Eeee ee ee!絮言.狂想第二次直播

好開心又同踴躍嘅Patreon支持者吹水!大家引發咗好多好有趣嘅討論。

喺YouTube收聽

如果想參與下一次直播,即刻嚟Patreon課金支持,除咗有足本逐字稿,仲有得投票、參與Discord,同埋【豐富】額外內容添!
-語言迷最大嘅困擾係……?
-韓文輸入法打到中文字?
-乜嘢係意粉?乜嘢係茶?
等等等等!
如果想單次打賞,亦都可以請我哋飲杯咖啡

本集特別鳴謝:Klaus、Anthony、サム、阿擇、Ceci

Subscribe to our newsletter!

00:00 開緊波
01:34 時區變變變
11:22 拼字串法有好有唔好?
18:48 最古老嘅歐洲語言?
23:36 英文拼寫法有冇得救?
27:26 俄羅斯幫保加利亞加速改字體?
36:14 中日韓越字典
43:09 上古漢語擬構有幾準確?
45:36 「會」字令人唔敢打針?

連結:

意見反饋 Feedback/建議題目 Suggest topics

社交媒體

以:開緊波喇!

苗、以:Open ball.

靳:Ball has been opened.

苗:開咗喇,個波。

以:No, ball is being opened.

苗:is being opened……係喎,開緊波。

靳:開緊波。

以:開緊波。

苗:開緊……噉幾時先開完波啊?

以:開完波……等我哋正式講我哋要講嘅嘢,就開完波囉。

靳:呢個好似……好似係日文嗰個時態噉樣喎。

以:梳,我諗緊斯拉夫時態,不過OK。

靳:OK。

苗:時態。

以:態。

[jingle]

靳:歡迎返到嚟《絮言.狂想》。

以:大家好!係咪要開頭㗎?

苗:歡迎返到嚟……

以:歡迎返到嚟《絮言.狂想》第二次直播。

苗:第二次live。

以:係分開計㗎嘛,我哋。

靳:係啊,係分開計㗎,我哋。歡迎返到嚟《絮言.狂想》第二次live。我係以色列。

以:你係以……我係以色列。

苗:我係三苗。

靳:我係靳尼啊。

苗:係啊,呢個gan3同gan6嗰個問題呢,都係好奇怪。

靳:因為我真係去查字典呢,呢個字真係讀個gan3字㗎喎。

苗:係啊,但係我識嘅個名裏面有個……有呢個字嘅人,都係讀gan6囉。就算係真係……真係姓靳嘅人,都係「阿靳」囉。

靳:你真係識人姓靳㗎?

以:你識人姓靳呀?

苗:同埋……唔係識人,我知道有個人姓靳。

靳:靳埭強。

苗:即係阿靳吖嘛。噉佢……佢都係gan6㗎喎,佢唔係阿gan3㗎喎。

[01:34]

靳:我哋見係有人啱啱起咗身啦,我就食完飯就……

苗:啱啱起身,即係我哋有唔同……唔同時區嘅朋友。

靳:……嘅人……人仕。

苗:而家今日出面好靚。今日有十幾度啊。

以:我閂咗窗簾。我畀佢曬醒㗎。

苗:萬里無雲。

靳:今日……今日有廿幾度啊。

以:香港係咪已經廿幾度,都已經成個月喇?

靳:其實都唔係啊,都係暖返一個禮拜、兩個禮拜?唔知啊,唔記得咗。啲時間過得太快喇,已經。

以:真,真。三月好似乜都冇發生……I mean,打仗囉。但係……

靳:係乜都冇做過噉樣囉,淨係返工同放工。

苗:二〇二一同二二年都係好似好快噉樣。

以:眨下眼噉啊。二〇年好似係舊年嘅事噉樣,啱啱。

靳:啲時間過得越嚟越快。

以:我而家喺網上見到啲二〇一九年嘅事呢,仲係覺得:啊,冇幾耐前啫。

靳:係冇幾耐前啊。

以:三年,三年,喊出嚟。

苗:二〇〇九我都覺得冇耐前。

以:二〇〇九就好遠。

苗:我覺得二〇〇九咪五年前到囉!唔係咩?

以:你老喇。

靳:二〇〇九嗰陣時你幾多歲啊,大佬!

苗:差唔多啦。

以:「我都係起冇耐……」咦?阿Vamp你喺邊度㗎?邊個時區啊?

苗:你係美洲時區吖,定係你好……你好夜瞓?

以:都係美洲呀?

靳:唔係,「行緊美洲時區」。

苗:啊,係啊。生理時鐘啊。

靳:我識有啲喺香港嘅人,都係行緊美洲時區。

苗:生理時鐘喺美國。

以:哦,即係女似好多人喺亞洲時區,但係用歐洲時區生活噉。

苗:Social jetlag.

以:啊,真係美洲啊,佢。哎,辛苦晒,辛苦晒。

靳:我有時會約人食夜晚飯,跟住佢話「我今日食第一餐」噉樣。

苗:係。美洲時區,恭喜你哋下年開始唔需要再轉個鐘。

以:真係㗎?

苗:係啊,下年開始嘛。

以:係決定咗呀?哦。

苗:噉其實……其實佢係……嗰個叫咩啊?參議院pass咗,但係爭眾議院,但係應該其實都pass嘅。

靳:啱啊,德政啊。

苗:因為佢係成個參議院,佢係一致通過喎。你有幾可啲嘢一致通過㗎啫?

以:香港嗰個咩咩咩咩咩囉。

苗:「通過!我宣佈議案通過!」

以:唔係,美洲時區仲有幾個……好多國家㗎。

苗:噉又係。即係起碼係會轉夏令時嗰幾個……

以:可能阿Vamp喺巴西呢,係咪?

苗:啊,係喎。即係會唔會喺嗰啲咩巴拉圭嗰啲噉,係咪啊?Saint-Pierre Et Miquelon噉樣嗰啲係咪啊?

以:我哋係咪有朋友喺墨西哥啊?

苗:會唔會係格陵蘭啊?算唔算美洲時區?

以:我唔知喎,格陵蘭咩時區。

靳:格陵蘭都係美洲時區嘅,噉就。

苗:格陵蘭有幾個㗎。

靳:格陵蘭啲時區係好奇怪。

苗:佢……佢特別有個鎮呢,係……畀大家欣賞下呢個格陵蘭嘅時區。

以:但係係啊,我哋都盡量就啦,首要因為我同三苗都喺英國啦,所以就晏晝,之後就埋香港嘅靳尼同埋聽眾啦,噉所以就揀呢個時間啦。

苗:係,其實有啲夜嘅。

靳:跟住結果我哋好多聽眾都係喺美洲時區。

以:都有幾個係。我見到Patreon有幾個係。

靳:都唔係吖,香港嚟講,其實又唔係真係好夜嘅。

以:睇人啦,睇人啦。

苗:哦,阿Vamp話一致通過係因為有啲議員就唔喺位,噉就冇反對到噉樣。但係都其實都好神奇啦,已經。即係美國政治有幾可啲嘢係冇人反對嘅先?係囉。

靳:佢係離席抗議,可能係。因為好堅持要返呢個夏令時間。

以:所以就要畀佢通過喇。

靳:噉咪啱囉!永恆夏令時間囉!如果你支持夏令時間,就應該永遠都夏令時間囉。

苗:係啊,我都聽過有啲人係唔鍾意㗎喎,即係少數人,但係我聽過有個別兩三個人……

以:唔鍾意乜嘢?

苗:佢唔鍾意永久夏令囉,即係佢鍾意永久冬令囉。即係佢覺得起身嗰下,係重要過你放工、放學嗰下嘅日光囉。

靳:真係㗎?咁得意嘅?

苗:係啊,即係如果你永久夏令時,起身就會黑啲吖嘛,你即係你將……其實你係將你個生理時鐘校前一個鐘啫。

以:係吖,係吖。我成日都要計好耐先計到係點樣,邊個打邊個。

靳:永久自由返、放工時間。

苗:即係阿擇就話「永久自由返工放工時間」。噉呢個其實係……就係真正嘅解決方法啦。

靳:唔使返工係一個解決方法囉。

以:Well,烏托邦呢啲嘢。「要不停同澳洲同美國約時間開會」,阿擇噉講。係啊,係啊。

苗:嘩,真係陰功。

以:係啊,因為我喺英國啦,之後我有個學生喺澳洲啦,噉我哋當然就唔係sync㗎啦,即係仲要係相反方向。之後次次一轉嘅時候呢,我哋就一個禮拜改一次時間。

靳:嘩,好煩喎,真係。

以:At least對我嚟講係啦。

苗:應該有成個月係澳洲、美洲、歐洲都係唔同時間。即係佢轉嚟轉去噉樣。一年兩次,玩啲噉嘅嘢。

靳:嘩,搞唔掂。頭暈喎,真係。

以:到底應該同步吖,定係廢咗佢呢?澳洲同其他就一定冇得同步㗎啦。

苗:澳洲……澳洲其實都可以廢咗佢啦,全世界都可以啦。

以:其實都係,呢個年代,又唔係耕田。

苗:係啊。美國轉咗,我哋都未轉。我哋要廿七號,係咪啊?

以:啊,係喎,就嚟轉喇喎。

苗:阿擇就話有呢個「新疆時間」,係囉。

以:即係點啊?

苗:噉即係佢同北京時間爭兩個鐘囉。佢係加六嘅,佢嗰個時間。

以:哦,但係佢官方都係加八㗎嘛。

苗:噉但係佢唔係官方㗎嘛,噉就變咗維吾爾族嘅人呢,就用新疆時間。噉然之後,係嘞,漢人就變咗用加八囉,就變咗用北京時間。噉就變咗好似溝通會有問題噉樣,唔同嘅語言就會用唔同時間。

以:黐線。我哋轉語言就要譬如話咩「萬」轉「十千」啦,但係佢哋轉語言就要轉時區。

苗:呢個係咩grammar嚟㗎?即係啲conlang,grammatical feature。「Glossika點算」……用中文學維吾爾話。

以:Glossika有冇維吾爾話㗎?我都唔知。

苗:好似冇嘅,冇嘅。

以:因為介紹返先,Glossika呢,係我曾幾何時好鍾意嘅一個學語言嘅系統嚟嘅,噉佢其中一個好得意嘅地方呢,就係呢,佢……因為佢所有語言都係用同一set嘅內容嘅,都係嗰啲句子嚟嘅。噉就唔知點解有時呢,佢啲……譬如啲價錢嗰啲,佢會譯囉。噉但係有時又唔譯囉。好唔consistent,係啊。

苗:即係譯個貨幣定係點啊?

以:佢會直情同你轉埋個數字囉。戇居㗎喎,即係好似……

苗:咩啊,點解要噉做啊?

以:即係咩十美金,噉之後佢會講係七十蚊噉囉,類似。

苗:即係點啊?即係嗰個……嗰句句子會有個……有個script噉樣嘅,即係佢會定時呢就會……就會睇下:「哎啊,而家轉換率幾多啊?轉返先!」然之後再round off噉樣。改咗句句子。

靳:咩事……

以:冇啊,應該係嗰陣時嘅嗰個rate嚟㗎。

苗:喂,噉學俄文咪好慘囉?

以:係啊,爭咗幾倍啊。

苗:我見睇嗰啲日劇、韓劇呢,睇英文字幕嘅話呢,佢嗰啲貨幣都係會直接除一百、除一千噉樣嘅,直接用美金顯示囉。

以:吓?係㗎?

苗:係啊,係啊,即係譬如五萬圜噉樣,就會變咗五十蚊美金噉樣囉。

以:咁得意㗎?係咪因為爭太遠?我睇啲外文劇冇呢樣嘢,即係歐洲啲外文。全部都係直接用返原本嗰個貨幣。

苗:係囉,可能大家唔知咩嚟啦。即係大家睇Squid Game呢,都係發覺好多人search,究竟唔知幾多四百幾億圜,究竟即係幾多錢噉樣。

以:係億呀?我都唔記得咗幾多錢。我哋又返返去幾集前。

苗:啱啱阿睿呢,就係話佢自己叫阿睿啦,我哋一位聽眾。然之後阿擇就話自己係「亞裔」,噉就唔係「阿睿」。

以:冇錯嘅,係亞裔。

靳:係「ngaa3裔」。

苗:我都係亞裔嘅,係喇。

以:Vamp問我「曾幾何時鍾意Glossika」。我係……我好鍾意佢個學習模式嘅。噉但係真係好易會厭囉,因為佢好重覆,即係佢嘅重點就係重覆,喺度不停噉loop嗰幾句句子……唔係,三千句句子。噉係啊,loop到咁上下,loop咗幾萬次噉樣,之後又轉第二隻語言,又loop幾萬次啦。之後就真係開始厭囉。

苗:係啊,因為佢隻隻語言都係同一堆句子嚟㗎嘛。

The rest of the transcript is available to Patreon members.