以：我係噉忍唔住講，you know，「L」嗰⋯⋯另外嗰個意思。即係其實大家都知係嗰個意思，但係大家都講「填詞L」，之後我一講嘅時候就要窒一窒，咦唔係喎，我哋係講L嘅。
苗：噉套戲真係噉叫㗎喎。
以：係啊，我知啊，個個都係噉講𠺢嘛，因為個個自我飲茶咗吖嘛。
苗：下話。
靳：自我飲茶。
以：好似我講噉樣囉，我講嘅時候我諗：嗯，填詞⋯⋯唉唔係，係「L」。
[jingle]
歡迎返到嚟《絮言・狂想》第六十⋯⋯oh，六⋯⋯六⋯⋯六⋯⋯六十四集。係，冇問題嘅。我係以色列。
苗：我係三苗啊。
靳：我係靳尼啊。
以：我有諗過係咪第五十三點五集定係⋯⋯直接去第六十五集，定係。
靳：我唔知你講緊啲咩。
苗：咩啊？點解⋯⋯點解要噉嘅？
以：我都唔知你⋯⋯我都唔知我講緊啲咩，係啦，點解嘅？而家四月咋，話說。大家最近有冇掟去呢？
苗：有冇掟呀？近排都係睇下戲噉囉，出去。呢度都原來都好多港產片，我發覺。佢係⋯⋯我試過呢，我係睇譬如某一日有啲咩片啦，我最⋯⋯最近屋企嗰間戲院呢，係有唔知三四套戲噉樣，然後有一套就係港產片囉。
以：咁犀利？你嗰度都有呀？嘩？
苗：係啊，即係有咩《Dune 2》，跟住又唔知乜嘢又唔知乜嘢，跟住就係我哋嘅《填詞L》囉。
靳：《填詞L》。
以：哦～你平時多唔多去睇先？
苗：都⋯⋯間唔中都有嘅，其實都係嗰一間啊，我見港產片通常都係嗰一間囉。我哋附近有幾間嘅，但係通常都係同一間有港產片囉，其他就比較少啲啊，好似。
以：我感覺都係一個城市可能市中心有一間，噉樣。
苗：係。
以：我都，我之前有冇去過睇呢？我最近嗰次都係要特登去一間比較偏少少嘅戲院，噉但係都係市中心嘅，噉先睇到囉。
苗：哦。
靳：你有冇睇過啲咩港產片？
苗：我睇咗⋯⋯我睇完《填詞L》之後睇咗MIRROR嗰套⋯⋯嗰套戲囉。
以：哦。
靳：哦，《十二怪盜》係咪？
苗：係啊，都係同一間囉。
以：有冇⋯⋯呢度有冇呢？噉都應該係嘅，係囉，可能佢啲大院線裏面可能就係有一間係專係加埋呢啲⋯⋯
苗：係囉。
以：即係所謂國際嘅電影喺度囉。
苗：係。
以：對佢哋講係比較artsy啲𠺢嘛，要睇字幕嘅，噉樣。
苗：好神奇啊，因為我係睇完⋯⋯我唔記得咗係邊一套啦，但係出嚟嗰陣呢，嗰個PA係播緊廣東歌㗎囉，係比較舊少少嗰啲，但係都係播緊囉。即係去廁所突然間聽聽下，「咦，點解會噉嘅？」噉樣。我已經出咗個戲院㗎喇喎，出咗嗰個theatre喇喎，點解仲有嘅？
以：上腦喇你。
靳：定係嗰度有工作人員係香港人嚟㗎，其實？
苗：可能係個manager或者佢⋯⋯總之佢識呢一首歌噉囉，唔知係邊個嚟嘅，manager。
以：嘩⋯⋯可能真係有自己友裏面做緊。
靳：或者又鍾意香港文化嘅人。
以：但係佢播舊歌可能係⋯⋯係囉，可能佢係走去search下。
苗：咁啱嗰隻係啫。
以：哦，噉都應該有人有心機擺落去嘅，即係⋯⋯我都讀過下𠺢嘛，呢啲，即係點樣揀歌嚟播喇，喺舖頭裏面，呢啲係有一門學問嘅，好似，但係可能佢都可能亂噉揀嘅啫。
靳：哦呢個有得學㗎，呢個？
以：有啊有啊。
苗：即係嗰啲麥當勞裏面播咩歌嗰啲係咪啊？
以：係啊，有成⋯⋯套學問喺度㗎，有好多人做研究㗎，咩時間播咩歌⋯⋯
苗：哦～
以：或者啱啲咩類型嘅顧客啊，或者咩類型嘅鋪頭啊，有人做調查㗎。
苗：講起呢個呢，我記得喺冰島嘅時候呢，噉就有一晚呢，就去咗嗰個大學嘅⋯⋯嘅student bar啦，噉大家都⋯⋯即係傾傾下計，噉然後佢就開始要收鋪喇，我唔記得幾點啊，其實都唔係真係咁夜。佢收鋪嘅時候呢佢係勁大聲噉播，我記得係，好難聽，用木同笛吹嘅《YMCA》囉，然後就趕你走。
以：喂，呢個有啲太過明顯喎，我睇新聞多數都係講係咩⋯⋯播古典音樂就愛嚟趕客噉嘅咋喎。
苗：哦，《Baby Shark》。
靳：播《Baby Shark》即刻啲人會走晒。
以：好似話咩英國啲麥當勞呢，夜晚唔想有麥難民呢，噉就播古典音樂囉，之後啲人就走喇。
苗：會噉嘅咩？
以：聽講。
靳：因為瞓唔到覺係咪啊？
以：Citation needed，可能。我搵到嘅話我貼返出嚟。
苗：唔係喎⋯⋯唔係露宿者⋯⋯難民喎，係咪？兩樣嘢嚟㗎喎。
以：麥難民啊。
靳：麥難民即係講緊喺⋯⋯
苗：哦，麥難民。
靳：麥當勞過夜嘅人。
以：或者好似話咩火車站又係播古典音樂，就令到啲人冇咁暴力啊，或者冇咁想搞事，噉樣。
苗：我記得有一單係，都係即係露宿街頭嘅人噉然之後嗰啲唔知警察定係乜嘢呢，就播呢個《Baby Shark》趕佢哋走啦，即係不斷loop不斷loop。
以：噉呢個真係會趕到我走㗎。
苗：好殘忍。
靳：呢啲係精神虐待嚟㗎喎，呢個。
苗：係啊，呢個係⋯⋯呢個係違反咗
以：呢啲應該係違反咗咩人權⋯⋯
苗：《日內瓦公約》嘅⋯⋯
以：Gene⋯⋯
靳：《Baby Shark》係好危險嘅武器嚟㗎喎。
苗：啱啊。
以：呢啲應該要問返一啲精神科嘅專家先知道，係唔係真係好危險。但係⋯⋯
苗：啱啊。
以：你講起啲舊廣東歌呢，我諗起我對上一次睇港產片呢，應該就係睇緊《梅豔芳》啊，嗰時我仲喺伯明翰啊，好似。好耐之前喇。
苗：哦～好耐喇喎。
以：係⋯⋯有好多場㗎嗰陣時，喺市中心一間噉樣啦，噉之後場場都差唔多吉嘅，所以⋯⋯即係預咗啦。
苗：啊，係啊，我睇《填詞L》呢，就係成個院得三四個人囉，都係空㗎。
以：係啊，差唔多啊。唔似得呢度曼城，呢度係真係小香港嚟𠺢嘛，我睇《填詞L》係爆㗎囉，係真係要book飛先去到㗎囉。
苗：吓？真心？
以：係。
苗：嘩，犀利。
靳：我喺香港睇都唔爆喎，我喺香港睇都係坐得可能四分一度咋喎。
以：因為你好多場吖嘛，我哋呢度真係得幾場。
苗：係啊係啊。
靳：噉又係。
以：我去嗰日呢⋯⋯我本來嗰日有嘢做㗎，我唔諗住去㗎，本來仲話之後仲有幾日都有嘅，但係我嗰日朝頭做一search呢，佢就話嗰日係最後嗰場囉。
苗：哦。
以：之後嗰幾日嗰啲唔見晒囉⋯⋯
苗：嘩。
以：係人間蒸發，所以我即刻仆出去。
苗：我係相反喎，我係⋯⋯我哋係冇人到呢，我入到去係冇人check飛，你就噉行入去囉。
以：Okay。真係⋯⋯真係唔同啲，呢度。係，冇啊，我唔知⋯⋯
苗：係啊。
以：唔知曼城而家香港人人口係去到邊度呢，應該仲喺度飆升緊。
苗：Check到㗎，應該。呢⋯⋯上年定今年先出咗人口普查咋嘛，你哋。
以：係咩？夠唔夠貼㗎？
靳：上萬未啊？
苗：係二一年做嘅，噉所以可能係低估咗嘅，即係比起而家。
以：但係真係⋯⋯係囉，成個城市啲人湧晒入去嗰幾場噉樣，噉你想像到係爆㗎囉。
苗：係。
以：我哋唔止一個城市𠺢嘛，仲有隔籬嗰幾個都係噉樣湧入嚟𠺢嘛。你可能成個蘇格蘭嘅香港人都去緊愛丁堡。
苗：講呢啲。都係得三個四個。
以：得三個四個。你⋯⋯你已經兩個啦嘛，係咪啊？之後⋯⋯
靳：三個四個⋯⋯
苗：係啊。
以：靳尼係咪都有睇啊，你嗰陣時個情況如何啊？冇咁墟冚啊？
靳：我嗰陣時睇咪係⋯⋯因為佢一日其實都有幾場㗎，噉所以其實入到去有⋯⋯
以：好羨慕啊。
靳：即係一開始買飛嗰時呢，係都係得幾個人啦，噉但係到最後入到去應該我諗有三分一⋯⋯四分一至三分一個場都係有人坐嘅，噉所以其實都唔係好少人睇嘅啫。
以：嗯，我諗緊呢套可能喺外國真係難sell啲喎⋯⋯
苗：都係㗎。
以：噉不如我哋講下佢係講乜嘢㗎喇，如果大家冇聽過嘅話。
苗：其實好簡單㗎咋喎，個plot就係⋯⋯
以：即係顧名思義佢係講關於填詞㗎啦，噉熟悉廣東話或者廣東歌嘅人，都已經想像到呢，講填詞呢樣嘢喺香港以外真係⋯⋯你講完人哋都唔明。
苗：係啊，首先填詞呢個concept⋯⋯即係當然喺例如英文噉樣啦，佢都好多時係有人專填詞嘅，都有lyricist呢個職業嘅，但係相對上嗰個⋯⋯嗰個影響力或者佢嗰個名聲呢，係冇唱歌嗰人，或者冇寫歌嗰人咁大囉。
靳：即係你就噉諗呢，會唔會諗到有一個唔係香港人或者係東亞以外啦，淨係⋯⋯
苗：填詞人。
靳：填詞嘅人出名嘅，你諗唔諗到？
苗：係真係⋯⋯噉我唔知啦，我本身唔熟其他音樂啊。
以：作歌都可能會有機會。
苗：係，作歌就應該多嘅，寫歌嘅。
以：我有聽過一啲假新聞嘅⋯⋯嘅頻道講話咩，咩西方⋯⋯英語主流嘅歌裏面，有唔知幾多成都係某兩個人作嘅，但係我冇估錯應該係講緊作歌唔係講填詞。
靳：係。
以：但可能對佢哋講係冇分別𠺢嘛。
苗：哦～
以：因為佢哋kind of有詞就有歌。
靳：通常作歌就附送埋個詞畀你㗎啦嘛。
苗：都係嘅，但我知道英文有好多流行曲呢，係瑞典人填詞嘅，即係有啲出名嘅專填詞嘅⋯⋯嘅人喺瑞典人，唔知點解。
以：乜鬼啊？
苗：係我聽我個瑞典friend講嘅。
以：吓？吓，呢個唔知喎。
苗：係啊，我同佢講呢套戲呢，我話「欸，好得意喎，即係香港有呢個填詞人嘅職業喎」，跟住佢話「吓，係咩？唔係正常嘅咩？」噉樣。
以：哦～咁有趣。
苗：跟住佢就同我講，哦，原來好多瑞典人係專係填啲英文詞嘅，幫啲英文嘅歌。
以：但係寫詞定填詞先？因為填詞係imply咗係你有歌之後再填個詞落去吖嘛。
苗：哦，噉呢個真係唔知喎，總之嗰啲歌詞係佢寫出嚟嘅，噉嘅意思囉。

The rest of the transcript is available to Patreon members.