以：喂，但係你講起R呢，我諗起……有冇發現呢，有時香港人講英文呢，會有個……多咗啲R喺後面噉樣？即係idear噉樣，ide……
靳：你有冇idear啊？
苗：我大學有個lecturer呢，係將……即係HALL嗰個hall，變咗做whore囉。
以：我……我今晚喺concert whore。
[jingle]
以：歡迎返到嚟《絮言．狂想》第六十二集，我係以色列。
苗：我係三苗。
靳：我係靳尼啊。
以：阿靳尼你而家見點啊？
靳：我OK啊，係有少少鼻塞啫。
以：竟然係鼻塞呀？
靳：係啊，我唔知點解啊。
以：定係未醒咋？
靳：我諗有一半係未醒，有一半係鼻塞啦。
以：邊邊係未醒，邊邊係鼻塞啊？
靳：左邊係未醒，右邊係鼻塞。
以：哦，所以你左眼而家閂埋咗噉樣。
靳：係啊，係啊，係啊。係喇，而家……係咪要報一報時啊？而家係清晨嘅五點二十四分。
以：係啊，我哋好似第一次喺英國時間夜晚錄啊，所以辛苦晒靳尼。
苗：其實大家都一個唔係幾好嘅時間囉。英國就比較夜喇，然之後香港就……睇你點睇啦，好早或者好夜啦。
以：哦。
靳：我都試過呢個時間瞓覺嘅。但係我係已經瞓咗一覺㗎喇。
以：OK。對你嚟講，你覺得五點係好早定好夜啊？
靳：一般嚟講，係好夜嘅。
以：OK。
靳：今日嚟講係好早嘅。因為我係預料到我會起身吖嘛，所以我就會覺得好早。
以：哦。即係好似我平時……譬如話三點，對我嚟講係好夜嘅，即係係瞓覺時間，但係……
苗：即係究竟係凌晨三點，定半夜三點呢？
以：係嘞。但係我……我要搭飛機嘅時候，就會係「嘩！三點好早啊！」噉樣。
苗：係睇下你瞓咗覺未。即係你要……打算係瞓覺，定係你啱啱起身囉。睇下你個觀點係咩囉。
以：係啊，我有經常同人討論呢，即係……或者有人嚟問我啦，我唔識答嘅，但係人哋問我：「啊，呢個語言裏面呢，一點鐘am係朝頭早，定係夜晚？」我話：「睇人㗎喎，大佬！我點答你啊？」可能某一個文化，一般嚟講都會視為係朝頭早……譬如英文，興講一點鐘係朝頭早嘅。
苗：係。
以：噉但係有時係睇人囉。
苗：但係都好少會講……譬如上午一點、兩點，你好少會講night。即係你midnight就真係midnight……可以middle of the night嘅，但係如果你譬如講one，一定係in the morning，你唔會係one at night㗎嘛。
以：係啊。但係我哋唔會講朝頭早一點㗎嘛，多數。
靳：我哋會講夜晚一點㗎嘛。
苗：半夜一點囉。
以：半夜囉，半夜囉。都係屬於夜晚。
苗：凌晨一點，你覺得接唔接受吖？凌晨十二點可以㗎嘛，噉凌晨一點都可以㗎嘛。
以：唔係，凌晨一點得！
苗：但係朝早一定係日出之後先可以㗎嘛。
靳：凌晨係要日出之前，先叫凌晨㗎嘛，唔係咩？
以：啱啊。The wee hours。
靳：The wee hours係咪因為啲數字好細，所以叫wee hours？
苗：咦？
以：唔係屙尿嘅時間咩？半夜起身去……
苗：乜嘢？原來係噉解㗎？
靳：呢啲係前列腺有問題喎，屙得好頻密喎，噉樣就。
以：半夜急尿特別急㗎嘛，因為你要勁急先會紮醒。梳。
靳：跟住間屋又好凍吖嘛，唔想……唔想起身啊。
以：喂，我細個真係噉以為㗎！我點鬼知道wee係咩意思啫？大家喺留言講，你以前幾時學咗wee呢個字係咩意思，即係喺呢個蘇格蘭英文裏面。係咪好犀利？我哋講下時間，又變咗講語言喇。係啊，噉……
苗：係，我諗起呢，前兩日同個保加利亞朋友傾偈，又係呢，我哋好似對於night嗰個定義有少少唔同囉。即係佢諗嘅night呢，就係一定係半夜嗰種，佢會叫night。或者係……即係瞓覺時間，佢會叫night。其他時間佢叫evening囉，一定係。其實我係……當初學英文嘅時候，對於evening嗰個想像係類似黃昏時間，可能六、七點噉樣。之後我會叫night囉。但係又好似好多人用英文嘅時候，evening其實係可能九點、十點都可以係evening，即係睇下你點樣睇囉。係囉，晚安囉，嗰啲叫good evening㗎嘛。即係你good night係拜拜。
靳：Good night係「我去瞓覺嘞！」
苗：因為佢suppose就……係囉！嗱！即係願你有個好嘅night，因為night係瞓覺嘅時間。噉所以而家就唔係night，噉樣嘅意思囉，係咪啊？
以：哦，咦？係喎！我冇諗過呢樣嘢添。我冇諗過點解good night係一定係瞓覺前講喎。又make sense喎，噉樣。
靳：係吖。
以：但係我諗返我英文嘅語感嚟講，我會覺得十點已經係night囉。雖然我唔係十點鐘瞓覺嘅人。但係可能喺……主流係十點鐘瞓？所以……
靳：主流係十點鐘瞓。你係非主流。
以：我一定非主流㗎喇。我係……我係三點嘅朋友嚟㗎嘛。
苗：三點嘅朋友。
以：山頂嘅朋友。
苗：但係如果你聽……譬如晚間新聞噉樣啦，即係佢就算係九點、十點都係叫good evening㗎嘛。
靳：佢哋唔係直情叫evening news㗎咩？
苗：係囉！佢唔會叫night news㗎嘛。
靳：瞓着咗先至睇新聞，就叫night news喇。
以：我覺得我哋噉討論係冇乜意思。我不如呢……不如大家都喺留言討論下呢，即係到底evening同night條線係劃喺邊度，同埋你傍晚同埋黃昏同埋夜晚，你條線又劃喺邊度，有咩……有咩唔同呢？我好想知道即係唔同人有點樣嘅睇法。我覺得真係好睇人㗎，呢個。文化同埋人都有影響。
苗：我覺得地理都有影響啦。即係你香港，嗰啲日照時間比較平均㗎嘛。但係如果你高緯度啲……
以：哦，又係喎。
苗：唔同嘅季節就爭好遠嘅時候，你會唔會用嘅詞語有唔同呢？會唔會跟個日照呢？定係純粹跟幾多點呢？留言話畀我哋知就得嘞。
以：我覺得一定有啊。阿靳尼而家日……日出未啊？
靳：未啊，未日出啊。
以：未呀？哦！夜晚囉，即係！係嘞。我哋都係……大家都係夜晚錄。
[05:51]
以：講返返嚟呢，我哋呢集真係得來不易啊。即係唔知有冇忠實嘅聽眾發現我哋又好似唞咗一陣喇。我哋上一次就係農曆新年嗰集啦，其實我哋係一月錄㗎喇。都有發生咗好多事啊，嗱！唔知大家聽唔聽得出呢，我把聲就係康復緊嘅。
苗：喂，幾好吖！
以：所以可能我要講少啲嘢。係咪好有磁性啊？
靳：幾啱錄podcast啊，我覺得。
以：係咪啊？我係咪應該全程用呢一把有磁性嘅聲音嚟講嘢？之後chok埋把聲噉樣，噉就大家都好享受喇嘞。我唔知。
靳：你可以chok下……「歡迎大家收聽呢個深宵嘅音樂台，我係大家嘅節目主持人靳尼」噉樣。
苗：靳子誠？
以：我前排都有聽返我哋開始嗰幾集呢，我把聲係真係噉樣㗎。即係「歡迎返到嚟《絮言．狂想》第二集，我係以色列」噉樣。
苗：大家即係對於做podcast嗰個理解有少少唔同囉，可能覺得一定要係好正式嘅，成件事。即係你係表演緊噉樣，而唔係一個三個人之間嘅傾偈噉樣囉。
以：噉都好睇你咩podcast嘅。
苗：係係，我諗我哋呢個定位係比較輕鬆嘅。噉就冇咁多呢啲一定要咩chok聲嘅限制囉，我哋又唔係咩……咩正經嘢。
以：字正腔圓。
苗：我哋好唔正經㗎。（鄉音）我哋巧多懶音㗎。
以：係囉，我自然噉講嘢，噉就有……有啲懶音囉。我覺得我係少過大家嘅。噉我哋懶音呢樣嘢呢，應該都有講過㗎嘞。不如講下呢一集嘅背景啦，除咗我哋隔咗好多個禮拜都錄唔到之外呢，因……因為各種原因錄唔到啦，係嘞，都唔詳細講嘞，一匹布咁長。但係我哋諗緊講咩嘅時候呢，我哋諗起……嗯，我哋次次呢，阿靳尼都喺度講話：我哋個Patreon啦，間唔中會有投票畀大家揀下講咩㗎喎。之後睇下我哋上一次投係幾時呢？
靳：係幾耐之前？
以：二〇二二年。係啊，我哋今日係嚟兌現對大家嘅承諾嘅。因為呢，嗰一次呢，我哋嘅patron呢，就揀咗呢個矯枉過正呢個主題，所以我哋呢，今日就找數喇。噉但係喺我哋進入呢個主題之前呢，都反正講開Patreon呢……
靳：噉如果大家鍾意我哋嘅節目嘅話呢，我哋都有個Patreon嘅頁面嘅，正如我哋啱啱所講啦。噉係如果成為咗我哋嘅patron嘅話呢，係可以聽到我哋嘅bonus material啦，睇到我哋呢，完整嘅逐字稿啦，噉同埋呢，可以join我哋嘅Discord server，我哋有時呢，都會喺上高呢，會有一啲直播嘅環節噉樣樣嘅。噉我哋都會預先同大家講我哋幾時會有直播嘅。我哋上一次嘅直播，就係喺匈牙利嘅Polyglot Conference啦，噉所以，嗯，我哋都可以睇下，哎，嚟緊仲有冇機會呢？噉同埋呢，我哋曾經都有呢個投票……
以：會有㗎喇！我哋咁耐冇做，係因為我哋仲未兌現嗰個承諾吖嘛。我哋而家做咗呢集呢，我哋就可以開新嘅投票㗎喇。係啊，所以唔知幾時，但我哋承諾，嗱，我哋會找數嘅。就算等年幾都好，會找數嘅。係喇。點解諗起想講呢個主題呢？因為我最近開始幫其他人剪呢個podcast啦，噉佢係一個波蘭文嘅podcast嚟嘅。之後我發覺呢，佢哋凡親對稿讀呢，因為佢哋嗰個格式係會有稿嘅。佢哋一對稿讀呢，把聲會唔同咗㗎，完全。佢哋發音呢，係真係完全另一回事，同佢哋正常講嘢。其中最搶眼嘅地方呢，就係……即係可能我都已經講過㗎喇，就係波蘭文裏面有個鼻音ę呢，ę……
靳：ę。
以：噉其實正常講嘢呢，就唔會講ę嘅。譬如「我想要」就係chcę，chcę，但係冇人講chcę嘅，係講chce。噉但係佢哋一對稿讀呢，就會變咗chcę。我就諗緊：嘩，咁誇張嘅？個分別。即係就算係佢其中一個成員呢，係一個波蘭文老師嚟㗎。佢好反對呢個矯枉過正嘅讀法，但係佢都會忍唔住噉讀咗出嚟㗎，所以我就好好奇，係喇，呢個心理係點樣嘅呢？
苗：可能係潛意識上，即係好似你正式寫文，同埋你去text人哋、text你朋友噉樣，佢係本質上兩個好唔同嘅活動。

The rest of the transcript is available to Patreon members.