The Cantonese podcast for fans of linguistics, language lovers, and Cantonese learners. This episode discusses Bulgarian grammar, evidentiality, Signal and Telegram’s Hong Kong localisation in Cantonese, writing Cantonese in French, and names and translations within the Tokyo Olympics 2020.

Show notes and links available on the Cantonese page. Transcript below.

This podcast is also available on YouTube. Don’t forget to subscribe!

苗：吓，呢啲睇維基㗎咋嘛！我唔識講㗎嘛，我識……我識有呢四樣嘢，我照住讀。叫我自然噉講，我唔識㗎嘛。

以：呢個標準嘅語言學家。

苗：呢個就係語言學嘞！冇錯！

以：知道，但係唔識。

苗：You just insulted my entire race of people, but thank you.

[jingle]

以：大家好啊，我哋嚟到《絮言．狂想》第二十集！我係以色列。

苗：我係三苗。

靳：我係靳尼啊。

以：好啦，話噉快呢，我哋已經做咗廿集嘞，我哋幾時開始㗎？十月，係咪啊？

苗：十月啦，係啊。

靳：差唔多十月。

以：十月頭，係嘞。哎，都差唔多一年喇。我哋一開始就諗住不定期噉樣做嘅，噉不過後來就好似上咗軌道，就越來越定期啦，就開始有個schedule喺度，畀我哋隔個禮拜就錄下音噉。

苗：大概嘅啫，其實都係。

靳：約莫啦。

以：係，我哋都係好……

靳：隨性。

以：自由、隨性。

苗：係啊。佛系囉。

以：佛系，諗到咩就做啦。

靳：隨性podcast。

以：係嘞，噉咪啱晒個名吖嘛。

苗：係咪倒緊米啊，噉樣？

以：唔係，噉我哋大概都做咗……兩個禮拜一集，做咗半年啦，係咪啊？大半年喇。噉睇嚟啲人都幾鍾意呢個時間表。噉呢，我哋好似超過半年前呢，就做咗一次生活嘅update啦。噉我哋嗰陣時好似……我喺波蘭囉，之後你哋就喺度講做嘢嘅嘢。

靳：好似我哋三個都唔喺我哋而家呢度，即係個地方轉咗。

以：哦，係喎。哎啊，嗱，我哋冇video嘅，但係如果有video嘅話，你會見到呢，我哋個地方唔同咗。

靳：係啊。

苗：嗰個住所啫，都算係同一個地方嘅。

靳：都係嘅。你搬咗屋吖嘛，我又搬咗屋吖嘛。

苗：大家都搬屋。

以：係啦，大家都搬屋。噉三苗你好似又搬完屋，之後又考完試啦。噉你而家係咪得閒少少啊？

苗：哦，除咗做論文之外，其實都……都唔係好多嘢做嘅，我覺得。可能比較多係真係個電腦喺度自己郁，就可以呢……就好似嗰個xkcd嗰個漫畫噉啊，擺喺show notes畀大家睇下，就係有個漫畫，就係有幾個programmer喺度格劍，唔係嗰啲格……真係，真係揾支嘢喺度鬥啦。真係格劍。

以：即係張家朗，係喇。

苗：噉跟……係喇，好似張家朗噉樣。噉跟住之後，佢老細就叫佢返去做嘢，跟住佢哋就話：唔得啊，我哋個曲呢，喺度……喺度郁緊啊。跟住個老細就話：「哦，噉你哋繼續啦」，噉樣。即係個曲run緊係一個好好嘅藉口，可以偷懶。唔係偷懶，係即係做其實嘢，做好多其他好productive嘅嘢都得嘅。

以：例如錄podcast。

靳：你依家就噉個……個曲就喺背景度，一路run緊，一路run緊，噉樣嘅狀態之下。

苗：有時啦，而家……而家都冇喇。而家都做完喇。

靳、以：做完嗱？

苗：run完，run完。要等人做囉，要做實驗㗎，要填嗰啲呢，道德審查……道德審查，即係睇下你個實驗道唔道德囉。跟住之後唔道德就唔畀你做噉樣。

以：唔知大家記唔記得啦，三苗佢就係做呢啲電腦語言學嘅嘢啦，係咪？即係佢係用電腦嚟解決啲語言嘅問題啦，之前講過一集嘅。但係你而家就做到七七八八啦，噉你而家個project做得點啊？

苗：而家就係……即係主要都係寫文同埋做嗰個實驗囉。因為我個project係做呢個Yiddish嘅語音合成啦，即係Yiddish就係一個猶太人羣體講嘅一隻好似德文嘅語言啦。噉而家大概可能幾十萬人講啦，大概，即係最多都可能都係一百萬，唔係太多噉樣。噉世界各地都有嘅。噉我呢個project就係為呢個語言整一個噉樣嘅語音合成嘅系統啦，噉所以就要搵一啲講Yiddish嘅人去評價下，嗰個合成聲嘅……可能聽得明唔明啊，或者講得自唔自然啊，噉樣囉。即係要做好多呢啲噉樣嘅實驗。

以：即係比分，差，差，差噉樣。

苗：係啊，即係你整完出嚟，你都要評價佢好唔好㗎嘛。

靳：即係你要整完一嚿嘢出嚟，跟住你仲要畀埋人啲……啲評語落去，跟住寫埋喺個論文入面先至得。

苗：其實係整好多嚿嘢囉。即係整幾個唔同嘅版本，可能話：嗱，我轉咗少少嘢，會唔會聽落去自然啲呢？會唔會呢樣嘢好啲呢？噉就即係好多啲實驗囉，即係譬如我話：如果我調整呢個位，噉會點樣影響佢有幾自然、同埋有幾易明啦，噉樣，呢啲噉樣嘅……嘅嘢囉。

以：但係你已經過晒等個電腦run嗰個階段嗱？

苗：係啊我已經唔想再做呢個階段，已經完咗。太麻煩喇。

靳：已經去到做到好攰嘅階段。

以：以後唔做喇，係嘞。噉你而家係咪少啲時間去揈啊、做其他productive嘅嘢呢？

苗：Productive？

以：定係你都有抽時間去……productive嘅玩？

苗：有啊，得閒玩下啦，噉就嚟畢業，噉之後就可能永遠都冇得放假。唔係，講下啫。即係就可能得閒就學下語言啦，都係。因為……

以：唔係行山咩？哦。

苗：行山啦，同埋學下語言啦。

靳：一路行山，一路學語言。

苗：我覺得係一個消磨時間好好嘅方式囉。即係好似……好似做運動噉幫我哋個腦做運動囉。

以：咦，我都噉覺喎，係啊。

苗：係有呢個感覺囉。即係好似個腦喺度不斷郁噉樣，跟住諗好多嘢。

以：腦裏面好似出咗汗嘅感覺。雖然應該冇汗出嘅，係喇，但係有個……嗰個感覺啦，係咪啊？噉我見你呢，其實前排好似試咗幾個唔同嘅語言啦，之後你而家settle咗喺一個好似少啲人學嘅語言喎！噉你點解會噉樣揀呢？係啦。

苗：係嘞。噉之前我都講過，我有學Scottish Gaelic啦，因為我而家喺蘇格蘭啦，噉但係就唔係喺講嗰個語言嘅區域，不過都唔緊要，即係我覺得呢一個語言係幾得意嘅，因為佢好細啦，噉就好少人講，噉我就對呢啲語言成日都好有興趣囉，即係對呢啲細嘅羣體、細嘅語言噉樣。因為大嗰啲就……好似好多人學噉樣，好多人講，好似冇咁特別呀？唔知啊，即係好似……總之就係感覺上，個吸引力冇咁大囉，會。係啊。噉另一個學緊嘅語言就係保加利亞文囉，噉就係喺東歐巴爾幹半島一個國家嘅語言啦。噉就大概……可能七百萬人……多過七百萬人嘅，因為佢保加利亞個人口係七百幾萬，但係佢出面應該有更加多嘅人識保加利亞文嘅，噉就都算係一個唔細嘅語言嘅。

以：係咪嗰個語言聯盟……

苗：係嘞，佢就係喺巴爾幹嗰個語言聯盟裏面啦，噉保加利亞文係一隻斯拉夫語嚟嘅，噉佢係南面嘅斯拉夫語啦，噉同可能塞爾維亞文啊，即係之前講過，好似嗰四隻語言嗰個塞爾維亞、克羅地亞、黑山……咩波斯尼亞話呢，噉就係……

以：可以睇返嗰集。

苗：比較相似嘅，噉但係呢，佢最唔同嘅地方，就係佢係冇名詞格嘅，即係冇case嘞。即係話呢，你嗰個名詞呢，擺喺邊度，都係一樣嘅，個樣。就全部斯拉夫語呢，就真係好唔同。噉所以阿以色列成日同我講呢，佢話見到……因為佢學波蘭文㗎嘛，佢見到啲……佢見到啲保加利亞文，嗰啲啲case錯晒噉樣，覺得好唔自在，係咪啊？

以：係啊，好唔自在，好似啲人唔識講噉樣，亂咁寫。

苗：錯晒啲case。

以：即係仲要係因為個介詞係一樣㗎嘛，噉但係介詞之後嗰個名詞呢，佢又唔使變㗎喎。即係好似初學者亂咁嚟噉樣。所以呢個保加利亞文……係咪好似馬其頓文都係㗎，係咪啊？就係懶人嘅斯拉夫語囉。

苗：即係視乎你問邊個啦。因為有啲人就話佢係保加利亞文嘅方言啦。噉好多……

靳：係方言啊！

苗：好多馬其頓人就會話佢係馬其頓話啦，係咪？

以：北馬其頓。

苗：噉即係呢個其實問題都……我哋之前都講過㗎喇，呢個政治嘅問題啦，多過係語言學嘅問題。噉點樣叫其實都冇乜所謂，即係睇你點睇啦。呢兩個語言呢，或者呢一個語言啦，佢好特別嘅地方呢，除咗冇case之外呢，就係佢同啱啱我哋講嗰個語言聯盟呢，係即係有啲關係啦。因為我哋講語言聯盟嗰一集呢，就講過巴爾幹好多唔同語系嘅語言呢，佢哋擺埋一齊，喺同一個歷史環境底下，佢會互相影響，就會變做一啲……好多相似嘅文化特徵囉，即係唔單止係詞語、發音，佢直頭係有啲grammar都係好似㗎喎。譬如我哋講緊……唔係。譬如話，斯拉夫語大部分都係冇呢個定冠詞，即係冇……任何嘅冠詞都係冇㗎，係喇，即係冇a同the啦，直接講嗰個名詞喇。噉但係保加利亞文呢，係有定冠詞呢樣嘢嘅，即係有個the啦。噉但係佢個the呢，佢唔係一個獨立嘅字嚟㗎喎，佢係擺喺個名詞嘅後面。噉呢，佢就有啲似北歐嗰啲語言，噉佢哋就將嗰個the擺喺最後。學起上嚟呢，就……因為我都學過少少北歐嘅語言，所以都……

以：少少？

苗：呢一方面都係算係有啲熟悉嘅。但係佢最神奇嘅地方係咩呢？佢唔係淨係嗰個the擺喺個名詞，佢係可以擺喺形容詞啦、擺喺數字啦、擺喺好多好多嘢，可以擺喺嗰啲「我嘅」啊、「你嘅」啊，嗰啲字上面㗎喎。呢一方面，佢同英文好似，因為佢可以周圍放喺第二度。但係佢唔一定要黐喺嗰個名詞嗰度，即係你可以話the red car噉樣，噉你個the就喺最前。噉佢就係將嗰個the黐係個red上面囉，佢就唔係黐喺個car度囉。如果佢係北歐話，佢就會黐喺個car上面。但係呢個佢好神奇㗎，佢係……你係可以當佢係一個浮嚟浮去嘅一個……一個particle囉，佢唔可以獨立存在，但係佢要黐住一個字嘅，但係佢唔一定要黐住個名詞囉。

The rest of the transcript is available to Patreon members.