The Cantonese podcast for fans of linguistics, language lovers, and Cantonese learners. This episode discusses language families across the world, and how we know what languages are related.
Show notes and links available on the Cantonese page. Transcript below.
This podcast is also available on YouTube. Don’t forget to subscribe!
靳：啲日語曼語源呢，就經過咗啲好規則嘅音……
苗：日耳曼語言
以：噉呢個已知嘅語言，佢嘅……佢嘅語言、語源……
苗：日語曼已誅嘅議員，究竟講緊乜嘢？
以：講緊日……日語曼已知嘅議員嘅語源囉
靳：日耳曼語支嘅議……語言嘅語源
苗：日……日耳曼乳豬……乳豬嘅議員？？
[jingle]
以：好啦！歡迎大家返到嚟〈絮言．狂想〉第七集，我係以色列
苗：我係三苗
靳：我係靳尼
以：大家亦都可以叫我Israel啦，或者係法文嘅Israël啊、其他語言嘅Izrael等等。你哋啲名呢，有幾多唔同嘅變種㗎？
苗：冇乜變種喎，我個名。淨係永遠都係……即係聖經嗰個撒母耳啦，大家知道係邊個名啦。噉喺好多拉丁字母寫嘅語言呢，都係一樣串法嘅，全部。通常如果講其他語言，就會直接用返嗰個語言嘅發音，噉就好簡單
以：咁悶㗎？
靳：噉你哋兩個都……嘅名都係由希伯來文嚟啦，噉其實得我嗰個就唔係嘅。就係我嗰個名呢，其實就係由塞（基）爾特語度嚟嘅。噉就係……即係Kenneth呢個名啦，即係靳尼啦，譯做。噉就Kenneth其實我係喺英文出面，好似都冇乜人，聽過，有呢個名嘅，其實就。主要都係英文聽得比較多啲。係嘞。噉但係佢本身都係由呢啲……由一啲蓋爾語度嚟啦，有一啲比較舊啲嘅蓋爾語度嚟啦，即係……即係啲Gaelic嘅languages啦，噉樣囉。噉所以就有一個……有一個Scottish Gaelic嘅variant好似叫Coinneach，但係我唔知我發音準唔準嘅。
以：我見你好似喺互聯網唔同地方都有啲化名㗎喎。鍾意就噉攞其他語言就拼返Kenneth出嚟
苗：喂你係咪……你開人哋嘅account做咩啫？
以：係咪唔開得㗎？
靳：開得嘅。
以：但係我諗嗰啲應該都比較容易認得嘅。但係應該最難認嘅就係佢愛爾蘭文嗰個form，因為太多太多元音喇，係咪啊
靳：係好多好多元音啊，又咩oi，又有ea啊，噉樣㗎嘛。係因為……始終都係（苗：愛爾蘭文）係喇。嗰個其實唔係愛爾蘭文嘅form嚟㗎，嗰個係蘇格蘭蓋爾語嘅form嚟嘅，即係Coinneach噉樣。噉就因為佢都要啱返啲拼寫嘅規則啦，噉所以就變咗好多啲蓋爾語，即係例如話我哋講緊愛爾蘭文啊、或者係蘇格蘭文啊，噉都係喺拼寫上高呢，永遠都係會有兩個……兩個元音字母黐埋一齊噉樣，好得意嘅。噉但係就英文通常你拼出嚟，都係拼返佢讀出嚟嗰個音出嚟，噉所以就兩個都變咗係e噉樣，Kenneth噉樣嘞。
以：哦！噉但係而家蘇格蘭人多數都用返英文名係咪啊？我諗。（苗：係啊）噉但係愛爾蘭嗰邊就比較興用返佢哋傳統嗰啲名啦，噉好多都係你一睇落去，你係……你係唔知點讀啦，唔知係咩名嚟㗎啦。噉但係原來同其他好多語言……即係入面嘅名，都係有直接嘅關係㗎喎。例如比較出名嘅可能有Seamus嗰啲啦。其實嗰個係James嘅愛爾蘭語嘅版本啦，噉但係變咗Seamus之後，就後來又入返英文裏面啦，噉就好似有啲人叫呢個名啦。同埋相類似嘅有Sean啦，噉可能大家都……成日都唔識點樣拼出嚟，即係無啦啦寫SE但係讀sh嘅，噉其實又係啲愛爾蘭文嘅名嚟嘅。有冇其……有冇其他係再廣泛啲，即係更加多variants嗰啲啊，你可以……
苗：唔係喎，噉你Sean噉你係㗎。噉你Sean你有John、Ian、Ivan、Johann……
以：其實我唔知Sean係John囉
苗：Sean係John吖嘛，係咪啊？
靳：Sean係John啊
苗：係囉，其實Sean本身係同英文嗰個John係……即係同源㗎啦，噉就仲有啲Ian啊、Ivan啊、或者Johannes啊、Johann啊，呢一啲噉樣嘅名，本身都係……都係同源嘅。但係去到唔同語言，佢又借返落英文啦，噉所以就會同時會見到好多唔同嘅變化啦，但係其實本身都係同一個名嚟嘅。
靳：係啊，其實我哋可以逐個數㗎。我哋由……即係西面噉樣一路數到去東面啦，好得意嘅。因為……嗱，噉就……愛爾蘭文啦，噉就話有Sean啦，噉除咗Sean之外呢，都有Eoin啦，呢個名啦。係嘞，Eoin噉樣嘞。係嘞。噉去到Welsh呢，就有呢個……即係Ioan啦，Ioan啦，噉就……英文就有John啦，去到西班牙文有Juan啦，法文有Jean啦，嗰個叫做……Brittany嗰隻叫做乜嘢啊？我唔記得咗。
以：Breton啊，Breton啊。
苗：我有個地圖啊，我post出嚟先。
靳：Breton叫Yann啊，Yann㗎，係喇
苗：慘，你由西面開始，然之後最西João冇咗。
靳：係咪João冇咗啊？
苗：João
靳：João係葡萄牙文，Joao，個A字上高有條斜……蛇仔噉樣嘅。係咪？去到……
苗：係囉，仲有啲Hans啦
靳：Hans啊
苗：Giovanni
靳：Jan啊
苗：係啦，Jan啊
靳：Giovanni
苗：Jens嗰啲
靳：Jens。即係德文有好多變體㗎嘛，即係有Jan啦，又有Hans啦，又有Johannes啦。即係Hans本身又係由Johannes split出嚟，嗰啲……即係小稱嚟嘅，噉樣，係喇。噉去到一啲斯拉夫語言啊，噉就例如話烏克蘭文啊、俄文嚟，噉樣就有Ivan呢個名啦，係嘞。即係仲有啲匈牙利文嘅János啊，係喇。噉就真係有好多好多唔同嘅變體。噉去到唔同嘅語言，都因應返佢自己唔同語言嗰個語法啊，或者個拼寫規則，或者嗰個語音呢，就變咗做唔同……完全唔同嘅名喇，而家。
以：噉但係好地地一個John……即係你就算第二個語言讀唔到呢個字出嚟，你改下個拼音咪得。點解會無啦啦變咗Ivan啊、有Ian啊、Hans啊，咁複雜嘅？點解會係Hank㗎？呢個……Hank唔係Henry咩？
[6:30]
苗：哦，呢個Hank呢，係同Henry係唔同㗎。因為之前有一條片，就係阿Hank Green……Hank Green自己認。佢就話佢搵返Hank呢個名係本身係Hankin，即係佢係Johann再加個diminutive，Hankin就變咗Hank。所以John同Hank係同一個名嚟㗎。
靳：所以兩兄弟係同一個名嚟㗎。
苗：係同一個名嚟。
靳：應該為大家補充返，如果大家可能唔識呢兩個人呢，就係叫做YouTube入面一個比較元老級啦、係一個比較著名啲嘅頻道（苗：啱啊），叫做vlogbrothers啦。噉樣就有兩兄弟呢，噉就會互相去send啲vlog畀對方噉樣，噉就每個禮拜都有兩次嘅。噉佢哋對對方都會講啲日常嘅嘢，好多唔同嘅嘢，每次都會搵啲嘢嚟講噉樣。噉佢哋兩兄弟就叫做John Green同埋Hank Green噉樣。噉Hank Green佢身份證名好似唔係叫Hank嘅，噉但係大家都叫佢做Hank，噉但係後來就搵到大家，哦，原來John同Hank係同源嘅，原來兩兄弟係同名嘅！噉樣。
苗：因為我唔知……嗱，我fact check返先。因為佢話係William Henry Green嘅。但係Hank……哦，OKOKOK。係有兩個，因為佢有兩個source，一係diminutive of Henry或者Hankin，Hankin即係medieval form of John。
靳：啊吓，係囉
苗：所以唔知……
靳：即係德文Hans嗰啲friend嚟㗎囉，基本上就係。
以：Jonas啊，仲有
靳：Jonas都係啊，係啊
以：Shaun、Shane……Shane都係啊
靳：Shane都係啊，係啊
苗：Shane……Shane……
以：比我印象中仲多添。噉你話佢呢兩個名係同源嘅話，其實係咩意思？即係……
苗：係囉！即係未……未define過同源呢個字係咩意思。
以：係咪即係原本佢有個聖經名，佢就噉譯咗入去個……第二個語言裏面。噉之後唔知點解就會譯咗咁唔同嘅樣出嚟吖，定係點樣呢？
苗：噉要講呢樣嘢呢，就首先要講去語言係點樣變化啦。噉如果我哋用一個生物嘅例子嚟解釋嘅話呢，譬如有一隻生物A，然之後開始繁殖啦，佢有好多唔同嘅……即係好多隻嘢啦。噉佢慢慢呢，就會去到好多唔同嘅地方。噉佢哋嘅地理範圍呢，就會越嚟越大啦。噉呢一個就會造成佢哋開始有一啲物種之間呢，有分隔嘞。噉如果你過咗條河，然之後大家與世隔絕噉樣生活，噉隨住時間呢，噉呢一啲噉樣唔同嘅族群呢，就會開始有自己嘅變化啦。有一啲自己先至有嘅嘢，就唔會傳畀第二啲個體嘅。噉久而久之，呢一啲物種呢，就會慢慢演化成唔同嘅物種啦，譬如話一啲單細胞嘅嘢，噉樣喺個海裏面慢慢上咗岸，噉跟住又變咗第二啲動物啊，跟住噉所以魚呢，同埋陸地上嘅動物又係而家有唔同喇。噉呢一個係一個生物嘅比喻啦。
去到語言嗰個類比呢，就係一群人本身係講一種語言嘅。佢哋開始人口增加啦，噉就去到唔同嘅地方，遷徙去唔同嘅地方。噉就開始自己有一啲比較獨立嘅群體。噉久而久之，呢一啲噉樣嘅語言嘅特徵呢，就會慢慢變化，就會少咗同原本嗰個地方交流，噉慢慢就會發展出一啲新嘅變化啦，越嚟越唔同，噉最後就會變成唔同嘅語言。通常古代嘅話呢，就係分裂做唔同嘅語言。噉所以同一個字，可能去到其他地方，就有唔同嘅講法，慢慢呢，就會變成一啲好唔同嘅嘢嘞。
The rest of the transcript is available to Patreon members.
