The Cantonese podcast for fans of linguistics, language lovers and Cantonese learners alike. Our first episode discusses 7 common language-related myths, such as the status of Cantonese and Mandarin, the oldest and hardest languages, language families, etc.

Show notes and links available on the Cantonese page. Transcript below.

This podcast is also available on YouTube. Don’t forget to subscribe!

[Intro]

苗：一個好簡單嘅例子啦，我諗緊例子，其實。

以：先斬後奏啊呢啲叫。

苗：等陣先，再嚟過……唔准笑！

[jingle]

00:20

苗：OK，um，其實呢就啱啱做podcast都唔係好知點樣開始，所以我哋……我諗都係單刀直入啦直接。

以：係啦係啦，好，大家好啊，我係以色列啊。

苗：我係三苗。

以：係嘞。我哋呢個podcast呢就叫〈絮言．狂想〉啦，其實呢就係想主要講下啲語言嘅topic啦，因為覺得好似香港唔係好多人討論呢樣嘢。

苗：係啊。香港都有好多podcast啦，但係主要呢都係啲政治向多啲嘅podcast啦係啊。噉但係學術嘅都有嘅，但係好似語言學就少啲。有好多電台節目都係講學……譬如學英文啊等等嘅話題啦，但係都係比較少真係linguistics向嘅podcast，噉我哋就想開拓呢個市場啊所謂。噉就……所以就做咗呢個podcast出嚟。

以：咁坦白嘅？

苗：係啊。

以：都……都冇錯嘅，係啊。

苗：平時自己聽好多英文嘅語言podcast，噉想廣東話都有多啲啦，係喇。噉今日我哋嘅題目呢就係「香港人七大語言迷思」，係嘞。香港人呢，就……其實所有嘅人呢，都對語言有好多嘅誤解啦，噉呢，香港人都有唔少比較specific嘅迷思嘅。

以：我覺得語言呢樣嘢係特別容易發生迷思嘅嘢，因為語言係個個都會接觸到嘅嘢啦，又日……常生活都會發生啦，去使用啦，但係就好少人就真係去仔細諗一啲語言嘅問題啦，所以好容易就會諗錯咗，或者有啲約定俗成嘅理解啊，其實就唔係好符合呢一個現實啊或者語言學嘅。

02:06

苗：好，噉我哋就由第一個開始先啦。噉呢一個呢係比較多香港人都會有嘅一個誤解啦，就係廣東話係古語雅言或者普通話係滿語呢一個概念。噉呢兩個都係比較相似，所以我哋group埋一齊講。噉誒首先呢要拆解下廣東話、普通話嗰個關係啦，同埋古語啊雅言啊滿語呢啲……呢啲係乜嘢嚟㗎呢？滿語其實真係乜嘢呢？噉我哋首先講下廣東話先啦。

噉廣東話係我哋嘅母語。噉最近都有好多一啲保護廣東話嘅運動啊，去捍衛廣東話嘅地位啊，等等嘅運動啦。噉其中一個啲人呢嘗試去抬高廣東話嘅方法就係話，哦，廣東話幾千年前呢秦朝啲人就講㗎喇，噉嗰陣時呢就叫做雅言，噉樣。即係呢一啲等等嘅嘢。相信大家都聽過唐詩係由廣東話寫成呢一個噉樣嘅講法啦，噉但係其實實際上係點㗎呢？

噉其實事實上呢廣東話呢，甚至所有語言呢，都係一樣幾時都會變化嘅一樣嘢嚟嘅，一樣everchanging嘅嘢嚟嘅，噉呢個時候嘅廣東話同十年前嘅廣東話其實可能已經好唔同㗎喇。雖然你一定會聽得明啦，噉但係有好多細微嘅嘢，譬如某一啲詞彙啊，甚至乎某一啲語法嘅結構啊都可能會唔同。噉而家講緊幾千年前，可能秦朝啊漢朝唐朝呢啲咁長時間之前嘅嘢呢，噉廣東話一定係唔存在嘅。即係我哋……起碼我哋而家認知嘅廣東話呢，呢一樣嘢係唔存在嘅。

以：係嘞。之所以點解咁多人覺得廣東話係喺咁耐之前都已經講緊呢，其實主要係睇返呢個詩詞啊裡面押韻嗰方面啦，就發現呢原來嗰啲詩用廣東話讀出嚟呢係押韻好多嘅，或者可能係make sense啲啊，噉樣。噉點解會係噉呢？

苗：噉就係因為廣東話同而家唔少嘅現代漢語呢，都係嚟自中古漢語嘅。噉中古漢語係乜嘢呢？就係大嘅係唐朝隋朝嗰陣時嘅漢語啦，由中古漢語去到廣東話呢之間呢係保留咗好多一啲入聲嘅韻尾啦，或者m呢個韻尾，噉普通話係冇嘅。因為我哋通常會將廣東話同普通話比較啦，噉樣嘅時候呢就會見到，哦，普通話冇晒啲入聲，又冇晒啲m音，噉就所以呢，廣東話讀，咦，我見全部都押韻喎，噉一定以前嗰啲詩呢係用廣東話寫㗎喇噉樣。噉呢個就係犯咗一個毛病啦，就係覺得語言係一啲永遠都唔會變嘅嘢啦，或者語言嘅label係永遠都係喺度嘅。噉其實廣東話呢個概念可能都係近呢幾百年先至產生嘅。係因為廣東話開始由中古漢語分化出嚟，再去mix唔同嘅本土嘅民族啦，噉再慢慢發展而成嘅。

大家可以參考一個著名嘅反例，就係〈憫農〉呢首詩，李紳嘅〈憫農〉。就係呢個「鋤禾日當午，汗滴禾下土」嗰一首詩。噉呢如果你認真分析一下嘅話呢，你就會發覺廣東話讀呢首詩係完全唔押韻嘅，但係呢用普通話讀呢就全部押韻嘅，都係押u嗰個韻嘅。呢個係點解呢？就係因為廣東話同普通話呢本身都係嚟自中古漢語啦，噉係中古漢語讀呢一首詩呢就全部都押韻嘅，都係o嘅韻尾，係喇。噉有個好好嘅YouTuber啦，叫做Biopolyhedron，可以YouTube上面搵嘅，我哋擺喺show notes裡面。佢呢一條片就係擬構咗呢個中古漢語嘅讀音啦，噉佢仲有好多其他詩呢都係有呢一啲噉樣嘅擬構。噉呢一啲呢係根據語言學家好多嘅分析啦好多比較現代嘅語言啊、參考古籍啊噉樣嘅方法呢再去擬構出嚟嘅。噉大家會聽到呢中古漢語其實有啲地方好似廣東話但係其實又好多地方都唔同嘅。噉正正就係語言係會慢慢隨住時間演變㗎啦，噉所以比較正確嘅講法呢就係呢啲唐朝嘅詩呢，就係用中古漢語寫成嘅。噉當然中古漢語都有分唔同嘅時期啦，噉就係當然係用返佢本身嗰個年代嘅語言寫成嘅，噉都好合理嘅。噉所以呢，廣東話係古語雅言呢樣嘢呢，唔係一個有證據證明嘅嘢喇。

噉我就覺得呢，要愛護廣東話、要保護廣東話呢其實就唔需要用呢啲噉樣嘅原因嘅。大家只要覺得佢係我哋嘅母語，噉其實已經足夠㗎喇。即係佢係我哋而家每日都用緊嘅語言啦，我哋同朋友啊屋企人啊都會用嘅嘢，噉我哋對呢一個語言係有感情嘅。噉呢一樣對於母語嘅自豪就其實就已經足夠㗎，就，我哋就唔需要去一啲……用一啲外在嘅證據。

以：唔需要去到污名化。

苗：係喇唔需要去到話，啊，廣東話就正，噉你普通話呢就唔係嘅全部唔押韻噉所以就唔啱喇。呢一啲就我覺得唔係一樣好……第一佢錯啦，噉，第二就係唔需要resort to 呢啲噉樣嘅原因囉。

以：係啊冇錯啊。噉其實好多人呢成日就鍾意話，哦，普通話呢受到北方外來民族嘅影響啦，所以其實係一個被扭曲咗，即係唔係原汁原味嘅中文嚟嘅。所以就佢係一個比較次等嘅中文嘅類別啦，甚至有人話係滿語喎。

苗：胡語啊或者。

以：咩話？胡語，係啊胡語啊。噉同時間其實係兩個謬誤嚟嘅，因為一嚟啦，啱啱阿三苗講呢就係語言嘅發展其實會去唔同嘅方向，噉廣東話保留咗中古漢語某一啲嘅特點，之後可能普通話保留咗其他嘅特點啊，其他嘅韻啊，所以其實係開叉噉樣囉，而唔係一個就保留晒所有中古漢語，然後另一個呢就係畀胡語去到影響咗變成一個好差好核突嘅中文噉樣。

唔單止係講胡語呢，即係有啲人仲會話係滿語添。就好specific噉講。噉呢個就更加有問題囉我覺得，因為……因為滿語係真係一個存在嘅……而家仲存在嘅語言嚟?嘛，噉而係一個同中文完全冇挐掕嘅語言嚟嘅。

苗：係。有一個講法呢就係去support點解啲人話普通話係滿語嘅就係因為普通話或者官話啦叫做，佢英文叫Mandarin，噉有啲人就話哦Mandarin就係嚟自呢個滿大人mǎn dà rén唔知點樣啦，係啊Mandarin。

以：Marvel嚟㗎。

苗：噉其實呢個字本身就唔關事嘅同呢樣嘢，係呢個叫做folk etymology、以訛傳訛出嚟嘅。

以：民間嘅……

苗：民間科學家呢就……係嘞，實際上呢Mandarin呢個字呢係葡文嚟嘅， mandarim，噉就係官員噉解，噉所以點解叫官話喇。噉其實純粹係一個翻譯囉，純粹係一個葡文嘅字。就同滿……滿人啊、滿大人啊呢啲噉嘅嘢係冇關係嘅。

以：噉因為英文裡面一般我哋都講Mandarin啦，啊或者Mandarin Chinese，啦所以我個人就鍾意會將佢叫返官話，好似match返多啲。

苗：係啊因為普通話係一個標準嚟?嘛，係講緊其實現代標準漢語就叫普通話，噉但係官話有好多其他唔係普通話嘅官話?嘛，嗰啲咩西南官話啊、銀蘭（蘭銀）官話啊呢一啲都係官話嚟?嘛，就係包喺Mandarin呢一個……呢一個umbrella底下。

以：係喇所以其實你睇返呢個漢語嘅語族啦，其實即係一個語言嘅一個大家族啦，噉有幾個大分支啦，官話係一個分支，其實佢下面呢仲有好多唔同嘅方言啦，噉其中一個呢就係嗰個所謂嘅標準漢語喇，噉然之後廣東話就係另一個分支啦，噉其實佢哋係好似親戚噉樣係有關係嘅，但係就唔係從屬啊，亦都唔係邊個分裂出嚟嘅關係。噉至於滿語啊、其他周邊嗰啲所謂胡族嘅語言啦，噉其實可能因為地區嘅關係啦，可能啲聲上面……可能啦，就會有啲影響啊，但係講到尾佢哋真係唔係漢語族嘅一分子啦，所以佢哋就唔會參咗隻腳入嚟噉樣嘅，係。

The rest of the transcript is available to Patreon members.