喺英國駁天線睇電視，同香港好唔同。

喺香港，一係你就噉駁就睇到，唔使錢；一係你畀月費，人哋同你特別裝個機頂盒，用嚟睇佢哋獨家嘅台。

英國有所謂TV Licence（電視牌照），睇某啲電視台要畀錢。

費用係一年£159，除返開係£13左右一個月。老實講，仲貴過英國Netflix（更惶論香港Netflix），如果你當係訂閱嗰啲頻道嘅話，唔係好值。所以先有咁多香港人問，可唔可以唔買。你諗做電視稅啦，買咗係為咗合法。

佢個官網好鍾意提佢有得揀黑白電視牌照，£53.5一年，但係……邊鬼個會買啊？？

香港人初嚟報到，可能唔清楚細節，就草率決定畀錢或者唔畀錢。

以下係幾條常見問題，由最重要嗰條開始：

我使唔使買牌照？

長話短說，如果你有睇以下內容，就要畀錢：

1. 任何直播節目，即係要特定時間收睇嗰啲（包括天線，或者用電視app睇直播；包括任何免費、收費電視台）
2. 智能電視、手機、電腦等，任何裝置上嘅BBC iPlayer（包括直播，同埋點播）

以下內容唔使畀錢：

1. 非BBC嘅電視台嘅點播，例如All4、ITV Hub（應該因為有廣告）
2. iPlayer上面嘅S4C台節目，即係威爾斯話（應該除咗我之外都冇乜人睇）

如果你有睇BBC iPlayer，佢都會間唔中問你有冇牌照。

噉非電視台，但係直播嘅「節目」（例如YouTube）呢？

佢網站上聲稱要，但係官方立場仍然好模糊。

因為佢嘅法例好老土（你見佢有黑白牌照就知），佢原意係YouTube上面睇嘅英國電視台節目要牌照。

而YouTube直播使唔使牌照，係視乎個節目性質「似唔似電視節目」、個頻道「似唔似電視台」，有好多拗嘅空間……換言之佢好可能懶得處理。

點樣買？

去到官網，跟佢嘅指示，入晒你資料，最緊要係地址，然後碌卡。

使唔使每人一個？

電視牌照係跟地址，即係你一間屋幾多人都好，都係一個牌照。如果你一個人住兩個地方，就要買兩個。

如果你租屋，我估計業主應該唔包，你要同佢check下。

手機方面，法律上，你間屋嘅牌照，會cover晒你成屋人嘅流動裝置。

另外，佢特別有一條例：如果你嘅小朋友為咗返學，會暫時住第二度（例如大學、寄宿學校），你嘅牌照會包埋佢喺嗰度用嘅手機（但係淨係手機）。

如果搬屋點算？

雖然TV Licence係跟地址，但係係可以轉去第二個地址嘅。

如果你要搬屋，只需要去官網報新地址，佢會自動更新記錄，將你個牌照淨餘嘅日子，搬去新地址。

當然，如果你舊屋仲有人，就要另外再買個新牌照。

如果你有兩間屋輪流住，就……自己衡量想唔想次次轉啦。

無牌睇電視會唔會捉？

理論上：

冇買牌照，睇要牌照嘅節目，係明確違反法例，可以罰款£1000，甚至要上法庭。

實際執行：

其實有少少似搭火車逃票。與其諗佢做Netflix之類嘅享受，倒不如當佢係公共服務。

大家都知道要畀錢，大家都知道有啲人唔畀錢，但係實際捉嘅機會頗細。佢據說係會上門檢查，但係抽中都幾難。

如果你成日睇電視，抽中你嘅機會會大少少，所以建議買。如果想買個心安，好似我噉，就畀定錢先，費事心血來潮想睇，又要囉囉攣。

如果你真係覺得負擔唔起£159一年，但係周不時又想睇，或者都博得過嘅。不過本站唔會建議犯法，後果請自負。

（或者你想公民抗命，都悉隨尊便啦。）

要留意嘅係TV Licensing雖然係執行緊法例，但係佢其實係外判公司，所以佢嘅主要目的唔係執法，而係收你錢，所以佢會用盡一切手段，兇到你磅水。

我冇買，佢寄信兇我，點算？

如果你肯定你唔需要牌照，就唔需要擔心。

佢聲稱會上門調查，但係網民一般都話，佢只係大隻講。就算佢上門，你都可以要求佢出示法庭搜查令。就算佢有搜查令，佢都要證明到你有睇電視，先告得入。你熄咗部電視，佢點證明呢？

我有諗過，佢會唔會見到插咗天線，就當係證明？佢會唔會有iPlayer嘅觀看記錄？我答唔到你，但係佢真係花錢花心思告你嘅機會，係微乎其微。

所以一句講晒：你良心過得去，就唔使驚。

此外，因為佢目標係收錢，所以佢會畀好多機會你補交，亡羊補牢。佢寄紅色信畀你嘅時候，只係表示佢展開調查。如果你買返個牌照，佢會一筆勾銷。

為確保自己安全，如果你真係唔需要牌照，可以填呢張表，正式通知佢。

噉英國有冇收費電視呢？

當然有，例如Sky就係最受歡迎嘅收費電視。

好似香港噉，佢會要你買月費，裝個機頂盒。

雖然我冇裝，但係據我了解，個人認為Sky嘅內容同影音質素都頗高，而佢個機頂盒又包埋智能電視嘅功能，啱睇嘅話係諗得過。

最近留意到Sky仲出咗自家電視機，連機頂盒都唔使裝添。

不過我唔係賣廣告，就講到呢度先。

有其他問題嘅話，不妨喺留言問我吖！

Wise低價國際轉賬，首次免手續費
VOXI送你£20加入無限社交媒體、無限睇片嘅平靚正電訊商
同我學外語
送你US$10搵老師學語言