The Cantonese podcast for fans of linguistics, language lovers, and Cantonese learners. This episode discusses the Tokyo Olympics 2021 opening ceremony, Hong Kong Book Fair, and various language learning apps and platforms such as Duolingo and Anki.

Show notes and links available on the Cantonese page. Transcript below.

This podcast is also available on YouTube. Don’t forget to subscribe!

苗：講起學語言嘅工具呢，應該第一個大家諗到嘅都係Duolingo啦。噉呢個基本上係……

以：唔係工聯會咩？

苗：係啊。

以：死啦，我哋上次講工聯會係唔開名㗎喎。

苗：工X會。

以：X聯會。

苗：某個黨派嗰啲。

以：工會。

苗：係喇。

[jingle]

以：咁核突嘅，拍得，真係。

苗：慘。

以：歡迎大家返到嚟《絮言．狂想》第十九集，我係以色列。

苗：我係三苗。

靳：我係靳尼啊。

以：好啦，喺開始之先呢，有啲好興奮嘅嘢，想同大家分享下啦。就係呢，我哋呢個show呢，就上咗另一個show。噉就係有一個都幾受歡迎嘅語言學podcast啦，就係叫Because Language。噉佢就……今個月頭呢，就邀請咗我去畀佢訪問啦。噉好可惜冇嗌晒我哋三個啦。噉就講下：啊，《絮言．狂想》係做乜嘢㗎呢？點解要做呢啲嘢呢？噉佢哋都對呢一啲即係關於廣東話同埋中文嘅嘢好有興趣啦，因為佢哋都好陌生啦：啊，又唔知粵文係咩嚟㗎，又唔知即係粵文vs書面語，同呢一個簡體、繁體嘅分別喺邊度啊，等等。所以我哋都講唔晒，所以唔知會唔會有機會再上去講過呢？

苗：係啦，噉呢個係一個英文嘅語言學podcast嚟嘅。噉佢就因為見到我哋都係有類似的題目啦，但係係用另一個語言做，噉就所以對呢樣嘢啲興趣，噉就叫咗阿以色列去講幾句啦。其實呢一個Because Language呢個節目，係基本上係我哋《絮言．狂想》嘅藍本嚟嘅。係可以話係廣東話版嘅BL啦。噉即係BL呢個名，即係佢哋好鍾意用嘅。噉如果你聽返嗰集嘅話呢，以色列都有解釋到究竟BL即係喺我哋嘅圈子裏面係咩意思啦。噉就可以去show notes度聽下嘞！

以：係啊。嗰次我同三苗講呢，之後佢就話：啊，恭喜你上BL啊。之後我就OK，尷尬。希望我哋嘅聽眾都get到呢個笑話啦。

苗：噉佢哋話遲啲可能會即係直接搵我哋三個做一集，噉就唔知啦。噉……

靳：可能「得閒飲茶」噉樣啦。

苗：「翹住個手指」啦。

以：係咪唔應該講出嚟？唔係啊，OK。

苗：係咪會jinx咗㗎？

以：噉佢哋喺個show上面都有講，希望可以揾我哋上去嘅。

苗：有，佢個twitter都有講嘅。

以：「得閒飲茶」嘅概念。

苗：係喇，得閒飲茶，噉就唔知幾時飲啦，係咪？

[2:43]

以：噉我哋就會keep住同大家講我哋呢個新消息嘅。噉講開新消息呢，噉我啱啱錄之前，就睇完呢個奧運開幕典禮啦。噉我哋幾個人一齊睇嘅時候呢，一路睇呢，都覺得好有趣喎。即係平時你唔會覺得睇啲人進場好好睇㗎，但係我哋發現咗啲好特別嘅嘢，所以就想特別傾下喎。

苗：噉平時如果睇開幕禮呢，都會知道入場國家……即係第一個係希臘啦，因為佢係第一屆嘅……即係現代奧運嘅主辦國啦，噉但係之後呢，就會係用字母排列噉樣去逐個國家噉樣入場㗎喎。然之後最後就會係主辦國啦，通常。噉呢一個字母表呢，噉喺英文就好簡單啦，即係大家都知道，即係查字典都係噉樣查喇。但係今屆，即係2020奧運，但係2021舉辦啦。噉呢一……今屆嘅東京奧運，就係用日文嘅五十音去排列呢一啲國家嘅。噉就有一啲好……即係平時好少見嘅一啲嘢啦。如果大家有學日文嘅人，可能會知道啦，但係如果冇學日文嘅呢，就會可能對呢個有啲疑惑啊。即係我都見過有啲人，喺啲社交平台話：嘩，點解咁奇怪嘅？即係嗰啲入場國家點解p完之後又……

以：一開始係i啊，係咪啊？

苗：一開始又i，跟住之後中間又有b，跟住又p，跟住又去b，跟住又去f，跟住又去返b噉樣，即係點解咁亂嘅呢？噉其實係發生緊咩事呢？

靳：係啦，點解啲b同p又會跳嚟跳去嘅呢？噉首先呢，大家要知道呢，日文佢嗰個字母啦，有幾種排列方法，噉但係最常見嘅排列方法就係我哋而家五十音嘅排列方法啦，噉就係a i u e o，ka ki ku ke ko，sa shi su se so噉樣去排落去噉樣嘅。即係有一個令大家容易啲記嘅方法，就係總之就每一行都係a i u e o，噉跟住呢，打直排落去呢，就係a ka sa ta na ha ma ya na wa，係嘞。噉樣就噉樣排落去嘅。噉所以同英文係完全唔同嘅。跟住呢，所以就變咗a行先嘞。噉而且呢，佢係用日文嘅拼法嚟拼嘅，噉所以第一個呢，就係aisurando，所以就係Iceland喇，係咪Iceland先啊，其實？

苗：係啊，係啊，冰島，跟住就愛爾蘭噉樣落去囉。

靳：跟住就ai……

苗：Airurando。

靳：Airurando，係喇。我唔係好識日文，係喇。

苗：係喇，因為日文嗰個sa嗰一行呢，即係sa shi su se so嗰個su呢，係前啲嘅，噉所以Aisurando噉就喺前面啦，跟住Airurando就喺後面，因為個ru呢，係ra行，噉就係差唔多最後嗰行啦。噉所以就排得好後。噉一開始就呢兩個國家，跟住就一路一路噉樣去到最後。噉通常呢，因為今年就冇俄羅斯嘅，其實。噉今年嗰啲俄羅斯選手就另一個身份去參加啦，噉但係平時有俄羅斯嘅話呢，俄羅斯會喺最後嘅，如果係用日文嘅五十音去排嘅話。噉冇wa字開頭嘅國家啦，除咗Wakanda之外。噉最近呢，上面呢，就已經係ro開頭，噉就係Roshia，係咪啊？噉就係俄羅斯啦。

以：今年變咗ROC囉。

苗：係，佢係Russian Olympic Committee嘅選手囉。係喇，噉但係……

靳：ROC。

苗：係嘞，ROC，噉就唔係嗰……唔係另一樣嘢啦。噉……

以：唔係嗰個ROC，係喇。

苗：係嘞，噉俄羅斯喺日文係排最後，而好有趣呢，喺俄文裏面，日本係排最後㗎喎。如果大家有留意之前俄羅斯冬奧，日本係排喺最後，因為佢係Япония啊，係咪啊？日文，我唔知я，Япония係……

以：Я係喺最後。

苗：噉就Я呢，呢個字母呢，就係俄文最後嘅字母。噉所以喺俄羅斯個冬奧呢，日本就排最後。而喺今次，如果有俄羅斯嘅話，俄羅斯就會喺最後囉。

以：好得意喎。噉佢可能因為之俄羅斯嘅時候，都係類似拉丁字母噉樣嘅一個字母嘅系統啦，所以大家唔係好覺有啲奇怪嘅排列。但係今次轉咗去五十音，完全調晒呢，之後大家就O晒嘴。噉如果各位聽眾聽嘅時候，覺得奇怪呢，就係噉嘅原因嘞。噉我諗緊呢，如果係譬如話瑞典辦噉樣，噉會唔會將奧地利擺咗最後呢？

苗：係啊，應……我估應該會係囉。你ö係最後㗎嘛，係啦。

以：Österrike，係啊。噉同埋fun fact呢，即係我喺維基睇啦，係第一次用五十音嚟排囉。即係以前如果喺日本嘅話，都係用英文字母嘅。噉仲有一個令人迷惑嘅地方呢，就係有清濁音呢個概念啦。即係日文裏面呢，同一個字母呢，譬如話ka啦，噉如果你加兩點，就係ga啦。有幾行都有呢個做法嘅。噉但係佢排列嘅時候呢，就完全無視咗呢啲清濁音嘅變法嘞。噉所以譬如話ka同ga係一齊排嘅，噉所以你可能睇啲國家，就會係ka ga ka ga噉樣擺埋一堆啦。噉再癲啲嘅呢，就係呢，如果你去到ha行呢，ha hi fu he ho呢，噉佢唔單止有濁音啦，即係所謂濁音就係變咗做ba bi bu be bo啦，仲有加埋嗰個叫做半濁音，就係一個圈嚟嘅，就係pa pi pu pe po。所以你會見到呢，成堆國家，有啲h啊、b啊、p啊，都擺埋晒一齊啦。再者呢，因為日文冇v音啦，所以v音變咗b音啦，又擺埋落去啦。F音又擺埋落去啦。仲有咩啊？

苗：應該冇喇，係咪啊？

以：啊，係喇。啊，仲有譬如話啲咩American乜嘢嗰啲呢，因為佢係bei-ryō，好似，「美領」。

苗：係啊，bei-ryō，美領。

以：米領。

苗：米領，佢都係擺埋落去。係啊，嗰個好長好長嘅……

靳：跟住就一大堆喺個ha行度。

以：係啊，好搞笑啊，係數極都數唔完。噉當然數到尾就係Hong Kong嗰啲啦，係咪？係喇。

苗：Honkon Chaina，係啊。

靳：係啊，Honkon Chaina。

苗：如果……即係之前大家有聽過嘅話呢，都會好鍾意將南北韓即係分開嘅，特登。因為啲政治原因，噉就唔想佢哋唔知打交定點啦。噉就會特登去譬如將北韓就排喺d度，因為佢叫Democratic People’s Republic of Korea啦。噉然之後南韓就會擺喺r啦，Republic of Korea，噉就特登分開佢哋。噉今年就冇得噉樣睇喇，因為今年北韓係冇參加嘅。噉但係中國隊呢，同即係中華台北隊啦，噉即係佢都係「中」之頭，如果喺日文呢，佢應該係同一個字開頭㗎嘛，都係「中華」乜乜乜乜乜噉樣㗎嘛。噉但係呢，今次呢，就好奇怪嘅。佢哋係冇擺埋一齊嘅。噉佢哋個做法呢，就係即係中華台北呢，就唔用漢字啦，噉佢就改咗用英文，就Chainīzu Taipei，噉樣去講佢個名啦。但係呢，如果你細心留意佢個排列呢，佢唔喺chi嗰一度㗎喎，佢係喺咩呢？佢係喺ta嗰啲國家隔籬嘅，噉就係即係泰國啦，然之後就有……有韓國，大韓民國，噉就佢係用Daikanminkoku噉樣。

以：係咩？

苗：跟住之後就係台灣，好似係。唔係台灣，係中華台北！唔好意思！係中華台北。噉樣之後呢……

以：哎啊，死喇。

靳：係中華台北。

以：有冇響啊，有冇響啊？

苗：有冇響啊，未有。但係佢嗰個搞笑嘅地方，就係佢……即係佢係擺喺呢啲tai乜嘢，噉樣嘅國家附近，噉即係點解，我都唔知喇，係咪先？即係要問返日本……

以：真係唔知。

苗：主辦方，係咪？我就唔係好知點解會擺喺啲……明明係chi字頭㗎嘛，點解會擺喺ta開頭呢，係咪先？成個名都冇……即係除咗台北之外，都冇嗰個tai唔知乜嘢，係咪？

以：可能台北囉。

苗：台北，係咪啊？

靳：可能Taipei啦。

以：佢個名叫Taipei囉。

苗：原來係噉。

以：哦，就冇咗個Chainīzu喇，又拉得喇，唉，外交風波。快啲出征，出征。

苗：係咪要喺個背景度加個……

靳：遠方有啲警車嘅聲音。

以：之前嗰啲真係㗎，唔係我哋加上去㗎。

靳：係啊，真㗎。

苗：係啊。

The rest of the transcript is available to Patreon members.