以：佢話大家都應該學廣東話啊！
苗：啱啊。
以：噉就變咗做嗰一集嘅題目嘞。之後我……佢都唔記得係佢講，佢以為我講㗎喎，我話：唔係啊，你……你講先㗎，嗱！
靳：呢個係咪都係我哋節目嘅官方立場，就係大家都應該學廣東話？
以：啱啊。
苗：冇錯啊，係啊。快啲嚟買逐字稿！啊，唔係。
以：啊！講開……唔係。
靳：講開如果大家鍾意我哋節目嘅話呢，我哋係有個Patreon㗎！噉喺Patreon上高呢，係會有完整嘅逐字稿㗎！
以：唔係，唔係。陣間先，陣間先。
靳：太早。
以：太早，太早。
苗：冷靜，冷靜。
[jingle]
以：歡迎返到嚟《絮言．狂想》第六十一集，我係以色列。
苗：我係三苗。
靳：我係靳尼啊。
以：係嘞，我哋上次呢，就講咗新年快樂啦，噉但係其實上次就呃人嘅，因為我哋係喺舊年錄嘅。今次就真係喺新一年錄喇。噉我哋喺新一年，就有新嘅開始啦！噉大家so far呢一年過得點啊？過咗半個月左右。
苗：都係噉囉，其實。
以：都係噉囉。又要繼續過日常嘅生活，又要返工，又要……
靳：返工、放工噉樣囉。
苗：時間係一個social construct嚟㗎嘛。
以：時間係想像出嚟㗎。
苗：係啊，即係冇……冇鐘，冇measure啲時間嘅嘢，時間係唔存在嘅。
以：係咪啊？冇人去感受時間，時間係會唔存在嘅。係咪呢？
苗：呢個畀三秒時間大家諗下。
以：喂。起……起碼新一年、新一月，呢啲全部都係作出嚟嘅。所以對我嚟講，都係一日一日噉過啫。係咪啊？
靳：歡迎返到嚟《哲學．狂想》。
以：啱啊，我哋最鍾意就唔小心講咗去哲學㗎喇。不過因為而家係一月中到啦，噉就同大家講返先！因為我就最近上咗呢一個叫Speaking Tongues Podcast。/ˈpɑdˌkæst/。噉我有聽開呢個podcast嘅，但係可能我哋嘅聽眾唔知會唔會接觸少啲呢？噉佢係……個主持叫Elle啦……sorry，唔係Ella，係Elle……啦。噉佢係揾啲唔同嘅多語言嘅人嚟到傾偈囉。噉就係唔一定好多語言嘅，但係like多過一個語言嘅人囉。噉就問下佢哋唔同語言背後嘅故事啊、或者生活噉樣。噉呢，我就好似前年呢，已經同佢傾緊錄一集㗎喇。
苗：咁勁？
以：噉但係我哋舊年十一月就錄咗啦，噉就講咩呢？你估下講乜嘢？
苗：講廣東話！
以：梗係講廣東話啦。我都有同佢講㗎！我話我喺我個show度呢，其實我哋唔係淨係講廣東話嘅。即係我哋係講廣東話，但係唔係講關於廣東話嘅嘢。
苗：係、係、係。
以：係喇。
苗：只係用廣東話去講好多唔同嘅嘢。
靳：即係你會用其他文講廣東話，同埋用廣東話講其他文，但係你唔會用廣東話講廣東話。
以：其實真啊。因為我哋就之前有傾過㗎嘛，好似好多啲用廣東話講語言嘅節目呢，就係講廣東話。
苗：係啊。
以：係咁多。所以我哋就話：嗯，不如我哋就唔好講廣東話，就用廣東話講其他話。好亂啊，係咪啊？因為我哋冇「talk about」呢一個phrase吖嘛！我前排都有同學生講呢樣嘢，就係……
苗：「講關於乜乜乜」囉，要。
以：係囉，你要「講關於某樣嘢嘅嘢」噉樣。「你講關於廣東話」好似爭緊啲嘢噉㗎嘛。
苗：「討論」囉，可以話。
以：譬如我同你講哲學噉樣。
苗：討論……噉就係討論哲學。但係「我同你講廣東話」就有兩個意思囉。
以：有歧義囉。噉係囉。噉所以就同佢講廣東話啦。佢話原來我係第一個同佢討論廣東話嘅人囉。我話：吓？咁神奇？你一百三十三集喇喎！
苗：係囉！百幾集，竟然第一次講廣東話？
以：我真係好shock囉，嗰陣時。周街都係廣東話人。
靳：佢又有講過其他亞洲語言㗎嘛！
以：有啊！有啊！最好笑就係呢，我嗰陣時同佢討論我哋傾乜嘢嘅時候呢，噉嗰陣時其實就係基本上係我諗緊……即係我哋早幾集講《請說國語》嗰本書嘅時候呢，嗰一個主題囉。因為講呢啲小眾語言。噉同埋我同佢plan緊呢集嘅時候呢，就係我舊年四月準備講嗰個講座嘅時間嚟嘅。所以呢，就諗住講台語啦、講威爾斯文啦。但係佢就話：咦，我最近已經有一個嘉賓嚟講台語，一個嘉賓嚟講威爾斯文，你噉樣同佢重疊咗嘅？嘩！有冇搞錯啊，你講台語都未講廣東話？
苗：係囉，好得意喎。即係一啲你會以為好多人講，或者……因為呢樣嘢其實好多英文國家都會有㗎嘛，講廣東話嘅人。
以：係啊，係啊。
苗：噉所以其實到而家都冇，係真係好驚訝囉，我覺得。
以：係啊，可能真係機緣巧合。
靳：某程度上係好興講廣東話？
以：其實係喎。可能too mainstream啊，係咪啊？
苗：哦，即係……即係唔會揾人嚟講西班牙文、德文、法文。廣東話都係好多人講嘅。
以：可能係夾咗喺中間。因為嗱，如果你講官話、普通話，噉就好make sense，因為真係好多人講啊，好常見嘅語言。但係之後如果你講譬如台語，噉就真係講緊佢係小眾語言呢個角度。之後廣東話喺中間，即係又唔係好大、又唔係好細。
苗：都係啊，佢係介乎主流同埋少數語言之間囉。佢同時係一個主流語言，同時係一個少數語言囉。
以：係啊，呢個就係個paradox喇。
靳：個悖論啊。但係英文講廣東話，通常都係講佢嘅處境比較多啲㗎嘛。你真係好似你噉樣……因為我有聽少少啊，但係你有講到即係廣東話有啲咩特別嘅地方，即係喺佢本質上有啲咩特別嘅地方，呢個係少人講㗎，我覺得係。
以：哦，係啊，係啊。都難得喎，係啊。好多人……
苗：本質上嘅意思係咩啊？
以：即係佢問我廣東話有咩特色囉。即係佢一開始劈頭就問：啊，到底廣東話係點樣㗎？譬如有冇格啊、性啊，等等呢啲噉嘅嘢囉。
靳：冇乜性格㗎，廣東話。
以：佢……佢循例都會問好多呢啲噉嘅嘢，譬如話有冇聲調，噉大家都知有聲調啦。噉我同佢介紹呢啲嘢囉。係啊。都啱喎，好多時候啲人喺英文世界講起廣東話，都係講緊：啊，佢同官話有咩關係呢？有咩分別呢？噉樣。
苗：嗯，係，係。而你就係抽離噉樣講，即係獨立淨係睇廣東話本身有啲咩特徵囉。即係喺一個比較宏觀嘅角度嚟睇，而唔係每一次提佢，都係同官話比較。
以：係啊，係啊。都有講少少即係關於官話嘅嘢，因為始終我哋有講啲我叫做語言政治嘅嘢啦。即係語言之間嘅關係嘅不平等，呢啲噉嘅嘢囉。噉都有提到嘅。噉但係主要佢真係對廣東話有興趣，噉譬如話我哋講啲嘢點樣……點樣cut短啲英文字呢？之後佢就話：嘩！好……好efficient啊！噉樣。佢話大家都應該學廣東話啊！
苗：啱啊。
以：噉就變咗做嗰一集嘅題目喇。之後……佢都唔記得係佢講，佢以為我講㗎喎，我話：唔係啊，你……你講先㗎，嗱！
靳：呢個係咪都係我哋節目嘅官方立場，就係大家都應該學廣東話？
以：啱啊。
苗：我都聽咗你成集嘅。其實我都覺得係幾得意囉，雖然我唔會話學到啲新嘅資訊，但係聽即係另一個主持佢講……佢對於你講嘢嘅反應，噉都係覺得幾特別嘅。
以：係啊。
苗：即係因為好少會係咁……好似一張白紙噉樣開始聽你講關於廣東話嘅嘢。即係可能我身邊嘅人本身都對廣東話有啲認識啦，一係本身就識講，一係我啲朋友，就算佢唔識講，都係因為識我，或者本身都係學語言嘅人，噉所以就對廣東話有認識，但係……
以：有啲認知，嗯。
苗：係囉。幾……幾特別囉，噉樣即係聽佢嘅角度啊，究竟佢會對乜嘢有……覺得有興趣，會覺得乜嘢係……咦，咁新奇？有啲乜嘢係佢識嘅，噉即係呢啲都好有趣囉。
以：由其是佢係從一個冇乜預設嘅角度嚟問囉。因為好多時候啲人一講廣東話，佢已經有好多關於廣東話係乜嘢嘅諗法噉樣囉。係啊，即係可能好多時候佢哋會熟悉官話係乜嘢嚟嘅，噉就……就會從嗰個角度入去，係囉。
苗：係啊，有啲既定嘅諗法。
以：所以都好……好……好有趣。
苗：係啊，所以大家快啲去……快啲去聽喇。
以：係啊，畀個拎大家去聽下。係啊，都支持下佢，雖然佢好似多好多聽眾，不過……
靳：鼓勵大家聽多啲podcast。
以：啱啊。佢個podcast我本身好鍾意㗎，所以……
苗：快啲去佢個podcast度留言，叫啲人聽我哋個podcast。
以：喂！啱啊，啱啊。佢個YouTube頻道好少人聽，佢反而係喺傳統podcast嘅平台多啲囉。所以大家去佢個IG留言，叫佢聽我哋個podcast。佢話佢本身呢，係會問多啲關於學語言嘅嘢嘅，但係佢後來就變咗做問多啲關於語言同生活嘅嘢囉。係啊，即係問你點解識呢個語言啊、你……呢個語言對你有咩意義啊，噉樣嘅嘢。所以係同其他語言podcast可能有啲唔同，係囉。因為好多時候……at least我聽開嗰啲呢，就會講：嗯，你點樣學法文呢？噉樣。
苗：係啊，係啊。即係會好……專注咗學嗰方面，而唔係個嘉賓本身嗰個人囉，係咪啊？
以：係啊，係啊。
苗：即係呢個比較似係人物專訪噉樣嘅感覺。個語言係一個主題囉，但係唔係話個學語言本身囉。
[09:29]
以：嗯，講開學語言呢，新一年新開始啦，噉我就……我想講下呢啲生活嘅小點滴啊。就係我開始咗上一個手語班啊。今次呢，我真係喺呢一個Deaf Centre度上囉，而唔喺大學上囉，噉就有個聾人老師，就唔同好多。
苗：噉你之前喺大學上，唔係聾人老師咩？
以：之前唔係啊。
苗：哦，係呀？哦，因為我都試過喺大學上一個sem，都係聾人老師嚟嘅，喺愛丁堡大學。

The rest of the transcript is available to Patreon members.