靳：如果你同佢之間，冇一個其他嘅共通語，係咪同鄉呢？
以：同……用呢個非常非常廣嘅「鄉」嘅定義囉，就係……成個……
靳：就係亞洲。
以：亞洲。東亞、東南亞。哎！我係講粵語，佢講越南語，咪就同鄉囉。係咪？
靳：都係jyut6啫.
苗：都係jyut6。
靳：即係粵講粵明㗎喇，會。
苗：嘩。
以：即刻又食個字先。
苗：泰好笑喇，你。
[jingle]
以：歡迎返到嚟《絮言．狂想》第六十五集，我係以色列。
苗：我係三苗。
靳：我係靳尼啊。
以：我哋今日爭啲冇咗靳尼啊。我哋爭啲變咗做呢個兩個人嘅podcast，變咗我哋兩個……我同三苗談心。
苗：撐枱腳。
靳：係我時間觀念嘅問題啊，唔好意思啊，真係。
以：唔係，係多災多難啫，唔係你嘅錯嘅。係我哋……
苗：幾樣嘢囉。嗰啲所謂嘅咩連環不幸事件。
以：係啊。你係咩事話？你係因咩解究返唔切屋企啊？
靳：我係去咗個朋友屋企。
以：哦。即係流連忘返！
靳：跟住就佢……個朋友就住得比較遠嘅，係喇。噉跟住我就趕唔切返嚟，我已經call咗Uber返嚟嘅，其實。
以：嘩，好偉大啊。呢個冇公數開㗎，對唔住。
靳：我知，我知係冇公數開㗎。所以係……係，我理解嘅，係。
苗：私數。
以：係啊。冇辦法啦，係我哋……係囉，啲時間就係咁難搞㗎喇，我哋有兩個爭好遠嘅時區，成日都係要揾呢個時間、揾嗰個時間，之後大家又要做嘢噉。但係呢，講開連環不幸事件呢，我真係過去嗰個零禮拜，真係黑仔到爆啊。
靳：發生咗啲咩事啊？
苗：哦，好似係噉意聽你講過。
以：係噉意聽我講過呀？我係唔係係噉意講，我係好detail噉講㗎。
苗：Ok。你要再講多次囉，噉囉。
以：係啊。我長話短說啦，就係我自從由柏林去到呢一個波蘭嘅Katowice之後呢……邪。點解加咗廣東話嗰個送氣音呢，聽落好錯啊。
苗：kaa6 tou6 wi1 ce4。
靳：kaa1 to1 wi1 ce4。
以：加……加……加拖……加拖費邪。我唔知。之後就乜Q都勁唔好彩囉。即係我又想去啲唔同嘅地方，又……又冇車啊，之後又畀啲周圍嘅物件去到整親啊，好似我兩三日之內，整傷咗三個唔同嘅地方囉，喊出嚟。之後又想去睇啲展覽，又無啦啦畀佢suppose閂嘅時間早咗閂啊，之後乜Q都唔work。之後仲要返到嚟英國之後呢，第一日我就整爛咗我隻好心愛嘅杯啦，之後又唔見咗個袋啦……
苗：今天，不小心把心愛的玻璃杯打碎了。
以：我可以畀相你哋睇啊。係……就係噉嘅樣，就係打碎咗。
靳：你係咪用咗十五分鐘去欣賞佢啊？
以：我本來會嘅，如果唔係嗰日喺曼城落緊狗屎嘅話呢，我就真係會好好噉望住佢，去到緬懷佢嘅。
苗：落緊貓同狗。
以：落緊貓同狗，落緊刀同叉，定係……類似噉嘅嘢啦。係啊，我哋講落狗屎。但係因為我唔敢搦住佢咁耐啊，打碎咗隻杯之後。之後我就即刻抌落垃圾桶。
苗：嘩，你呢個真係所謂嘅「I先生連環不幸事件」。
以：或者係嗰個Murphy’s law囉，即係所有有可能出錯嘅事，都出錯晒喇，恭喜晒。
苗：真係好。真係幾經辛苦，終於返到嚟喇。
以：終於……終於返到嚟正常返啦。
苗：終於返到嚟《絮言》。
靳：OK。
以：終於歡迎我返到嚟《絮言．狂想》。
靳：可以歡迎你返到嚟《絮言．狂想》，係。
以：多謝，多謝大家。好嘢！
靳：多謝大家！
以：多謝大家，係。我可能要揾機會去多次，因為有啲好想睇嘅嘢，都睇唔到，就係因為呢個不幸嘅關係。唉。係啊，好啦，噉我而家吐完苦水嘞。
苗：噉就要講返正經嘢。
[04:10]
以：正經嘢。正經嘢就係大家最近點啊？我哋又放咗個假啦。我多數放完假之後，就傾下我哋放咗啲咩假㗎喇。所以呢……
苗：係。其實主要係以色列個好長嘅假囉。我去咗幾日咋嘛。
以：主要係我啦。
靳：我都係去咗幾日咋嘛。
苗：靳尼都係去咗唔知兩……兩日？兩三日係咪啊？係。我見你好快返㗎喎。
以：唔係喎，你好似去咗……我唔知啊，我見有好多相，所以我凝住好耐。但係我知係冇關係嘅。佢諗緊佢去咗幾耐。
苗：你去咗幾耐？
以：佢呢個沉思嘅表情，發緊呆嘅表情。
苗：定係lag機？
以：之後佢微笑：「哈哈，我知道喇！」佢都係冇反應。
苗：做咩啊？呢個podcast嚟㗎喎。
以：所以我咪將佢嘅表情，全部轉換成呢一個聲音囉。
靳：你喺度running commentary緊我塊面噉樣。
以：冇錯啊，因為我等緊你嘅回應吖嘛。
靳：冇啊，我……我講先嗱？我咪去咗四日曼谷咋嘛，其實就係。
苗：哦，都好似……係囉，同我差唔多，都係四日到。
靳：差唔多時間，都係。
苗：我係去咗……我係去咗呢個低地國，同埋隔籬嘅比利時。
靳：你唔係應該收利是，唔係畀利是。
以：隔籬嘅比利時？咩話？
苗：低地國，即係Netherlands？
以：哦，低地國！
苗：係啊。
以：低地國，係。
苗：呢個……
以：好似冇人講低地國㗎喎。雖然我鍾意。
苗：尼德蘭。
靳：尼德蘭王國。
以：尼德蘭真係……
苗：尼德蘭王國。荷蘭啦，即係。跟住同埋隔籬嗰個比利時啦。噉其實比利時係當係day trip，順便去嘅啫，噉主要都係留喺荷蘭啦，噉就見咗一啲語言嘅朋友啦。噉但係就講荷蘭文嘅機會呢，就……就真係唔係好多嘅。噉首先我唔係好識啦。二嚟就係嗰啲人其實都好樂意講英文啦，可能大家都知道。
以：太樂意啦。
苗：我反而覺得喺嗰度呢，荷蘭文最有用係同邊個講呢？就係同一啲當地唔係白人荷蘭裔，然之後佢喺嗰度移咗民，英文唔係好叻嗰一啲人，講荷蘭文就反而會舒服啲囉，噉講。即係你覺得佢應該唔會用英文應你嘅。即係可能佢用英文都係……可能都係有啲吃力囉。噉你就叫做所謂幫輕佢噉樣。
以：即係可能佢係後來先搬過去，就唔係喺荷蘭大，所以就冇經歷到荷蘭呢個好高超、好高水準嘅英文教育噉，係咪啊？
苗：係啊，係啊。我都去過一間餐廳，就係喺……唔知大家有冇聽過Baarle呢個地方啦，噉就係喺荷蘭南部有一堆……有一個小鎮，噉叫做Baarle-Nassau，跟住隔籬呢……所謂隔籬呢，就係好分散噉樣分佈住唔同嘅比利時飛地啊，即係好多exclaves啊，好多enclaves。噉呢就係……
以：可唔可以解釋？
苗：就係呢，嗰度……如果你去Google Map度睇呢，你試下去Google Map度睇Baarle，B-A-A-R-L-E呢，噉你會見到嗰個鎮呢，係會好多唔同嘅邊界，啲邊界好亂啊，好似倒瀉啲……倒瀉液體噉樣㗎。即係呢度有一個……有一忽……
以：倒瀉籮蟹。
苗：係啊，有一忽就係荷蘭嘅，隔籬嗰忽呢，就係比利時嘅。跟住呢下面嗰忽呢，又係荷蘭嘅。跟住裏面又有個比利時噉樣。即係好亂嘅，條界。
以：你中有我，我中有你。
苗：噉成個鎮呢，如果你行嘅話呢，就會經過好多次國界嘅轉變囉。你會見到地下有好多條界嘅，一邊寫住NL，一邊寫住B噉樣。噉就係兩個唔同嘅國家囉。跟住周邊嗰啲門牌呢，又會有個國旗啦。噉就話你聽，你而家喺邊個國家囉。成件事都好過癮。
靳：跟住你就去咗好多次荷蘭、好多次比利時。
苗：噉係嘞。喺Baarle呢個地方，嗰一間餐廳呢，就係應該係……係咩人開嘅呢？好似係……係咪土耳其人？好似又唔係喎。即係總之係好似係類似中東人之類開嘅餐廳嚟嘅。噉所以我見佢啲英文都係麻麻地，噉所以我就嘗試講咗幾句荷蘭文噉，係囉。佢都……佢都明我講乜，好在。唔會聽唔明我講乜。噉係囉，就係噉樣少少用咗……用咗啲荷蘭文囉。我係唔敢喺嗰啲望落去係……即係荷蘭人……本土荷蘭白人嘅人用荷蘭文，除咗講幾句多謝嗰啲之外。
以：做咩啊？驚咗？
苗：因為我好驚佢會一輪嘴噉同我講。，然之後我就唔應，跟住佢就都係轉返英文。「阿鬼，你都係講返英文啦！」噉樣。
靳：可能佢都係直接會同你講返英文。
以：你諗多咗喇，你無論講咩，佢都係同你講返英文㗎。
苗：又好似係，係。你又啱。
以：係咪好常見嘅問題啊？因為有啲人……譬如話……譬如話我阿媽啦，佢同我講話佢以前學德文都係噉樣。就係學咗幾句，之後覺得好有自信，噉就同人去講，之後就發覺：哎啊，原來我要聽得明，先有意義㗎喎。
苗：係啊。
以：但係可能嗰個年代就真係要聽得明，而家就「英文啦！」噉樣。
苗：我覺得佢哋其實都唔係真係第一下同你講英文嘅。
以：唔係呀？
苗：即係佢會確認咗你係外國人先，即係如果佢聽得出你嘅荷蘭文係外國人，或者係囉，即係總之佢……佢唔會因為你個樣，assume你係外國人先嘅。佢會首先同你講荷蘭文，如果你個樣好疑惑呢……
以：喂！鼓掌，鼓掌，鼓掌。
苗：喂，呢啲最低……呢啲好低……呢啲好低喎，個bar，呢個……
靳：呢個正確嘅態度嚟㗎！
苗：已經係正常㗎喇喎。
以：好難得㗎喇喎！見到我個樣唔當我係外國人？
苗：即係佢係……佢係會可能見到你聽唔明，佢先會轉囉。或者你主動同佢講英文，佢先會講英文。係囉。我都……我哋都試過幾次喺餐廳，突然間即係……即係一行埋嚟就係講荷蘭文嘅。

The rest of the transcript is available to Patreon members.