The Cantonese podcast for fans of linguistics, language lovers, and Cantonese learners. This episode discuss the Taiwanese language (Tâi-gí or Taiwanese Hokkien), how to learn it, why native speakers reject the name Minnan, and what the fall of Taiwanese tells us about the future of Hong Kong Cantonese.

Show notes and links available on the Cantonese page. Transcript below.

This podcast is also available on YouTube. Don’t forget to subscribe!

[鳴笛聲]

以：欸？咩聲？

苗：拉得。

淩：拉得。

靳：唔係啊，啱啱有……有……

以：哦，哦，拉你喇，拉你喇。

苗：哦，拉你喇。

靳：係啊，已經……已經上緊嚟。

以：佢哋已經上咗嚟，聽到喇，已經。

淩：死喇，死喇。

以：我哋一講個title，佢哋已經收到喇。

[jingle]

以：[台語]大家好，歡迎轉來收聽絮言．狂想第十三集，我是以色列。

苗：[台語]我是三苗。

靳：[台語]我是靳尼。

以：噉希望啱啱呢個自介就冇嚇親大家啦，我哋都係一個廣東話節目嚟嘅。噉大家睇到呢一集嘅標題呢，都可能估到，我哋今日就有個大題目啦，就係想講下台灣嘅各種語言嘅。噉呢，我哋今日就有個嘉賓上嚟一齊傾偈啊，噉佢就係良淩啦。噉佢都係香港人嚟嘅，噉但係佢就對學台語好有熱情啦，同埋對台灣都好有愛啦，係咪啊？

淩：係㗎。

以：我哋本身都係朋友嚟嘅，噉佢早幾個月呢，就開班教咗我哋一排台語啦。如果大家有睇我嘅YouTube頻道嘅話呢，噉都曾經有佢上嚟同我拍咗條片，就用台語講學台語。噉良淩你想唔想自我介紹一下？

淩：用廣東話定台語啊？

以：廣東話。

淩：好啦噉係啦，我叫良淩啦，我都係香港人啦，跟住其實就係某一年開始，我就：「哎，好似呢個語言都幾得意喎」，跟住因為成日都會有聽到啲歌啊，或者睇到啲電視劇啊，佢哋會講下講下噉樣。跟住就開始學啦。跟住然之後又越學又越好似：「哎，好開心喎」，係嘞，跟住就keep住學，係。跟住同大家一齊學嘅時候，即係叫做係教大家啦，但係其實我覺得係同大家一齊學。我覺得都係好開心㗎囉。噉就係了解呢個文化啊，噉樣啲嘢，係嘞。

苗：好耶。

以：哦，係咪即係你本來已經睇好多台灣嘅劇噉樣㗎喇？

淩：我都有睇唔少嘅，的確係。但係主要係台語嘅劇會多啲囉，反而係其他嘅會少啲。

苗：即係就算係台灣嘅劇，都係主要係台語劇，就冇乜其他語言嗰啲，係咪啊？

淩：係啊，係啊，其他語……好似悶啲啊，好似台語嘅嘢會得意啲，好……好玩啲囉，即係係。

以：原來係噉樣。

苗：係佢哋個語言本身得意吖，定係你覺得佢哋啲題材都同其他台灣嘅劇有啲唔同呢？

以：定係風格啊？

淩：嗯，風格都係唔同嘅，雖然大家會笑嗰啲八點檔啊嗰啲啦，噉但係都真係有優質嘅劇集、電影出現嘅。噉語言嘅風格，我覺得可能係因為呢隻話喺台灣係其實紮根咗好耐嘅，即係超過幾百年噉樣嘅。噉其實佢係一個文化嘅載體囉。噉相比於其他嘅可能係國語或者叫做普通話啦，係短啲歷史㗎啦，喺台灣。噉佢哋雖然大家都好似識，但係有好多嘢呢，佢哋唔習慣用普通話表達，噉佢哋就會用台語，就更加自然囉，表達到佢哋嘅情感噉樣。

以：係嘞，噉呢，你就帶出咗我哋呢個主要想講嘅題目啦。噉事源就係呢，我前排早兩個禮拜見到阿杜汶澤噉佢……而家喺台灣啦，佢就喺Facebook po，佢話開始學緊台語喎。噉佢就影咗阿[台語]台南妹仔嘅樣啦，就教緊佢啦，係喇。噉佢個po就係寫「台灣係講台語嘅國家」喎。噉呢一句呢，同時間係我覺得係幾激勵嘅，即係對於鐘意台語嘅人啦，亦同時間亦都大少少爭議性啊吓。所以今日就想大家一齊傾下，台語同埋台灣嘅其他嘅語言，到底個關係係點樣嘅呢？噉首先我哋不如問下大家啦，包括良淩啦，到底台語嘅係乜嘢嚟嘅呢？

淩：哦，台語呢，噉佢就係……即係我哋叫佢台語啦，噉其實係佢一直以嚟係多數嘅台灣人使用嘅母語啦。噉個歷史就大概……其實就複雜嘅，噉你當係十八、十九、二十世紀，其實基本上呢個台灣上面嘅……即係呢個島上面嘅人呢，應該就係八成左右嘅人，都係使用台語㗎啦。點解叫台語呢？就係因為以前嘅……即係我哋而家嘅台南，以前呢，佢唔係叫台南嘅，佢以前呢，就係叫做台灣府，即係台灣府城啦。噉其實係大清帝國呢個……嗰啲時候，佢哋都有一啲行政嘅編制啦，噉就將嗰個地方叫台灣府，係嘞。噉台灣府，即係而家嘅台南啦，噉嗰度啲人講嘅語言，噉就慢慢就大家就稱嗰個語言做台灣話。噉即係而家我哋講嘅台語，係嘞。噉呢個嘢呢，就慢慢沿用落嚟，因為呢，嗰個時候嘅台南，講嘅語言同大部份其他人，即係包括咩台北啊、高雄啊、台中啊，其實大部分人呢，都係講同一句話嘅。噉所以呢，台灣話就會指到晒成個……佢哋呢隻同一隻話囉。噉一直就沿用落嚟啦，噉去到日本嘅……日本係佔領台灣嘅時候，噉日本人就習慣……佢就唔會叫佢台灣話，佢就叫佢台灣語。係嘞，噉台灣人又唔習慣叫自己做台灣語喎，噉佢哋就叫做……叫自己做台語嘞，係。

以：吓，噉樣㗎？

淩：係，大概係。

以：兜咗個圈噉。噉呢，我就係學咗台語之後啦，又係多謝良淩教我啦。噉我都開始喺Facebook啊、Twitter等等，同啲台語嘅羣體去到互動啦。噉都發現佢哋對於呢個命名係好強烈嘅意見喎，有。噉因為我知道而家台灣教育部呢，係鍾意叫做閩南語嘅，台灣閩南語啦。噉有啲人就會講福建話啦、咩河洛話啦，好多唔同名嘅。噉其實點解有咁多名呢？點解咁複雜嘅呢，佢嘅身份？

淩：噉你要分類嘅話，點都係分閩南語嗰度嘅，即係噉由上至下，就係漢藏語系啦，然後漢語支，跟住閩語支，跟住閩南語，跟住閩南語嘅叫做係漳州、泉州嘅呢個分支啦。噉佢同台灣人講嘅又係基本上係好類似嘅嘢囉。噉即係你當佢係閩南語嘅喺台灣嘅一個方言啦，係嘞。

苗：漳州、泉州就喺福建嘅，係咪？

淩：係嘞，漳州、泉州就係福建嘅。

以：唔係，噉但係我最想知點解台語人會對於閩南語呢個名咁反感嘅呢？尤其是啲好主動去推動台語嗰啲人。

淩：我覺得佢哋唔鐘意閩南語，都有唔止一個原因啦。噉其中一個就係即係佢哋會話「閩」字下面有個蟲字啦，即係嗰個簡體嘅虫字。噉佢哋就覺得：「啊，呢個係一個貶義呀、係一個唔好嘅嘢啊，佢好似係鬧緊……即係貶低緊呢啲講閩南語。噉你又將閩南語套喺台灣身上喎，噉你即係貶低台灣啦！」噉佢哋可能有人噉諗啦。噉可能又有另外一啲人，係覺得：「噉我哋嘅國家就係台灣囉。噉我哋嘅語言叫做台語，梗係冇問題啦！噉點解你……即係你嗰個閩南語」，其實大家學……如果上網睇呢，可能會搵到就係閩南語呢個名呢，係比較遲出現嘅。噉反而係台灣話、台語呢，你可以搵到文獻係比較早，即係早過「閩南話」出現啦。噉其實就算先來後到，你都……即係佢哋……同埋就係佢哋好鍾意台灣，唔鐘意中國大陸嘅話，噉佢哋唔鍾意中國大陸嗰啲嘢嘅名，都……我都明白嘅。係嘞。噉但係我就唔會特別拗啦，呢啲。

以：哦，噉「粵語」都有粒米喺裏面，可能我哋係一粒米。

淩：入面嗰個係米定係禾定係咩嚟㗎，其實？係咪有一撇㗎，定係……

靳：采字喺入面。

以：我唔知喎，好似有兩個版本㗎。你……我倉頡打到晒兩個出嚟㗎。

苗：有一撇嘅。我係打有撇嗰個囉。如果好似話呢，冇撇嗰個係所謂簡體字嗰個正式嘅變體。

以：哦，簡體字就係貶低你係一粒米啊。

苗：唔係啊，米係生命嘅來源嚟㗎，呢啲。

淩：米好重要㗎！

苗：人類嘅食糧，好重要㗎，即係……

淩：我哋米飯……

以：好亞洲啊！

苗：粵語呢樣嘢呢，係孕育咗幾千萬人㗎，知唔知道啊？

以：大家都係嶺南人，不用分得那麼細。

淩：食鹽多過你食米，可見米有幾重要。

以：唔係食鹽重要啲咩？

淩：吓？噉多過食米吖嘛，噉所以米咪好重要囉。

以：鹽字都有個米喺裏面。

淩：啱啊，大家都係米啫。

苗：鹽字有個打斜嘅米喺裏面。

The rest of the transcript is available to Patreon members.