The Cantonese podcast for fans of linguistics, language lovers, and Cantonese learners. This episode discusses the types of minority language communities in Hong Kong, how they interact with the majority Cantonese community, and cultural integration.

Show notes and links available on the Cantonese page. Transcript below.

This podcast is also available on YouTube. Don’t forget to subscribe!

以：咪即係佢哋用法文嚟取代中文囉

苗：下？下？

以：所以我細個以為法國人係南亞裔㗎

靳：OK喎呢個

以：「French students」囉，佢哋叫

[jingle]

苗：好

靳：好lag啊

苗：好lag啊你

靳：大家都好lag

以：你lag啲

靳：點解你咁lag嘅？

以：我都想知

苗：好lag啊

以：大家好，又係我哋〈絮言．狂想〉嘅第八集，我係以色列

苗：我係三苗

靳：我係靳尼啊

以：其實唔一定要跟嗰個次序㗎

苗：冇啊，好似formulaic啲啫

靳：係啊

以：香港呢排好似都緊張，係咪啊？即係喺疫情方面，大家都好緊張

靳：都係㗎

苗：係啦，好似香港嘅數字又好似回升返喎

靳：係啊，同埋呢排就係有好多地方都開始話要封噉樣，係咪啊？即係突然間封

以：一啲另類嘅抗疫方式啊

靳：係啊，另類抗疫方式啊，即係參考咗一啲北面嘅地方嘅抗疫方式噉樣

以：「其他國家」（註：早前網上流傳中國官媒列舉封鎖Facebook嘅國家，當中將中國自己列做「其他國家」）

靳：而且又係……（苗：其他國家）係嘞。噉同埋用呢啲好奇怪嘅方式展現出嚟啦，噉樣啦，係喇。噉都好多好多新聞出咗嚟，好多不便啊、好多一啲大家覺得：「嗯，點解噉做嘅呢？」噉嘅思考喺度。

苗：其中一樣好出眾嘅新聞就係話：某啲少數族裔嘅香港人啦，因為佢哋嘅宗教原因，噉就有啲嘢唔食得啦。但係政府提供畀佢哋嘅午餐呢，就有……又有午餐肉啊，或者其他一啲佢哋根本就……即係唔食得嘅嘢啦。噉就證明香港政府嘅文化敏感度，噉都有有待改善啦。

以：係啊，唔單止文化啊，有時好似佢封之前呢，嗰啲少數族裔都好似唔知發生咩事噉樣。因為政府始終佢個溝通嘅模式主要都係用返廣東話啦，之後英文啊，之後可能近呢若干年就加埋呢一個官話啦。噉但係就顧及唔到香港本身呢一個語言嘅多樣性啦。

苗：係咪連手語都冇乜啊，好似？

以：手語應該冇……係囉！即係我哋之前之所以做手語嗰一集，就係因為我哋好少聽人講手語呢樣嘢吖嘛！

苗：即係每日嗰啲記者會都係冇㗎喎，好似

靳：冇啊，冇……

苗：冇傳譯

以：應該港台某啲節目就有手語嘅，咩……係咪日常嗰啲，可能會有。噉但係……

靳：係啊，係啊，係啊。同埋一啲新聞係……

以：緊要嘅嘢就……

苗：但係政府出嘅……即係佢哋自己嘅宣佈啊嗰啲，都係冇㗎喎。其實都係淨係得廣東話，有時啲記者用英文問下問題，就用英文答噉樣。

以：應該都有官話，好似會答。

苗：主要都係。係囉，主要都係噉，主要都係……係囉

靳：主要都係噉樣囉

以：我哋睇咗年幾嘅日常嘅記者會啦，嚟嚟去去都係兩隻語言。噉當然呢個係主要嘅語言啦，噉但係當去到啲可能真係關乎民生啊，尤其是好似封區呢啲咁緊急、咁突然嘅嘢嘅時候，噉真係有責任去到令到大家都知道發生咩事囉。噉尤其是好似……佢封開啲咩區話？

苗：佐敦、油麻地、深水埗係咪啊

靳：深水埗。北角都封咗一次。

苗：北角，哦

以：封北角係因為……

苗：Visa centre啊！北角係呢個VFS Global（註：英國簽證申請中心）嘅地方。

以：啊，係啊！

靳：啊係喎！

以：好耐冇聽過呢個名啊！係啦！佐敦啊、油麻地嗰啲……都係比較啲diverse嘅地方，即係比起譬如話新界啊、或者港島噉樣。唔係！又唔可以噉「diverse」嘅！如果講返字面意思嘅話，噉港島有好多嗰啲英文人啦、西方人啦，但係……

靳：日本人啦

以：係啦！

靳：韓國人啦！嗰啲鍾意住東區㗎嘛！

苗：邊啲啊？中國？

靳：九龍就南亞裔，即係油尖旺就南亞裔比較多啲。元朗就多尼泊爾。

苗：油尖旺……深水埗都好多

靳：深水埗都好多，係啊

以：哦

靳：係啊

以：噉你噉講嘅話，都應該……其實香港都好多唔同嘅語言嘅社區嘅。噉始終好多唔同國家嘅人嚟呢度做生意噉樣，呢個係本身特色嚟嘅。（靳：係啊）噉但係好似……好似係兩種嘅嘢嚟嘅，好……即係一啲係嚟做嘢，同埋有啲係嚟生活。即係雖然都係喺一個外地度住，噉但係個態度、個心態好似係有啲分別。即係所謂……呢個非常之虛偽嘅「expat」同埋「immigrant」嘅分別。

苗：冇錯，呢一個……

靳：係啊，有錢嘅叫expat

苗：冇錢就immigrant

以：白色嘅expat

靳：白色、有錢……

苗：其實都唔係啊，我覺得都未必係啊，即係有好多其他族裔嘅人都係expat。如果佢個態度，即係佢通常係比較有技能啦、比較有錢啦、有教育啦，噉佢嚟到呢度，佢做一啲比較人工高嘅工作呢，然之後佢哋個態度就係佢哋只係嚟呢度做一個過客嘅身份。噉就嚟做下……做幾年嘢啊，賺下錢啊，去一個比較異國風情重啲嘅國家生活下啊，噉就可能就去第二個地方喇，噉樣。噉就同好多真係喺度落地生根，喺度組織家庭嘅人就……就都好唔同囉。

以：嗯。係咪好似香港人搵夠錢去加拿大退休噉？都係過客，大家都係過客。

靳：大家都係過客。

以：香港係一個過客嘅地方。

靳：噉真係嘅！因為……即係香港，你由佢可能真係二戰之後啊，即係香港其實一路以嚟都係一個移民城市嚟㗎嘛，講真就係。以前就係……即係中國唔同地方過嚟嘅移民啦，噉樣然後又有……即係一啲其他英聯邦地方嚟嘅移民啦，噉樣。噉有好多都嚟……嚟咗落地生根，噉但係好多其實一開始嚟，都係想做一個過客身份啊，留下留下就已經就組織晒家庭啊，就變晒……係囉，噉樣囉。噉所以點解就係話嗰陣時六、七十年代，噉會開始有一個英國殖民地佢要話有一個香港人嘅身份，就係話真係要加強你係……你唔係淨係過客，你係真係喺度住嘅，噉樣。噉你係一個香港人噉樣。噉呢個先至開始慢慢有一個香港嘅……即係identity出咗嚟㗎嘛。

以：哦，即係個identity係港英政府造出嚟嘅

靳：都唔係嘅……

以：餘孽啊！！

靳：餘孽啊。

以：唉。所以我不嬲覺得香港其實同譬如話美國嗰啲移民社會係有好多相似嘅地方嘅。即係雖然比例上我哋係會一致好多，即係我哋可能絕大部份都係講廣東話嘅粵裔啦，噉但係都係好多唔同嘅人嚟啦，噉然之後佢哋一樣都係會下一代落地生根之後，又會喺呢一個新嘅語言環境裏面成長啦。噉但係個分別就係我見到……即係譬如美國噉樣啦，佢哋可能second generation……即係一代生一代，噉樣已經完全融入咗本地嘅文化，完全係流利英文啦。噉但係香港好似比例上就會多啲人係仲係會分隔開咗囉，譬如話廣東話唔係好……流利啊，又唔係好融入到香港……即係呢個粵文化啊，噉樣。其實點解會係噉呢？

苗：我覺得呢個好睇佢係邊一種嘅非粵人喎。即係如果係一啲其他講漢語嘅族裔啦，例如……即係潮汕啊、閩南啊、上海人啊，噉其實佢哋嘅後代都係基本上完全融入晒……即係呢個廣東話嗰個社群。但係反而一啲本身唔係講漢語嘅地方，例如一啲南亞啊、東南亞啊，佢哋都某程度上係比……即係一啲漢語人更加容易去保留返佢哋自己嗰個群體嗰個特色囉。

以：仲有尤其是白人，白人更加……

靳：白人就……

苗：白人呢個就更加唔使講啦。即係我覺得本身……

以：完全係分隔開咗

苗：係真係完全分隔開，係……即係好少會聽到一個土生土長喺香港，識講廣東話嘅白人。有好多係真係香港土生土長嘅，但係佢哋讀書都係去國際學校啊、都係用英文啊，都係好難去融入……即係呢個廣東話嗰個社群。反而一啲比較冇咁有錢嘅……嘅移民，佢哋……即係迫住仔女要讀本地學校啦，噉佢哋有同啲本地嘅小朋友一齊玩，噉所以佢哋就會更加多有識廣東話呢個情況囉，就比起其他嘅族裔。

以：但係如……你如果比較譬如話南亞人同埋呢一個潮汕人噉樣啦，其實……即係雖然潮汕話佢嘅語言嘅距離係近好多啦，噉但係作為……嗱，屋企都唔係講廣東話嘅，噉之後都係去一啲本地嘅學校噉樣啦，噉其實理論上佢哋嘅exposure，或者佢哋學粵語嘅機會都係差唔多咁多㗎喎。噉同埋尤其是小朋友學一隻外語嘅話，即係好細個嘅時候，噉佢哋都係靠接觸㗎咋嘛。噉所以其實學一隻近啲同遠啲嘅語言，其實應該分別唔大。噉其實係咪佢哋喺教育上面嘅……即係……嘅選擇嚟嘅呢？而唔係佢本身環境所促使嘅呢？

The rest of the transcript is available to Patreon members.