以：噉之後嗰條友呢，就走埋嚟啦，之後同我講話：你識廣東話，好勁喎！之後我話：吓？我成世人第一次畀外國人讚我廣東話好……

苗：広東語上手！

[jingle]

以：大家都想做遲嗰個。

苗：就會變咗一樣。

靳：大家好猶豫噉樣……噉樣喺度拍囉，應該。

苗：最後都係一樣。

以：歡迎返到嚟《絮言．狂想》嘅布達佩斯直播啊，我係以色列。

苗：我係三苗。

靳：我係靳尼vagyok。

以：呢個係咩意思啊？

苗：呢個係加咗匈牙利文喎。Vagyok係咩啊？

以：係「我係」呀？

苗：「我係靳尼」。但係你係……

以：我係我係靳尼。

苗：但係你講咗「我係靳尼我係」，係。

以：好，噉我哋呢，都要介紹埋先。我哋……嘩，第一次有嘉賓一齊直播啊，因為就……呢個係我哋之前都出現過嘅嘉賓嚟㗎嘞，噉但係……唔係但係嘅，即係同埋佢同我哋一齊嚟咗布達佩斯呢一個Polyglot Conference啦，噉所以就邀請佢呢，就再次上嚟一齊傾偈喇。噉呢一位就係第三十唔知幾多集嘅詹屎嘞。嗰陣時我哋講客家話。噉嗰集係咩啊？「既賣祖宗回，又忘祖宗言」。三十七……八。

詹：啱，好，我係詹屎啊。大家好。

苗：哈囉。

詹：（客）大家好，大家好。

靳：（客）大家好。

以：好嘢！不過我哋講廣東話嘅，唔緊要。

苗：如果聽live嘅話呢，就會聽到好多呢啲噉樣嘅奇怪嘅dead air啊，或者喺度諗：哎啊，我哋之後講乜嘢啊？噉樣。

詹：踢波都係噉咋嘛，你開咗波，你要喺中間度搓下先噉樣。

以：啊，係喎！其實係。

靳：噉我哋點解去咗布達佩斯呢？其實。

以：係嘞，講返背景先。大家可能聽到我把聲，其實已經拆拆地嘞。就係……就係我哋去咗呢個啱啱講嘅Polyglot Conference啦，噉就係都係其中一個呢啲好多語言迷嘅活動啦。都之前講過嘞，我呢，就成日去Polyglot Gathering嘅，噉就係喺歐洲㗎啦。噉conference呢，就會世界各地周圍走嘅。噉阿靳尼同埋三苗呢，就……你冇去過吖嘛？詹屎。

詹：我第一次啊。

以：你第一次，係喇。靳尼同三苗就去過日本嗰個Polyglot Conference，噉難得呢，佢就返咗嚟歐洲一次，噉我就可以第一次去到Polyglot Conference喇。

苗：呢個係好得意㗎，因為本身呢，呢一個……今年嘅Polyglot Conference係suppose喺新加坡度舉行。但係因為好多場地租借嗰啲問題，噉就最後就好多風波啦，好多轉折，就最後返返嚟十年前第一屆Polyglot Conference嘅地方，就係呢度，匈牙利嘅布達佩斯囉。所以sort of係full circle啊，返返嚟。

以：係啊，還原基本步……唔係。

詹：係十週年呀？

以、苗、靳：十週年啊。

苗：所以你見到呢，個hall裏面有個氣球，10噉樣，就係十週年。但係佢冇人解釋㗎喎。

以：就係因為呢，我哋大家都miss咗嗰個開幕禮，所以就……

苗：係喎。

以：係喇。我哋第一日已經瞓過龍喇。少少。

苗：其實都唔算係嘅，係特登……即係係有計劃噉樣，唔係最準時噉樣去嘅。

以：有計劃噉樣唔同佢個開幕禮。

苗：因為都真係好早，佢九點就開始囉。八點開放登記，九點就開幕禮。

以：佢哋好似開幕禮有切蛋糕喎。我喺……我睇啲story講呢……

苗：有蛋糕食。

以：係啊，之後又有個氣球，即係好似生日派對噉樣。

靳：不得了啊。

苗：九點就食蛋糕？

以：係啊。好過九點飲酒嘅。

苗：咁chur嘅？

詹：早餐。你平時生完日之後，都係之後嗰朝做早餐噉樣。

以：即係中秋節之後，成個禮拜都係食月餅做lunch。

苗：成個禮拜都係食月餅。吓，一個禮拜咁少？

以：係，我屋企仲有月餅。

苗：我都仲有喎。就嚟要過期。

[03:30]

以：我諗起呢一個conference，我哋都幾diverse喎，啲人。即係有好多……英文叫differently abled啦，我哋中文點叫㗎？即係唔同……

苗：唔同……能力又好似好奇怪。唔同嘅……完全唔識講喎。

以：係囉，唔識喎。

靳：唔識講……唔識用廣東話講。

苗：因為廣東話係冇……冇呢個term。即係通常就噉叫傷殘人士、殘疾人士，但係我成日覺得呢個term係好奇怪，好似好……好惡噉樣囉。「殘」囉，話你，好似鬧你，你傷殘㗎。你癈㗎。

以：我……我就特別諗緊differently呢樣嘢，因為我係想講我哋又有……有唔同類型嘅殘疾人士喺度囉。

靳：我成日想講有……有唔同能力嘅人噉樣。

以：有唔同能力……有超能力。

苗：Differently abled……

以：如果係譯嘅話，就噉譯㗎喇喎。

靳：係喇，不同能力人士噉樣。

以：即係譬如我哋有唔同嘅語言能力噉樣。就differently abled。

苗：即係啲語言能力差嗰啲，就係……

以：淨係識五種語言？

靳：阿Sam話日文叫……應該叫做障がい者……

以：有冇振り仮名啊？

苗：係，請問有冇……有冇拼音？しょうがいしゃ。

眾：しょうがいしゃ。

苗：嗰個がい係咪……

以：障礙啊？

苗：係咪障礙個礙，但係佢哋……

靳：應該係障礙者，其實。

苗：但係佢哋唔識個漢字。

靳：因為佢唔喺常用漢字入面。

以：係啊，噉……

詹：但係仍然都係負面詞囉。即係都係一樣，障礙、殘障。

苗：傷……殘疾喎，你又殘又疾，即係有病喎。即係某程度上係將佢睇成一個需要醫治嘅一樣嘢囉。

詹：但係佢係其實係一個病嚟㗎？

以：嗱，呢個……呢個可以有得拗。

詹：譬如話你冇咗隻腳，噉樣咪係一個病囉。

苗：有得拗嘅，其實呢樣嘢。

靳：有得拗。

苗：即係譬如你好矮，噉係咪……係咪殘疾吖？

詹：唔係囉。但係少咗隻腳係吖嘛，或者冇咗隻腳。

苗：但係呢個定義係……係個社會畀你㗎啫嘛。即係如果個社會嗰個配套，係足夠令到所有得一隻腳嘅人嘅生活，係同兩隻腳嘅人係冇分別嘅，噉一隻腳就唔係殘疾囉。

以：即係大家都一樣咁正常囉。喂，阿Sam就講咗，的確，障がい係原本係障碍，即係我哋正體中文嗰個障礙。噉但係新字體，新字體係好似個「得」字嗰個……

苗：有少少似簡體字。

靳：應該係簡體字嗰個。

以：但係再改咗「障害」喎。都有啲似似地嘅。係喎，好得意啊，日文噉樣揾啲相類似嘅字嚟到代替。

苗：咦？我哋又有新嘅聽眾加入，阿Vamp。

以：阿Vamp，哈囉阿Vamp。

苗：係經常出現嘅阿Vamp。再似歡迎嚟吓。

以：我哋喺度講緊……

苗：阿Sam再應……再話畀我哋聽，就係話：當事人啊，係囉，啲……

以：即係障礙者。

苗：障礙者就唔鍾意個「害」字啊，障害嗰個害字，即係しょうがい嗰個害字，佢哋覺得唔舒服，噉所以最後就決定一半漢字，一半平假名噉樣囉，個障字，個しょう就係漢字，但係がい就係變咗淨係用……

以：就噉寫……

苗：淨係寫平假名。

靳：哦，呢個又幾得意喎，真係。

苗：即係特登避諱囉，somehow係。都幾……幾得意。

以：佢哋好多唔同呢啲solution喎。

詹：呢個係日文獨有先做到㗎喎，我諗緊係。即係其他語言好難……即係要避開某啲字啊……

以：又唔係唔得嘅，但係唔會囉。

苗：我諗起普通話嗰個ta囉，即係寫ta。其實佢呢個好奇怪，佢個問題係本身冇……冇呢個問題，然之後佢西化，就係有男仔他、女仔她，然之後再用返ta呢個他，嚟解決返呢個本身冇嘅問題。

詹：其實係。

以：嗰啲叫咩呢？多嚿魚囉。

苗：法國大餐。

詹：好地地人字部咪得囉。

苗：係啊，男人女人都係人咋嘛。

詹：其實係歧視男人，因為男人冇一個特別嘅部件。

靳：男字部。

詹：女就有喎。

以：我都間唔中同啲外國朋友講呢個噉嘅故事，就係無啦啦冇……嗰啲叫男女嘅pronoun，變成有，變返冇，真係。之後我就話：我哋廣東話冇呢個問題嘅！

靳：從來都冇呢個問題。

苗：大家都係「佢」。

以：大家都係「佢」。

靳：匈牙利文都冇呢個問題，所以都係好……

以：o，係咪o啊？

苗：ő。

靳：ő，ő。

以：ő，OK。

苗：係個o上面有兩撇囉。一個長嘅ö，即係ő。

以：好似兩點，但係又唔係兩點，係撇咗上去。

靳：ő。

苗：係啊。即係平時大家見到撇上去嗰個符號，但係佢就兩條囉，因為佢原本係……就噉兩點就一個短嘅ö，變咗兩撇就變咗ő噉樣，大家喺個chat度就會見到呢個字母。噉呢個咁簡單嘅元音呢，就係「佢」嘅意思喇。

[08:00]

以：噉啱啱講緊我哋呢個conference上面有嘅殘疾人士啦，或者障礙者啦，或者日文咩……可唔可以用廣東話讀呢個啊？

詹：障街者？

苗：好cursed喎。

以：係咪要學啲……啲香港讀……咩啊？「體之不自由乜嘢方」。即係其實即係行動唔係好自如噉樣啦。

詹：行動不自由な方。

苗：即係一啲……係囉，身體唔係好自如嘅人啦。

以：係，噉就係事關有一個……你哋本身識唔識阿Olga㗎？

苗：我本身唔識喎。係你……你介紹㗎嘛。

靳：應該唔識Olga。

以：哦，因為我喺網上啲……呢啲活動呢，都成日見到佢。佢真係好活躍嘅。噉佢就盲嘅。噉但係佢都係噉參加呢啲噉嘅嘢啦，噉講好多嘢啦。噉呢個係……我唔知係唔係真嘅，但係我覺得佢……係咪因為係用耳仔多呢，所以佢學啲發音，真係學得非常之好。

苗：嗯，佢冇畀嗰啲文字去distract咗囉，即係佢唔會影響咗佢嘅發音。我都聽過有另一個我睇開嘅盲人channel，噉佢就係Tommy Edison啦。其實佢唔係講任何語言嘅嘢，只不過佢有一條片，試過講一啲西班牙文字，然之後係講得比起其他普通嘅美國人，係發音非常之好囉。係囉。好多美國人就係見到啲字，就會強加咗佢對嗰個字母嘅……嘅idea落去嗰個發音度，噉佢就會變咗好似英文噉樣讀出嚟。但係如果你係盲人，佢就會直接聽個聲，咪直接讀返出嚟出囉。我使乜理你點串啫。

以：係啊。阿Olga佢本身係保加利亞人嚟嘅，噉我同佢傾過啲北歐話呢，佢隻隻都識㗎，隻隻都發得勁好。再加埋佢係音樂家嚟嘅，即係佢今晚會彈場音樂會啦，所以耳仔都好靈敏啦，可以好容易學到好多嘢。

苗：係好似以色列噉樣。

以：我想像唔到我睇唔到嘅話，點樣學一種新嘅語言。即係我自己好依賴閱讀嘅。

詹：我都係。

靳：係。有好多時有人講完一句嘢畀我聽，之後我係一定要睇下佢點寫，我先至會記到。如果唔係我十秒我就唔記得咗㗎喇。

詹：我覺得係同我哋記憶方法有關囉，我哋可能比較視覺啲，見到個字點串，就記得。淨係聽聲，就會可能記到嗰下，跟住之後就……

苗：會估錯啊。係啊，即係有個idea，但係會估錯囉。

The rest of the transcript is available to Patreon members.