In order to keep making this podcast, we need your support! As a member, your contributions will go into our production costs, as well as motivating us to keep making quality content and transcripts.
Details of our membership tiers are available on the Patreon page.
Subscribe now and read the first 5 episodes for free!
P.S.: The next episode is already in production!
This podcast is also available on YouTube. Don’t forget to subscribe!
Full transcript
[jingle]
以：各位語言迷，
全部：新年快樂！
以：話咁快就去到呢個2021年啦，都希望係一個……好啲嘅一年啦。（三：係嘞）噉我哋絮言．狂想呢，而家已經做咗五集嘞。噉就分別有四個唔同嘅大題目啦，同埋一個比較係吹水啲嘅一集啦。噉我哋呢一個節目呢，當初設計呢，其實係有兩個唔同嘅目標嘅。一嚟就係向呢一個講廣東話嘅人介紹一啲語言嘅題目啦，二嚟就係向一啲對語言有興趣嘅人提供一啲廣東話嘅聆聽練習嘞。由開始呢個節目以嚟呢，我哋每一集都打咗一個完整嘅transcript啦，噉即係將成集半個鐘至九個字咁多隻字，逐隻逐隻打晒出嚟
三：係啊，噉呢一啲噉樣嘅文字稿呢，本來其實都係諗住畀啲學緊廣東話嘅人睇啦，但係原來好多母語者，即係好多香港人啊、好多講廣東話嘅人呢，都有興趣睇埋文字版嘅，仲要好心急噉樣問我哋有冇添！即係原來都好……意外地呢，我哋都驚奇噉，原來好多人想睇㗎喎。
以：係啊，我就係喺我哋啲YouTube嘅片下片就見到好多人就喺度講：「啊，幾時有得睇transcript啊？幾時有文字版可以參考啊？」噉樣。
靳：噉我哋本來都係諗住將呢樣嘢係一樣興趣嚟做啦，噉但係當然過程中會有好多嘅挑戰啦，例如話可能大家都有好多嘅其他嘢做啦，有啲人要返工，有啲人要……又要讀書，又有人要做其他嘢噉樣。噉中間可能都會有一啲情況一下，可能我哋就未必可以一齊噉樣好密噉樣去出新一集出嚟。噉加上啦，喺我哋剪輯嘅時候，同埋喺度打呢個逐字稿嘅時候呢，都需要好多時間噉樣嘅。噉我哋本身都想呢，每個禮拜可以剪到一集，同埋加埋出埋呢個逐字稿噉，但係其實所需嘅時間呢，都好多嘅。
以：係啊，因為我哋都想我哋每一集嘅內容會緊湊啲啦，噉所以我哋其實都會剪走晒裡面唔關事嘅嘢啊，或者啲空隙啊等等啦。噉再加埋我哋要將佢變成一條YouTube片畀大家去到喺YouTube上面睇到啦，再打埋每集好似有大概萬四、萬五字到嘅transcript啦。噉所以呢，其實我哋都好希望呢，各位聽眾呢，係可以去到支持我哋，去出更加多同埋更加高質素嘅內容畀大家聽嘅。噉於是呢，（三：jingle）我哋就決定喺新嘅一年，2021嘅開頭呢，就開一個Patreon嘅平台，畀大家去到參與嘞。
三：噉呢，Patreon呢，就係一個畀創作者嘅一個課金平台嚟嘅。相信呢，好多睇YouTube啊，或者其他嘢嘅人呢，都會知道啦，噉好多人都開呢一啲噉樣嘅Patreon呢，就可以讓觀眾呢，直接金錢上就支持啲創作嘅人啦，噉令到佢哋可以製造一啲比較更加高質素，或者更加頻密噉樣去出一啲新嘅作品啦。
以：噉大家可能會諗，我哋呢一個簡單嘅傾偈嘅節目呢，要錢嚟做咩呢？其實我哋幕後都要有啲開支嘅。譬如話技術上面啦，我哋就會需要租一個網域去到擺我哋每一集嘅file上去啦，或者升級我哋愛嚟錄音啊、剪接啊，各種嘅儀器啊、軟件硬件等等。噉同埋又喺我哋忙嘅時候呢，都可以為我哋花嘅時間同埋心力，畀返少少酬勞啦。同埋更加重要嘅就係畀到個穩定性我哋啦，令到我哋有信心啦，可以去嘗試下唔同嘅嘢啊，或者去到更加改良我哋嘅製作。
靳：噉其實呢個Patreon有啲咩好處呢？即係。
以：噉呢，我哋呢個平台上面呢，其實我哋最重視嘅呢，就係大家可以支持到我哋恆常噉樣抽時間去做啦，同埋主動啲去到搵一啲唔同嘅、有趣嘅題目啊、喺幕後做一啲資料搜集啊，等等。
三：噉另外呢，我哋都有啱啱講過嘅逐字稿啦。因為呢，我哋呢一個podcast呢，聲音都係主要嘅媒體啦，所以呢一份稿呢，會跟足每一粒字，用字呢，都係細心準確，噉就方便大家理解嗰個錄音啦。尤其是係一啲學緊廣東話嘅人。同時呢，亦都可以宣揚粵文。噉呢，因為逐字稿呢，就係將呢一個聲音就變成文字啦，噉都可以令到大家好容易噉樣去喺網上搵到我哋啦，噉都希望可以藉呢個機會呢，就宣揚更加多粵文嘅創作。
靳：如果我哋之後呢，會做一啲特別嘅集數嘅話呢，噉我哋都可以畀大家呢，早啲去聽到我哋嘅錄音啦。噉同埋可能會有一啲附加嘅一啲資訊啊、或者一啲bonus嘅內容啊。除此之外呢，噉我哋都可以將一啲我哋未經剪接，可能入面呢，多啲閒話啊、多啲笑嘅部份呢，噉就cut畀大家噉樣，噉就有一個uncut嘅episode噉畀大家去聽噉樣嘅。
以：仲有我哋會喺製作嘅期間啦，譬如話我哋錄音嘅時候啦、我哋剪接啊等等，將嗰個過程呢，就會擺上去畀大家可以喺幕後追蹤下，到底我哋幾時做緊呢樣嘢啊，同埋點樣做啊，等等嘅。
靳：係嘞。如果對我哋下一集想做咩，都想有啲意見嘅朋友呢，噉我哋都諗住呢，就就住我哋每一集會做啲乜嘢呢，噉都喺個Patreon嗰度呢，做一個投票，噉想睇下大家都想我哋下一集係做咩乜嘢嘅節目啦。噉同埋Patreon呢個平台呢，其實就大家都可以問下問題啊，或者對我哋嗰個podcast做一啲建議啦。噉如果我哋之後多啲人嘅話呢，我哋都想可以做到一個Discord嘅伺服器，噉大家喺上高呢，就可以傾好多關於……即係Patreon嘅嘢啦，或者直接同我哋通訊噉樣嘅。噉我哋都想……即係最後啦，噉都可以鳴謝到我哋……幫我哋課金嘅朋友啦。如果課金嘅級數比較多嘅朋友呢，噉我哋都會喺每一集嗰度，都會鳴謝大家噉樣嘅。
以：噉到底係點樣計錢嘅呢？
三：係嘞。噉因為呢，我哋唔可以擔保可以定期出新嘅集數啦，所以我哋都唔好意思噉定期收錢，即係例如係逐個月計噉樣啦。噉所以我哋就決定呢，係逐集計嘅。噉就可以確保到你哋嘅貢獻呢，係直接放入每一集嘅製作。
以：噉我哋啱啱到提到啦，其實呢，我哋嘅支持者會有唔同嘅等級嘅。噉每個等級都會有唔同嘅着數啦，噉如果想知道詳情嘅話呢，就請大家去到Patreon嗰頁上面，去到參考嘞。噉我諗起最近喺我哋嘅YouTube上面有一個留言啦，就話：「好可惜粵語世界裡面對呢啲題目有興趣嘅人就唔係好多，所以就唔係好多人去到聽呢個節目。」我哋都想向大家證明呢，呢樣嘢唔係真嘅。有一排之前網上有一個po呢，就係關於學語言啦，噉我哋喺留言裡面呢，都睇到對學語言啊、對語言嘅嘢有興趣嘅人呢，係多不勝數嘅。噉所以我哋覺得呢，我哋潛在嘅觀眾呢，其實係多嘅，所以我哋好希望呢個節目可以一直堅持做落去，直至到我哋可以向每一個對語言有興趣嘅廣東話人呢，都分享到我哋大家嘅熱忱啦。所以我哋好需要你嘅支持。
靳：所以快啲落去㩒我哋show notes Patreon嗰條拎度支持我哋啦！
