飯：佢又係用Pimsleur學緊廣東話。佢琴日突然之間爆……走入嚟我間房，跟住問：「你食唔食……」噉樣。
靳：好得意啊，佢真係。
飯：但係最好笑呢，係佢唔同嘅聲調呢，佢為咗令到自己個腦get到個……係邊一個音階噉樣呢，佢就會……個……個身會跟住一齊郁囉，佢個頭：「你識唔識……？」
[jingle]
以：歡迎返到嚟《絮言．狂想》第五十八集，我係以色列。
苗：我係三苗。
靳：我係靳尼啊。
飯：我係Francine。
靳：哈囉！啊，係啊，我哋有阿Francine。
以：我哋今次唔使介紹嘞。
苗：又係你嘅？
靳：乜咁啱嘅？
飯：又係我，係啊。
以：又係你。呢個係我哋上次嘅嘉賓阿Francine，佢又返返嚟傾偈，因為傾得太開心。
苗：因為上次我哋本來諗住做一集嘅。點知呢，就……講翻譯，就已經講咗好耐嘞。講咗成個鐘。噉所以就再今次返嚟講
下其他本來想講嘅topic囉。
以：因為翻譯本身係一個field嚟嘅，即係人哋讀成個degree都係讀翻譯，所以你一個鐘都已經唔係好多㗎喇。
苗：可以開成個podcast㗎，呢個。
以：唔止啊。
靳：係啊，可以睇下Francine想唔想開個關於翻譯嘅podcast。
以：其實有潛質㗎。
靳：跟住我哋就可以crossover喇，遲啲。
以：OK喎，最鍾意crossover。
苗：呢個經濟圈。
飯：我諗如果我……我開podcast，我可能會做一個講織嘢嘅先。
以：Yeah，都得啊。
苗：都係可以。
以：但係我唔知點crossover。
苗：Somehow。
靳：呢個……呢個睇下可以點樣crossover。
以：嗱，《絮言》都有個糸字邊嘅，所以嗯，好似揾到個關係喺度。
苗：講呢啲？
靳：呢個係咪關子嚟㗎？我哋係咪即將有crossover呢樣嘢？
以：喂，唔知……喂！唔好講呢啲啦，唉！留返個驚喜畀人吖嘛。係啊，利申我哋今次唔係同一日嚟㗎，我哋係隔咗一段時間，之後再揾返阿Francine先上嚟傾偈嘅。
苗：呢個絮言陰謀論。人哋唔信㗎，你噉樣講，即刻就。
以：係咪此地無銀啊？變咗。
靳：我哋要嚴正聲明，唔係同一日嚟㗎，噉樣。
飯：唔係，你要講下今日啲新聞，跟住啲人就OK。冇可能可以上個禮拜講今日嘅新聞㗎嘛，係咪？
以：係喎！
靳：係啦，講下新聞啦！香港又打風喇！係啊。係啦，大家又可以留comment呢，究竟小犬呢，有冇掛到八號波啦。
苗：咩小犬啊？狗仔啊！
靳：狗仔？啊，係！狗仔。
苗：人哋話唔得㗎！香港人唔應該講小犬㗎，呢啲匪語嚟㗎嘛，係咪啊？係咪匪語嚟？
以：但係咩文嚟㗎先！
苗：其實好似日文嚟㗎。
飯：日文。
苗：こいぬ。
靳：日文嚟㗎。
以：因為日文……日文，噉你跟佢囉。你一講いぬ，即刻Q咗好多囉，成件事。
苗：小犬。呢個我嘅小犬。
以：我嘅小犬。
苗：犬兒嗰啲friend。
以：點解會去咗犬兒？
靳：係囉，點解上次呢個天鴿又唔叫鳩呢？
苗：咩日文漢字吖嘛！
以：日文係咩はと，係咪啊？
靳：咩はと。
苗：はと，就係個鳩字囉。你可以話咩「熱帶氣旋鳩，而家喺咩汕尾以南」……
以：佢進入緊呢個地域噉樣。我唔係好識做天氣預報。
靳：呢個字唔使嘟㗎，唔係粗口嚟㗎。
苗：冇粗口，冇粗口。
以：係鵲巢鳩佔嗰個鳩，雀仔嚟㗎，真係雀仔嚟㗎。
飯：關關雎鳩，在河之周。
以：係啊，呢個係我有限嘅日文裏面有嘅一個字。學日文學咗「鳩」先。
苗：日文由「鳩」字學起！
以：咩嚟㗎？雀仔。真啊。唔理三七廿一，雀仔先。我哋應該快啲出咗上一集先吖嘛，而家證明唔到我哋係分兩日㗎。係啊。
苗：都啱。就嚟得㗎喇。
以：就嚟得㗎喇。係啊，呢個就係我哋合作嘅behind the scenes喇。好，今日呢，亦都係特別嘅日子喎，因為呢，我哋係《絮言》三週年喇。
苗、飯：好耶！
以：出嘅時候唔係嘞。
苗：出嘅就過咗唔知幾耐。
以：應該過咗兩個禮拜㗎喇，我諗。今日錄嘅時候係《絮言》出嘅時候三週年，係啊。
苗：同埋都係以色列幾多週年啊？
以：呢個唔重要嘅。
苗：佢係嗰啲十幾啊……十……十幾歲嘅……你十八歲未啊？
以：十幾……十幾歲，係啊。差唔多喇，差唔多喇。
苗：十八歲零幾多個月啊？
以：係啊，我就嚟……就嚟考DSE喇。
靳：下次唔寫「大壽」，寫自己幾多週年噉樣。
苗：生存幾多週年。成件事好勵志啊，即係哎啊，我又一週年喇，噉樣。
以：其實生日本身都係呢一個……
飯：概念。
以：意思嚟嘅。
苗：係，噉你anniversary都係都係同一個字。有好多語言嗰個生日就係anniversary吖嘛。
以：係啊，係啊。但係「週年」好似係一個……發生咗一件事吖嘛，以前。
苗：係啊。出世幾多週年。
以：你阿媽做咗樣嘢，係嘞，之後……
飯：你發生咗。
以：我發生咗。
靳：我發生咗。
以：我係一個現象嚟㗎。以色列係一個現象。
苗：好勁喎，you’re a phenomenon。
以：好似……好似講到講政治定點添。唔好講，唔講，唔講。
苗：喂，今日又係以色列有啲新聞，唉，大家自己揾啦，呢啲嘢就。唔係呢個podcast㗎，另一個podcast。
以：呢個唔係我哋嘅area嚟嘅。可能……可能會揩到嘅，未來。但係……唔知。暫……暫時我哋唔講呢個住，以色列嘅新聞，就係……真係好識擇日㗎啫。
苗：咦？噉我哋《絮言》三週年，我哋要點樣慶祝啊？
以：有咩慶祝呀？有嘉賓囉。有我哋嗰個直播啦。仲有咩啊？
苗：嚟緊嘅直播。
靳：係嘞，如果大家冇聽到上一集嘅話呢，我哋上一集呢，都有呢個我哋今日嘅嘉賓阿Francine呢，嚟到我哋《絮言．狂想》嘅podcast啦。噉樣Francine呢，就係一個……就係以色列嘅大學同學嚟嘅，噉佢而家呢，都係做緊一啲翻譯上高嘅工作，噉我哋上集就講咗好多關於翻譯嘅唔同嘅內容啦。噉但係點解今日我哋又再請阿Francine先上嚟呢？上次講到唔夠喉？
苗：因為我哋呢幾個月……呢幾個月呀？都好似係。就係呢個匈牙利系列吖嘛。
靳：匈牙利系列。
苗：去到下一集都一定係啊。
以：係啊。其實Francine同匈牙利都好有關係嘅，即係literally有關係啦。
飯：喂！
苗：係咪啊？有咩關係？
飯：係，噉其實就係我老公係匈牙利人嚟嘅。係喇，就係噉。
苗：冇反應噉。
靳：大家冇反應。
苗：大家都冇反應。
靳：好耶！
飯：好。
以：使唔使「好耶」佢啊，我唔知。
飯：Understood，完。
苗：Noted。我哋去下一個topic。
以：因為呢個我知好耐啦嘛，我係……我有去婚禮㗎嘛。我……
飯：佢山長水遠坐……坐火車落嚟。
靳：係咪飲咗好多pálinka？
以：勁尷尬噉樣呢，一個戙喺度，對住成班匈牙利人。係咪我哋有啲提到過呢樣嘢呢？就係……我就係嗰陣時學咗szia一個字啦。
苗：Szia。
飯：你學咗szia？
苗：Szia就……see ya同埋hi。
靳：Szia, szia, szia, szia。
苗：拜拜就see ya！
以：就係因為全場都喺度……好多匈牙利人嚟緊，就喺度哈囉，哈囉噉樣囉。
飯：好有義氣啊，佢班朋友真係好癲。
苗：我哋終於揾到以色利嘅弱點。
飯、苗、靳：匈牙利文。
以：對住你哋三個咪係囉。
苗：抌你去求其一個歐洲國家都好易傾到偈，除咗匈牙利之外。
以：咪芬蘭囉。唔係，芬蘭用英文。
苗：講呢啲？
靳：去啲唔係用印歐語嘅地方，就唔識傾偈嘞，噉樣。
以：其他真係可以估到下。
苗：去巴斯克地區。
以：西班牙文係OK嘅，雖然我唔識西班牙文，但係聽得明啦。
苗：可以估到。
靳：三苗OK，我哋叫三苗去講西班牙文。
以：我哋係咪之後就係個巴斯克系列啊？
苗：我唔識㗎！人哋Francine用西班文寫論文㗎嘛！
飯：唔好噉樣。
以：啊，係啊。呢個上次講咗。
靳：呢個承上集。
飯：完……完全……我都話，我諗有80%應該畀返晒老師。
苗：呢啲唔知嘅。如果去pick up返呢，有時就會感覺到自己其實記得嘅嘢好多㗎，真係。你一時三刻，你唔係嗰個mode呢，你……你好耐冇用呢，你就會覺得：啊，好似咩都唔識。但係你一跳返落去，你就會突然間諗返去好多嘢囉。
以：係啊。個理論就係你學到去B咁上下，就唔會唔記得晒㗎啦嘛。只不過會拋諸腦後，但係可以掹返出嚟。
苗：好似踩單車噉。
以：踩單車噉，哦。好容易唔記得點踩單車㗎喎！咩你將架單車左右調轉裝，之後就突然間唔記得晒㗎啦嘛！
苗：喂，唔係講緊噉樣吖嘛。
靳：噉係踩唔到囉，噉樣直情係。
以：唔係啊！你即係你嘗試踩，噉然之後呢，你就會仆啦，噉然之後你再正常踩呢，都踩唔到㗎喇，聽講。我就唔敢試呢樣嘢嘅，我都係聽人講㗎啫。
苗：係咩？咁……咁嚴重？
以：係啊。好容易uninstall咗。
苗：係咪啊？
以：噉所以你寫得論文，應該都去到嗰個程度㗎喇。噉但係問題就係呢，呢三條友呢，都學過啲匈牙利文嘅。噉所以呢……
苗：「學過啲」係一個overstat……
以：嗱，我哋……我哋月尾去布達佩斯嘅時候，就靠你哋嘞。靠呢兩個仁兄。
苗：講呢啲？我唔……
飯：唔關我事嘅，我就唔去嘅。
以：你……你又去……你做咩唔嚟啫？你應該嚟啦。
苗：你地頭啊。
以：你返鄉下噉樣咋嘛。
飯：結完婚冇錢啊。
靳：返鄉下。
飯：下年先啦，最衰佢係今年。
以：可能都靠埋Francine㗎，到時text你，話「佢講乜嘢啊」噉樣。
苗：畀個錄音你，「佢講乜嘢？」噉樣，隊個電話畀佢。
以：翻譯，唔該。
飯：跟住我就會拍我老公：喂，老公，佢講乜嘢？
靳：可以即時……即時打電話問觀眾。
苗：打電話唔係問觀眾喎。打電話係問朋友。現場觀眾唔使……
以：有冇五十五十㗎？噉樣。
苗：即係你打電話有50%呢，就會打咗畀朋友，50%就打畀現場觀眾。
飯：原來係噉嘅意思。
靳：哦，原來係呢個意思。
以：點解溝埋晒嘅？啲嘢。
苗：都係法寶啫。
以：順便提下大家，我哋月尾有直播，快啲嚟Patreon參加。好，講完。
靳：係，我哋會喺布達佩斯度做直播嘅。噉所以大家快啲嚟啦。
以：我哋三個第一次見面啊吓！
苗：到時仲會有神秘嘉賓添。
靳：係，可能仲有嘉賓添。

The rest of the transcript is available to Patreon members.