The Cantonese podcast for fans of linguistics, language lovers, and Cantonese learners. This episode discusses Hong Kong’s latest Mandarin education policy imposed by the Chinese Communist Party, Apple’s iOS 15 “Cantonese” pinyin keyboard at the WWDC, LGBT Pride in Cantonese, and gender neutral language around the world.
Show notes and links available on the Cantonese page. Transcript below.
This podcast is also available on YouTube. Don’t forget to subscribe!
苗：啊係啊，英文嘅話就會係……
以：即係佢叫Carrie Lam㗎嘛，係咪？就唔係Carrie Cheng，係啦。
苗：係囉，佢嗰啲咩咩咖哩牛啊，嗰啲啦。
以：咩牛啊，羊啊！
苗：咖哩羊呀。
靳：咖哩牛！
苗：咖哩羊……我講過先。好似嗰啲咩英文嗰啲咩咖哩牛啊嗰啲。
以：你都係講錯！
苗：咖哩羊，屌，又錯。講多次，講多次。
[jingle]
以：歡迎大家返到嚟《絮言．狂想》第十六集，我係以色列。
苗：我係三苗。
靳：我係靳尼啊。
以：好啦，噉我哋入到呢一個語言嘅節目裏面呢，最……首先要講嘅呢，就係好似最近有單都幾大嘅新聞喎，即係關於香港嘅語言發展呢方面。就係……
苗：係今個月月頭啱啱出嘅一份報告啦，就叫做《粵港澳大灣區語言生活狀況報告2021》，噉就係中國教育部發出嚟㗎啦，噉就分析下呢一個粵港澳大灣區……即係呢啲城市嘅語言狀況。噉呢，佢就當中呢，即係同香港有關嘅呢，就係佢就建議啊，即係香港應該將普通話教育呢，就融入呢個考評體系。噉因為而家呢，通常中學生啊、小學生啊，都係喺學校度上普通話堂啦，但係譬如你話DSE噉呢，係冇普通話呢一個考核嘅。噉佢都亦都唔係嗰個教育制度一定要去考嘅嘢啦，應該係學校自己決定㗎嘛，呢啲。噉佢就提倡就應該要喺法律上面確立普通話同簡體字嘅地位啦，噉亦都將佢加入去考評體系，噉就將成件事就更加官方化囉，更加將像普通話地位確立啦，類似係。
以：噉首先姑勿論我哋咁榮幸，得到祖國嘅教育部去到關照我哋本地教育呢樣嘢啦，可以討論下有冇必要啦，即係從語言使用嘅角度嚟睇，有冇必要去到做出呢啲改變呢？噉因為我哋香港而家……係啦，你都話啦，有啲普通話嘅教學嘅。噉多數人都識啲啦，at least。譬如我自己，我都用到，我識聽得明啊，噉樣。噉對於香港同祖國大灣區嘅融合方面，有冇需要去到改善呢，到底？你覺得？
苗：冇。講完，我哋下一個item喇。
靳：冇，講完。
苗：唔係，咪住先。如果你話要增強即係溝通呢，噉同普通話同簡體字有冇法律地位係冇關係㗎喎。
靳：係啊。
苗：即係你冇法律地位，同你識唔識嗰個語言係冇關係㗎嘛，噉你好多國家，英文都唔係官方語言，佢哋英文都講得好好吖，溝通得好冇問題㗎嘛。噉呢個……
靳：呢個係語言教與學同埋普及嘅問題嚟㗎喎，呢個係，其實。
以：係啊。即係一個語言能唔能夠喺唔同嘅地方普及法，係睇佢嘅軟實力㗎嘛。噉英文都成功喺唔同地方度推到咁行啦。噉我都知道有好多……
苗：哦，你即係話中國軟實力唔夠！哦，你死喇！
靳：哦！
以：梗係話佢硬吖嘛，佢咁成功可以周圍……
苗：硬起來，係咪啊？
以：係喇，硬起來，周圍推到……硬推喇。
苗：「大國勃起」，係咪啊？
以：唔係，噉中國亦都有好強嘅軟實力嘅。即係而家世界上咁多唔同國家嘅人都好努力噉學緊偉大嘅普通話啦，係咪？即係其實都喺度㗎。只不過如果喺返香港嘅呢個區域入面睇嘅話，我哋要去到咩情況先能夠符合到可以同人交流嘅一個要求呢？譬如話我知道好多人譬如去中國度做生意啦，噉樣，就算唔係特別好，但係佢哋可以輕鬆噉用到普通話做交流㗎。
苗：即係其實我就覺得擺入去考評體系，好實際上睇佢點樣擺囉。因為你從一個實用嘅角度，噉你當然，你識普通話係一樣好有用嘅嘢。就算你個立場係點，如果你係鍾意普通話嘅，噉你鍾意啦，係咪先？你唔鍾意，你都要知己知彼呀，係咪啊？我唔知點樣樣啦。即係如果你唔鍾意呢一個用普通話嘅政權啊，咩都好，你……聽唔聽到出面嗰啲……
以：警車啊，拉你喇！又嚟！
苗：警車呀？唔知，死啦，又嚟拉你喇
以：一講就即刻上嚟！
苗：一講即刻有，即刻有車，驚，驚，國安啊。
靳：嘩，佢嚟到呢度拉你。
以：次次一講就出事。
苗：宇宙法，係啊。係囉，噉所以我就覺得，即係實際上睇佢點樣擺嘅。即係如果話唔合格就入唔到大學，噉樣我又覺得又有少少誇張嘅。噉但係就噉本身將佢擺入去考評體系呀？呢樣嘢又唔可以話係完全有問題嘅。真係實際上睇佢點樣去執行囉。
靳：係啦。
以：即係都有好多討論嘅空間嘅。
苗：係喇，但係法律地位係冇用嘅，係冇需要嘅，絕對。
靳：即係個問題就係如果佢擺落去好似必修科，你考DSE一定要考普通話噉樣，或者變咗做中文嘅一部分嘅時候，噉係咪必要呢？係咪真係啲人如果要考多科普通話噉樣，噉係咪……會唔會加重咗佢哋嘅負擔呢？噉樣。噉當然呢啲建議其實係好……到依家都仲係好空泛啦，唔知佢想實際執行上嚟係點樣啦，噉，係喇，噉所以就……
以：噉都係啊，即係大家都知道啦，即係香港浸會大學佢本身已經有普通話嘅要求，即係如果你讀浸會大學，你想畢業……之前呢，你要考咗個普通話試先嘅。噉我都知道有好多人係叫苦連天啦，有啲人就已經接受咗呢樣嘢㗎喇。噉只不過將呢個推廣到全香港嘅話，會唔會多咗壓力啦，即係會唔會好多人覺得好辛苦啦，又要多一樣語言。其次就係其實而家某程度上普通話同簡體字喺香港已經有一定地位㗎喇。即係好似好出名嘅2014年，教育局話：「啊，粵語係『唔係官方語言嘅中國方言吖嘛』，係咪？」其實暗示緊其實普通話已經係有一個正式嘅地位。噉之後香港你去好多唔同嘅地方，你都可以用到呢個語言做你想做嘅嘢。即係或者簡體字嘅話，就係你考DSE，你寫簡體字，其實全部都可以合格㗎。即係譬如話如果你本來喺中國大，之後你過嚟香港考DSE嘅話，人哋係完全接受㗎。即係到底佢需要有啲咩改呢？
靳：係啊。仲可以用普通話考中文說話。
苗：係啊，說話同聆聽都可以用普通話考㗎。
靳：說話同聆聽，係啊。啊，反而你作文，就寫粵文就唔得㗎喎。
以：係啦，可？係啦，係啦，係啦。咪話囉！「唔係官方語言嘅方言」吖嘛，係咪？所以你寫呢啲，唔係你嘅母語嚟㗎，知唔知啊！粵文。其實係啦，即係我哋本身已經唔可以寫粵文喇，即係如果喺口頭上都要求你用普通話嘅話，其實就好似好多香港人係擔心緊係用普通話、簡體字嚟到取代我哋粵語、粵文同埋正體字啦。噉睇下你自己嘅態度係點嘅，因為我諗起之前睇到篇文呢，就係講有啲移民咗外國之後呢，佢會選擇教自己嘅小朋友普通話嘅，就唔係講返自己母語，譬如廣東話噉樣嘅。噉都非常有趣啦，即係點解可以呢啲噉嘅意識形態，會完全影響到你同小朋友講語言呢啲咁重要嘅決定呢？
苗：其實唔止移民咗外國嘅人啊，就算係香港裏面呢，如果你讀國際學校，有好多嘅學校呢，佢係冇廣東話教育㗎嘛，佢淨係得普通話教育囉。噉就會變咗雖然你可能屋企係真係講廣東話嘅，但係如果你喺嗰間國際學校讀呢，你就唔可以用廣東話嚟接受中文教育。噉即係有嘅中文教育，都係會用普通話，就係一樣，同啱啱你所講嗰個新聞差唔多嘅嘢囉，只不過喺香港發生囉，真係。
靳：係啊，同埋本身唔係……唔係屋企講廣東話嘅人呢，噉佢就學咗兩隻唔係本地人平時會講嘅語言，噉然後你就住喺呢度。
苗：國際學校吖嘛！
靳：然後你就學咗兩種語言，但係呢兩種語言都係唔係平時大部分人會講嘅，噉就你唔知喺呢度，就……就學咗三種入面，即係兩種大部分人平時唔會講嘅語言。噉然後你都係住喺呢度。
苗：噉國際學校嗰個目的，其實有少少……佢設立目的，就係想……唔想要本地嘅嘢。
靳：所以就要好國際噉樣。
苗：即係你某程度上。
以：係囉，係囉。所以我覺得呢，其實香港人有呢個兩文三語呢樣咁特別嘅嘢啦，我覺得本身係一種平衡嚟嘅。即係我哋過去二、三十年啦，最少，就習慣咗係講係講粵語，寫係寫官話文，噉之後可能某啲情況之下會用英文嘅，即係呢個係既定嘅一個平衡啦，噉我哋可以好輕鬆噉樣去到決定咩情況之下，會用咩語言啦。其實有少少似我哋上次講雙層語言嗰樣嘢嘅。已經習慣咗喇，噉但係，噉而家就可能有啲新嘅政策啦……其實都唔係新㗎喇，即係之前有普教中啊，等等，慢慢慢慢噉樣改變，就去到郁呢一個嘅平衡囉。噉……噉譬如話，假如我哋如果將我哋日常生活中英文同埋官話嘅地位調轉咗喇，噉大家接唔接受到呢樣嘢呢？我覺得呢個係可以問下嘅問題。即係我哋……我哋唔想有語言歧視啦，好明顯，即係我只不過都係從一個本地語言同外地語言對比嘅一個……呢個角度去到討論。「外地語言」，死喇，拉得喇。
靳：「外地」啫。
The rest of the transcript is available to Patreon members.
