靳：噉我哋要多謝我哋嘅patron，包括Anthony同埋另外廿八位嘅patron，多謝你哋。
以：唔好停住，我想講呢，我啱啱先發現今日係國際翻譯日。
飯：咦？
以：係啊，九月三十號。
飯：原來係噉樣。
以：因為我錄完呢，開Facebook見到我個friend po咗啲嘢，嘩，又會噉橋喎，真係。
[jingle]
以：有冇人想開波啊？算啦，歡迎返到嚟《絮言．狂想》第五十七集，我係以色列。
苗：我係三苗啊。
靳：我係靳尼啊。
以：調轉咗係好……
苗：次次都係以色列開始，然之後呢，以色列今日問，可唔可以有其他人開始，然之後靜咗。然之後都係以色列開始返。
以：講名嗰度呢，個次序唔同咗係勁唔慣㗎。因為聽咗五十幾次呢，之後……
苗：係啊，即係好似武藏、小次郎噉樣，你唔可以調轉㗎嘛。
以：小次郎！武藏！啊，好奇怪啊。
苗：茱麗葉與羅密歐。
靳：會好奇怪㗎。
苗：如果有聽我哋上一集嘅觀眾呢，可能會聽到，我哋本來係有一個嘉賓嘅。但係因為技術問題，所以就唔得啦。噉但係今次呢，就終於搞掂喇，終於fix咗嘞。
以：解決咗。
苗：用咗一個禮拜嘅時間，解決咗。
靳：係啊，終於唔使旁聽喇，我哋個嘉賓。
苗：哈囉。
飯：哈囉，哈囉。
以：大家係咪好shock呢，呢個係《絮言．狂想》歷史以嚟，第一把女聲。
苗：我哋過咗……我哋差唔多三年喇。
以：係喎，仲有一個禮拜就三年喇。嘩。
苗：應該出呢集嘅時候，已經可能係三年。
以：我諗我哋第一集就大概係三年前今日左右錄㗎，我想像到。
苗：係啊，因為我……就係我啱啱嚟到蘇格蘭嘅時候。
以：係咪啊？係啊。
苗：係啊，喺我個屋裏面錄。
以：絮言陪伴住你嘅蘇格蘭生活。
苗：係啊，我一嚟就係絮言，然之後絮言就係我。
飯：噉呢，祝你哋三週年快樂。
以：多謝。多謝你同我哋一齊慶祝啊吓！呢個歷史性時刻。介紹返先！嗱，因為呢，就係我識咗好耐嘅朋友嚟嘅，噉就叫Francine，你自介先啦。
飯：噉我叫Francine啦，噉我係本身喺香港住到我諗大學畢業啦。噉嗰陣時我喺中大翻譯系。喺跟住後尾過咗嚟英國，喺倫敦讀master。噉跟住嗰陣時讀完之後，就一路都冇返過香港。因為我喺呢邊識咗個男朋友，噉而家結咗婚。
以：Wow，一嚟就放閃喇。
飯：唔好意思。
苗：掁，掁親。
飯：係啦，噉我就係……我係真係做翻譯嘅，噉所以我係比較少有，係大學讀完嘅嘢，我係做嘢嘅時候係用得返嘅。
以：好犀利啊。
苗：嘩，呢個係夢想嚟㗎喎。
飯：係啊。
以：唔係啊，呢度呢幾個都係做緊佢哋讀嘅嘢㗎。Kind of。
靳：噉你都係㗎。
以：我……我未讀完書。
苗：係啊，你仲係逃避現實啊，你。
飯：有啲慘。我都覺得讀書係逃避現實。
以：係啊，呢個真。
苗：講起翻譯呢，因為我大學係讀語言學㗎嘛。但係呢，因為我係城大啦，噉所以佢嗰個學系就叫做翻譯及語言學系嘅。我哋嗰個玩法呢，就係我哋year 1入到去呢，噉就係冇主修嘅。就一係你喺year 2嘅時候讀語言學，一係就讀翻譯。噉所以嗰個分別就係讀翻譯啲人好明顯知你做咩㗎嘛，翻譯我夠知係咩啦，我有Google翻譯，我知咩嚟嘅。就算唔係做翻譯，都知道可以做翻譯。但係語言學就唔係囉，係相反囉，就係「即係讀咩㗎？」或者「有啲咩做㗎？」「有咩出路㗎？」
以：學英文囉。
苗：「讀咩語言㗎？」噉樣。噉所以係就算嗰個性質有少少相似，或者有……或者呢兩方有啲連繫呢，都令到人嗰個感覺好唔同啊。唔知阿Francine有冇呢個感覺，即係會唔會人哋問你：哦，你讀翻譯之後，係咪真係做翻譯㗎？
飯：都係嘅……唔係，因為中大個做法就有啲唔同嘅，佢翻譯系同埋語言學系係分開嘅。即係雖然係同一個……都係文學院噉樣啦，但係因為佢分開咗啦，但係我嗰陣時呢，因為佢其實翻譯系嗰個主修嗰個major requirement個分比較少啦，噉所以其實就會有好多credit可以周街揈噉樣啦，噉所以我嗰陣時就揈晒去讀其他語言囉。
以：我記得。
飯：係啊，噉我嗰陣時又修咗法文，修咗西班牙文。我其實係西班牙文minor咗，雖然我其實……我覺得而家應該畀返晒professor，乜都唔記得晒。太耐冇用。
以：我都未聽過你識西班牙嘅？識咗你咁耐。
飯：我係minor西班牙文㗎。我嗰陣時係寫到論文嘅，用西班牙文。
靳：犀利喎。
以：吓？我讀德文冇啲噉嘅嘢玩㗎喎。
飯：因為你……你如果要minor一個語言，你要讀……我唔知係咪其他語言都係噉樣啦，但係總之西班牙文呢，就係你如果要minor佢呢，你要讀兩個嗰啲……係咪唔知三字頭呀？開頭嗰啲course。
以：即係高級啲嗰啲。
飯：係喇，係喇。跟住我嗰陣時讀咗Spanish in Film。
苗：噉好嘅？中大有呢啲讀嘅？喂。
飯：係啊，跟住然之後就睇西班牙文戲，然之後寫西班牙文嘅論文噉樣。
以：好chur啊。
靳：即係你要睇得明套戲㗎喇喎。
飯：好好玩㗎，係啊。跟住嗰陣時睇咗嗰套咩……佢英文叫Pan’s Labyrinth。西班牙文就係El Laberinto Del Fauno嗰套啦。跟住同埋睇咗邊套呢？就睇咗Frida。
以：呢個反而唔識喎。呢個咩嚟㗎？
靳：我有聽過。呢個我有聽過。
飯：即係嗰個墨西哥嗰個女畫家呢，後生嘅時候撞車，跟住……係囉。
以：哦，跟住就係喇。但係之後你寫文要用西班牙文寫㗎？
飯：係啊！
苗：犀利喎。
飯：要分析佢嗰啲唔同嘅拍攝手法啦，個故事啊、啲情節啊、啲人物啊……
以：乜嘢啊？
靳：呢啲座底B2喎，呢啲。
飯：係啊，我都話……去過B2，跟住已經褪後……倒褪，唔知去到……而家有A2已經偷笑喇，而家。
以：中大現代語言點解咁……咁唔同嘅喂？我冇啲噉嘅嘢。我讀德文嗰啲文化科，全部都係用英文寫㗎咋喎。
飯：係㗎？咁開心嘅？
以：不過利申，我有一兩科我係……我係tran咗cred返嚟。因為我喺exchange嘅時候呢，我去咗瑞典呢，之後我讀德文文學喎。
飯：點解要噉樣做？
靳：冇話唔得嘅。
苗：我係去瑞典讀瑞典文，然之後tran cred係tran純粹語言course噉樣囉。因為城大係好鮓嘅，淨係得……得六種外語呀？係咪啊？有日文、韓文，跟住歐洲嗰幾個噉樣囉。
飯：嗯，即係都係啲好大路嗰啲。
以：其實中大都唔係多好多㗎咋。係港大特別多，我知道。
苗：港大係真係好多嘅，港大。
以：港大乜Q都有。
飯：又有咩梵文都有呀？有泰文啊、瑞典文都有嘅，港大。
飯：中大好似都有泰文。
靳：但係嗰啲好似唔可以做minor㗎嘛。
以：但係有吖嘛。
苗：某一啲可以囉。
飯：我淨係知中大嗰個俄文course係長期開唔到Russian II㗎囉。
靳：嘩，好慘啊。
飯：啲人讀嗰下，讀完一之後，就嚇到唔敢再讀二啊。
靳：見到晒啲啲……啲格啊、啲變位啊，跟住就傻咗。
飯：唔係，我嗰陣時呢，有啲同學呢，係連啲……連啲……Cyrillic alphabet都搞唔掂。
以：係咪未講你有讀俄文㗎？有……有講係咪啊？
苗：哦，又有㗎？
飯：我好似未講。咪都係嗰陣時揈cred，其中一樣有讀過嘅嘢囉。
以：呢個就係我熟悉嘅Francine嘅一面呢，就係識俄文啦。
靳：噉即係你喺中大嗰陣時，已經讀咗法文、西班牙文，同埋俄文㗎喇喎。
飯：同埋其實有讀German㗎。但係……
以：幾多cred！
飯：我去到III囉，我去到三囉。
苗：點解咁多cred嘅？
飯：翻譯個……個major requirement真係係好少㗎咋。
以：因為我睇過……我諗過讀翻譯主修嘅，之後後來我都諗過讀翻譯副修嘅。噉之後我睇過呢，噉全部都勁自由㗎，成個科係。你做乜都得咁滯㗎。
飯：係啊。
苗：咁開心。
以：即係我讀音樂系，就係勁fix㗎囉，即係你一定係讀呢幾科呢幾科嘅。之後我就淨返幾cred畀你去揈噉。噉我就抌晒去德文囉。
飯：我覺得你可以副修到翻譯，都好犀利。
以：冇，冇副修到，最後。利申。
飯：哦，你最尾冇副修到呀？
以：我放棄咗啊。
飯：哦，但係你成日走過嚟……
以：我淨係去咗一半囉，之後放棄咗囉。係喇，呢個就我哋噉樣識㗎喇，我哋就係我讀翻譯嘅時候……
飯：係啊，我哋係嗰個……我哋係邊個course啊？
以：Fac pack㗎，其實應該係。英文。
飯：我成日都唔記得，係啊。
以：係一年班嘅時候讀英文，因為我哋係要讀英文嘅。
飯：係啊。
以：之後……唔係喎，唔係喎，唔係一……二年班！唔係啊！係咪啊？
飯：好似係。係咪Jane Austen嗰舊嘢？
以：有……有好多啲中英文班，係我哋skip咗嘅。但係之後有一個冇得skip，之後我識咗Francine。之後就發現：咦？乜原來你又讀俄文啊，又乜Q都識嘅，點解咁勁嘅？
靳：即係大家就……呢個燃起咗呢個語言之火。
以：其實某程度上係㗎。呢個係以色列個origin story。
[09:09]
靳：係嘞，講起西班牙文呢，我哋呢排有個新聞呢，就係同翻譯有關嘅。而且有一啲警號亮起咗啊。我唔知大家有冇聽過有個網站叫做Gizmodo嘅，噉Gizmodo呢，就係一個講科技新聞嘅一個網站噉樣樣啦，噉類似雜誌噉樣樣。噉呢，Gizmodo呢，就將佢個公司入面呢，所有翻譯西班牙文嘅員工呢，全部炒晒。仲要係用呢個視像嘅方式炒晒啲講西班文嘅員工噉樣樣。點解呢？就係因為佢哋呢，開始呢，用AI嘅翻譯去做佢哋翻譯做西班牙文呢個工作啦。噉佢嗰個畀人炒咗嘅員工呢，就話：哎啊，真係畀AI搶咗我哋份工嘞。

The rest of the transcript is available to Patreon members.