覺得一年嘅目標，係一個比較唔係太有用嘅嘢囉。即係一年嘅時間實在太長呢，你嗰個人嘅腦呢，好難去即係將佢好實在噉樣去想像出嚟囉。可能三個月，或者即係兩個月，噉呢啲係一啲比較……個人腦可以理解到嘅時間啦。即係可以做到一啲嘢嘅。噉你將嗰個goal，你break去做三個月、三個月噉樣都得啦。即係譬如學一隻語言噉樣，「我三個月就學識㗎喇」，噉樣。係咪……

靳：好似廣東話噉樣。

以：三個月學得識！

苗：噉係囉，即係呢個……即係有個YouTuber阿CGP Grey都講過啦，噉佢都係奉行呢個year theme呢一個嘢，就係每一年有一個主題啦。噉因為嗰個好處就係你嗰個……嗰一年，你唔係有目標嘅話呢，你就唔會去失敗吖嘛。即係你有目標，你就可以有條件去失敗啦：哦，我達唔成個目標，吖啊，我唔得啦，噉樣。但係如果你係一個主題嘅話，你就……任何喺嗰個方向做嘅嘢，都係你可以將佢變成你嘅生活囉。

以：都係成功。

苗：即係佢唔係一個目標嚟嘅。因為呢一個主題，你係唔可能失敗㗎囉。即係你冇一個條件：哦，你達成個條件，你就失敗嘞，噉樣。但係如果你係純粹係一啲目標嘅話，你就一定會有呢樣嘢囉。

靳：噉你有冇定到今年嘅主題係咪乜嘢？

苗：冇。係……呢樣嘢……我覺得呢個idea幾得意囉，但係就我覺得唔係特別啱自己，即係我覺得冇乜需要去做呢樣嘢囉，自己。即係可能有啲人覺得係噉樣係令到佢好嘅，噉樣。

以：即係純粹就活着喇，噉就算喇。

苗：係啊，即係今日唔知聽日事吖嘛。

靳：係啊，去體驗生活啦，要。要實實在在噉樣生活，係啊。

苗：係啊，活在當下。

以：呢個係你嘅主題，係咪啊？

苗：我嘅主題就係活在當下。

[05:00]

以：YOLO噉樣。呢排香港興講YOLO……唔係，前排。

苗：前排香港政府講YOLO啫。

以：係。好似唔係嗰回事嚟嘅。

苗：呢個題外話，呢個就係。其實我哋都可以……唔係喎，都可以講，即係一啲slang嚟㗎嘛，噉即係語言啦，語言即係可以講啦。就話即係YOLO呢樣嘢呢……近排咁出名呢，就係呢個香港政府就有一啲戒毒嘅廣告、宣傳品啦。佢就嘗試呢，就同啲年輕人係接下軌，即係等大家唔好脫節噉樣啦。噉佢就有個hashtag，就係YOLO噉樣啦，即係you only live once啦，你……即係「人生冇take two」噉樣嘅意思啦，即係直解嘅話。但係呢，佢就用喺呢個禁毒嘅宣傳。噉啲人就覺得好好笑嘞。噉YOLO你平時……點解話「人生得一次」呢？就係因為人生得一次，噉所以呢，你應該去大膽去試啲嘢囉，噉因為你冇機會㗎喇，你人生冇take two㗎嘛。噉佢就……

以：原本西方嘅用法就噉囉。

苗：係喇。噉佢就……佢就直解，佢就：哦，人生冇take two，噉咪即係哦，你吸完毒呢，你個人生玩完，你就冇take two㗎喇，噉樣。噉但係呢一個……

以：或者唔好做啲你會後悔嘅嘢。

苗：係喇，係喇。噉但係呢個意思就係……即係本身唔係噉用嘅，噉就一個新嘅用法彈出嚟啦，大家都覺得好好笑啦，即係大家都好少聽㗎，呢個用法。噉就笑即係啲政府嗰啲做呢個廣告嘅人，就真係脫節囉，同啲年輕人，噉就唔識呢個字點解噉樣就……

以：佢哋創新啫。

苗：即係創新，係咪啊？即係有啲新嘅解讀噉樣。噉都係脫節嘅一種嚟嘅，即係同個年輕人嘅解讀唔同。

靳：佢成為咗流行文化嘅一部分喇，已經。好似「潛水怕屈機」噉樣。

以：呢個都係政府諗出嚟嘅。

苗：呢個又係好耐之前嘅。係咪……係會考定高考嚟㗎？嗰個係。

靳：係會考，係仲有會考嘅時候。

苗：係喇，噉就嗰陣時會考，某一年嘅試題就係……佢裏面呢，有一句嘢，咩「見鬼勿O嘴，潛水怕屈機」啊。噉呢句嘢呢，就係即係畀人批評佢九唔搭八啦，即係因為「潛水怕屈機」係唔知點解㗎。即係「屈機」係一個俗語啦，然之後O嘴又係一個俗語啦，噉佢就唔知點解擺埋一齊。

以：咩俗語啊，潮語！

苗：潮語囉。

靳：呢個係潮語病句嚟㗎。

以：即係佢攞咗啲潮語嚟，之後亂咁砌一句出嚟，冇意思嘅。之後就貢獻返去潮語，變成咗一句流行文化裏面冇意思嘅一句說話。

苗：係啊，即係有時meme呢樣嘢係好微妙㗎，即係你唔識啲meme，然之後你亂咁去用啦，你扮同啲人去connect噉樣啦，然之後啲年輕人見到你，啊，笑……笑你，然之後就嗰句嘢又變返一個meme囉。但係唔係你想用嗰個原因囉。所以即係meme呢樣嘢真係好神奇。

以：Meme真係要揾次講。好正。我係讀過meme㗎。不過好似唔關事，係啊。

苗：哦？係呀？咁得意？

靳：點樣讀啊？

以：因為我嗰次研究緊一首歌嘅……即係傳播吖嘛，即係令到好多人認識嗰首歌，係嘞，噉就用meme個概念囉。最後冇寫到嘅。

苗：邊首歌呢？

以：我都唔知何以我會研究咗首歌嘅，但係結果就係噉啦，係啊。噉係啊，噉我睇過啲文，係講meme嘅。Meme佢喺學術界嘅意思同我哋平時講嘅meme係更加廣泛，即係可以唔同人去到加自己的詮釋，噉樣就係meme囉，係啊。不過講返YOLO呢，可能今年嘅主題就係要多啲嘗試啦，係咪啊？韞住咗兩年，之後去多啲旅行？

苗：去到嘅話囉，到而家都唔得啊。

以：去到嘅話啦。

靳：首先要去到，首先要去到。

以：希望在明天啦，又係。

[08:42]

苗：最近呢，我又睇到一篇新聞呢，就係講呢個史丹福嘅一啲舊生啦。噉佢哋就整咗一個app出嚟。佢就係去嘗試改變你個口音囉。呢樣嘢……我唔理佢點樣做出嚟啦，即係點解佢要噉樣做呢？佢就話係即係有好多人……一啲學習英文嘅人啦，佢……即係呢一篇嘢係講英文啦。佢就話好多人就唔明佢哋講嘢嘅口音，噉就溝通有困難，噉所以就要呢一個噉樣嘅工具去幫佢哋去溝通得好啲囉。

以：嗱，唔係講緊改變你嘅口音喎，即係唔係幫你學習點樣講得比較……母語啲喎，而係你講完之後，佢幫你改變個口音，即係好似以前玩啲變聲器噉樣，變機械人聲，呢個就係變英國口音。

苗：即係好似自動翻譯機噉樣，噉我就對住佢講可能我自己口音嘅英文啦，然之後個電腦呢，就會自己去生成一個可能係標準美國口音嘅一句嘢出嚟囉。噉佢呢一個發明呢，即係嗰個發明嗰啲人，就話嗰個原因係因為大家去聽人哋講嘢嘅時候，好多時就即係focus咗喺嗰個口音上面。即係你聽佢講嘢，就話唉，話佢外國人噉㗎，啲口音。即係就會變咗著重咗喺嗰個人本身，而唔係佢講嘅嘢上面囉。即係佢哋嗰個目的就係想用呢一啲科技去消除咗呢個口音嘅隔膜，令到人哋去專心佢講嘅嘢，而唔係嗰個人嘅身份囉。

The rest of the transcript is available to Patreon members.